.jpg)
គំនូរសហសម័យ ១ ផ្ទាំងដែលមានចំណងជើងថា «ចំណងស្ពានព្រះគន្លងអវតារ Wi-Fi» ។ ហេង ជីវ័ន
ភ្នំពេញៈ កើតចេញពីឆន្ទៈ និងមនសិការចង់បន្សល់ទុកនូវស្នាដៃជាគំរូទុកដល់ក្រុមវិចិត្រករខ្មែរជំនាន់ក្រោយ និងបង្ហាញពីសមិទ្ធផលដ៏ត្រចះត្រចង់របស់ថ្នាក់ដឹកនាំ នាសម័យបច្ចុប្បន្ននេះ ទើបវិចិត្រករ មានទេពកោសល្យ និងគំនិតច្នៃប្រឌិតខ្ពស់លោក លាង ស៊ីកន នឹងនាំយកនូវបណ្តំស្នាដៃគំនូរសហសម័យទាំងតូច និងធំចំនួនជាង ១០ ផ្ទាំង ទៅតាំងបង្ហាញនៅឯវិចិត្រសាលនៃវិទ្យាស្ថានប្រទេសបារាំងនៅថ្ងៃទី ២៦ ខែ មេសា ដល់ថ្ងៃទី ២៦ ខែឧសភា ឆ្នាំ ២០១៨ ខាងមុខនេះ។
នេះក៏ជាការប្រកាសខ្លួនដើម្បីចូលរួមចំណែកបង្កើតស្នាដៃគំនូរបែបសហសម័យសាជាថ្មីម្តងទៀតផងដែរនៅក្នុងប្រទេសកម្ពុជា ខណៈវិចិត្រកររូបនេះ បាត់មុខមួយរយៈនៅក្នុងស្រុកដោយលោកជាប់រវល់កិច្ចការផ្ទាល់ខ្លួន និងដោយសារមួយរយៈនេះ លោកច្រើនតែនាំយកស្នាដៃនានាទៅដាក់តាំងបង្ហាញនៅឯក្រៅប្រទេសមកនោះ។
បណ្តុំស្នាដៃគំនូរសហសម័យនានាទាំងនោះ នឹងដាក់តាំងរយៈពេលមួយខែ នៅឯវិចិត្រសាលនៃវិទ្យាស្ថានប្រទេសបារាំង ក្រោមប្រធានបទធំមួយ ដែលមានចំណងជើងថា «ពិភពរបស់សិល្បករ»។
វិចិត្រករខ្មែរ លាង ស៊ីកន កំពុងបង្ហើយស្នាដៃខ្លួន។ ហេង ជីវ័ន
អ្វីដែលអស្ចារ្យ និងមានលក្ខណៈថ្មីសន្លាង សម្រាប់ស្នាដៃវិចិត្រកម្មបែបសហសម័យរបស់វិចិត្រករវ័យ ៤៨ ឆ្នាំ មានស្រុកកំណើត នៅភូមិមេលប់ ឃុំរកា ស្រុកពារាំង ខេត្តព្រៃវែងលោក លាង ស៊ីកន បានរំលេចចេញនូវគំនូរមួយដ៏កម្រ និងខុសប្លែកពីវិចិត្រករនានាតែម្តងគឺផ្ទាំងគំនូរមានរូបថ្នាក់ដឹកនាំកំពូលនាពេលបច្ចុប្បន្នគឺនាយករដ្ឋមន្ត្រីកម្ពុជាលោក ហ៊ុន សែន ដោយលោកបានដាក់ចំណងជើងថា «ចំណងស្ពានព្រះគន្លងអវតារ Wi-Fi»។
វិចិត្រករដ៏ចំណានលោក លាង ស៊ីកន ដែលទើបតែបានវិលពីការនាំយកស្នាដៃគំនូរសហសម័យចំនួន ៤២ ផ្ទាំង ក្រោមប្រធានបទ «ស្លាប់ហើយរស់ឡើងវិញ» របស់លោកទៅតាំងនៅឯអគារវិចិត្រសាលដ៏ប្រណីតលំដាប់អន្តរជាតិនៃទីក្រុងហុងកុង នៅថ្ងៃទី ២៣ ខែកញ្ញា ឆ្នាំ ២០១៧ បានបង្ហើបឲ្យដឹងពីអត្ថន័យនៃផ្ទាំងគំនូរដ៏ពិសេសនេះថា៖ «បន្ទាប់ពីមាតុភូមិកម្ពុជា បានបែកបាក់ដោយសង្គ្រាមមក នៅដើម ទសវត្សរ៍ទី ៩០ ខ្ញុំមើលឃើញសមិទ្ធផលជាអនុស្សាវរីយ៍នៃស្ពានទី ១ គឺស្ពានព្រះគន្លងបានស្ថាបនា ក្រោមការដឹកនាំនៃរដ្ឋាភិបាលខ្មែរមានសម្តេចតេជោហ៊ុន សែន ដែលជាការកសាងដើម្បីភ្ជាប់ចំណងតំបន់ទំនាបកណ្តាល ជួយសម្រួលដល់ដំណើរឆ្លងកាត់ និងដឹកជញ្ជូនភោគផលដំណាំរបស់ប្រជាពលរដ្ឋ ហើយស្ពាននេះដែរ ជាការជួយសម្រេចបំណងរបស់ខ្ញុំផងដែរ ដោយសារតែស្ពានព្រះគន្លង បានជួយចម្លងរូបខ្ញុំពីស្រុកកំណើតមកក្រុងភ្នំពេញ មានឱកាសបានរៀនសូត្រនូវមុខជំនាញសិល្បៈវិចិត្រកម្មនៅសាលារចនា ដែលជាជោគជ័យ និងក្លាយមុខរបរខ្ញុំសព្វថ្ងៃនេះ»។
លោកបន្តថា៖ «មួយទៀតមកដល់សព្វថ្ងៃនេះ សន្តិភាព និងការអភិវឌ្ឍដ៏រីកចម្រើនយ៉ាងឆាប់រហ័សនៃសំណង់អគារខ្ពស់ៗ ដែលខ្ញុំបង្ហាញនៅខាងក្រោយសម្តេចនោះ គឺចង់បង្ហាញពីការប្តូរមុខមាត់ថ្មី និងការលូតលាស់របស់រាជធានីភ្នំពេញ គួរឲ្យភ្ញាក់ផ្អើល។ ចំពោះអវតារ Wi-Fi គឺជានិមិត្តរូបបូករួមបញ្ចូលគ្នានៃតួអង្គបុព្វបុរសតាមរយៈរូបចម្លាក់សម័យអង្គរ ដែលទទួលបានវិលត្រឡប់មកវិញពីប្រទេសអង់គ្លេស ជាតំណាងឲ្យវប្បធម៌ដ៏ខ្ពង់ខ្ពស់នៃខ្មែរ និងជាអ្នកគាំទ្រការពារព្រលឹងវប្បធម៌ជាតិឲ្យគង់វង្សជាអមតៈ និងជាឥស្សរិយយសដ៏អស្ចារ្យ មានមុខងារបំពេញបន្ថែមនៅក្នុងសម័យតេជោ សែន និងជាពានរង្វាន់ដល់ប្រជាជនខ្មែរ ហើយតាមរយៈ Wi-Fi នេះបានដាស់កូនខ្មែរជំនាន់ក្រោយឲ្យភ្ញាក់រឭកពួតដៃគ្នាជួយកសាងជាតិទាំងអស់គ្នាឲ្យបានរុងរឿង»៕
គំនូរសហសម័យស្តីពីឥទ្ធិពលសាសនាដោយសារ Wi-Fi។ ហេង ជីវ័ន
