.jpg)
ផ្ទាំងគំនូរមានចំណងជើង «ក្តីស្រមៃ» របស់វិចិត្រករ ជានិស្សិតពេទ្យលោក ហួរ សុបិន។ រូបថត ហ្វេសប៊ុក
ភ្នំពេញៈ វិចិត្រករជានិសិ្សតពេទ្យលោក ហួរ សុបិន ដែលធ្លាប់ឈ្នះការប្រកួតប្រជែងទេពកោសល្យគំនូរប្រចាំនៅឆ្នាំ ២០១៨ កំពុងតែប្រមែប្រមូលស្នាដៃខ្លួនតាំងពីចាប់ផ្តើមបង្កើតមក និងបង្កើតថ្មី ដើម្បីរៀបចំការតាំងពិព័រណ៍ទោល នៅឯវិចិត្រសាល Khbach Gallery នាចុងខែ វិច្ឆិកា ឆ្នាំ ២០១៩ ជាលើកដំបូង។
ខណៈសព្វថ្ងៃ ខ្លួនជានិស្សិតកំពុងតែចាប់យកការសិក្សាជំនាញគិលានុបដ្ឋាកមែនក្តី តែទេពកោសល្យជាដុងពីកំណើតបូកផ្សំនឹងការធ្លាប់រៀនសិល្បៈវិចិត្រកម្មខ្លះ កាលនៅរៀនវិទ្យាល័យនោះ បន្តជំរុញទឹកចិត្តឲ្យលោក ហួរ សុបិន ចងក្រង និងប្រមែប្រមូលស្នាដៃសិល្បៈខ្លួន ត្រៀមរៀបចំដាក់តាំងពិព័រណ៍ទោល ជាលើកដំបូងរបស់ខ្លួន ដែលមានលក្ខណៈជាស៊េរី នៅចុងឆ្នាំ ២០១៩ នេះ។
ទោះបីជាមិនសូវមានពេលសម្រាប់បង្កើតស្នាដៃគំនូរច្រើនមែនក្តី ក៏លោក ហួរ សុបិន នៅតែអាចឆ្លៀតបង្កើតស្នាដៃគំនូរប្រេងយ៉ាងល្អស្អាត តាមគំនិតបែបស្រមើស្រមៃផ្ទាល់ខ្លួន ដោយឆ្លុះបញ្ចាំងពីទស្សនៈ ឬបង្កប់ន័យអប់រំផ្នែកណាមួយនៅក្នុងសង្គមដូចជាស្នាដៃចុងក្រោយខ្លះដូចជាស្នាដៃឈ្មោះថា «នាងទេពមច្ឆាដ៏រីករាយ» និងឈ្មោះ «ក្តីស្រមៃ»។
ផ្ទាំងគំនូរឈ្មោះថា «នាងទេពមច្ឆាដ៏រីករាយ» ។ រូបថត ហ្វេសប៊ុក
លោក ហួរ សុបិន ជានិស្សិតរៀនជំនាញគិលានុបដ្ឋាកឆ្នាំទី២ នៃសាកលវិទ្យាល័យវិទ្យាសាស្ត្រសុខាភិបាលមានវ័យ ២១ ឆ្នាំមានស្រុកកំណើតពីក្រុងសៀមរាប បង្ហើបពីគម្រោងរៀបចំការបើកពិព័រណ៍ទោលខ្លួនខាងមុខថា៖ «សម្រាប់គម្រោងពិព័រណ៍ទោលរបស់ខ្ញុំ នៅថ្ងៃខាងមុខនោះ គឺខ្ញុំមានគម្រោងប្រមូល និងបង្កើតស្នាដៃជាលក្ខណៈស៊េរី ហើយនឹងត្រៀមចំនួន ១២ ផ្ទាំង ដើម្បីដាក់តាំងនៅចុងខែវិច្ឆិកា ឆ្នាំនេះតែម្តង។នេះជាការបើកតាំងពិព័រណ៍ស្នាដៃទោលដំបូងខ្ញុំ មានទាំងស្នាដៃចាស់ និងបង្កើតថ្មី»។
វិចិត្រករ ហួរ សុបិន បានបន្តថា៖ «ដូចគំនូរ «នាងទេពមច្ឆាដ៏រីករាយ» ស្តីពីមច្ឆាដ៏ស្រស់ស្អាតបំផុតក្នុងមហាសមុទ្រហើយនាងក៏ទទួលបានការស្រឡាញ់យ៉ាងខ្លាំងពីមនុស្សគ្រប់គ្នា។ ស្នាមញញឹមនាងមានតម្លៃសម្រាប់មនុស្សគ្រប់គ្នា ហើយក្តីស្រឡាញ់នាងគឺភ្លឺជាងព្រះអាទិត្យ។ ខ្ញុំប្រើពណ៌ក្រហម តំណាងឲ្យក្តីស្រឡាញ់នាងដែលភ្លឺដូចជាព្រះអាទិត្យ ខណៈពណ៌ខៀវតំណាងឲ្យក្តីសប្បុរសដែលត្រជាក់ដូចជាមហាសមុទ្រ និងពណ៌បៃតង តំណាងឲ្យជីវិតត្រូវការពន្លឺ និងទឹកដើម្បីរស់នៅ។
រីឯស្នាដៃ ស្តីពី «ក្តីស្រមៃ» និយាយពីការស្រមៃរបស់នារីរបាំម្នាក់ ដែលចង់ក្លាយជាអ្នករបាំដ៏ជោគជ័យ និងល្បីល្បាញម្នាក់ ដើម្បីអភិរក្សក៏ដូចថែរក្សាវប្បធម៌អរិយធម៌ពីដូនតា និងអ្វីដែលនាងស្រឡាញ់យូរមកហើយ។ មិនយូរប៉ុន្មាន នាងក៏ក្លាយជា នារីរបាំដ៏ល្បីម្នាក់ កេរ្តិ៍ឈ្មោះនាងល្បីសុសសាយដូចជាមេអំបៅហើរបានខ្ពស់ នៅគ្រប់ទីកន្លែង គឺជាវប្បធម៌ អរិយធម៌ ដែលស្រឡាញ់ និងថែរក្សាឲ្យបានយូរយារហើយ និងបានសាយភាយដល់ពិភពលោក ធ្វើឲ្យមនុស្សម្នា បានស្គាល់ប្រទេសនេះ កាន់តែច្បាស់ និងឆាប់រហ័ស លូតលាស់ដូចជាផ្កាឈូកដ៏កម្រមួយ»៕
