បាត់ដំបងៈ បណ្តុំស្នាដៃគំនូរប្រេងមានលក្ខណៈល្អឆើតឆាយ និងគួរឲ្យចង់គយគន់ ជារូបទេសភាពព្រៃព្រឹក្សា រូបដើមត្នោត ស្រុកស្រែចម្ការ ទេសភាពតាមដងទន្លេ ស្ទឹង បឹងបួ សកម្មភាពកសិករប្រមូលផលតាមវាលស្រែ រូបនារីចោមពង់ចុះងូតទឹកនៅទីជនបទ រូបនារីខ្មែរច្រូតស្រូវ ទេសភាពផ្កាឈូក ឬផ្ការំចេករំចង់ក្នុងត្រពាំង រូបផ្ការំដួល រូបអប្សរារេរាំ ក្មេងឃ្វាលគោ និងរូបសត្វផ្សេងៗ កំពុងទទួលបាននូវការចាប់អារម្មណ៍ និងកោតសរសើរយ៉ាងខ្លាំងពីមហាជន ចំពោះទឹកដៃដ៏ល្អចំណានរបស់វិចិត្រករ ស្រី បូរ៉ា។
លោក ស្រី បូរ៉ា គ្រាន់តែអតីតធ្លាប់ជាសិស្សរៀនគូរគំនូរខ្មៅដៃកាលពីឆ្នាំ ១៩៩៧ ដែលអង្គការយូណេស្កូ បានបើកង្រៀនវគ្គខ្លីបណ្តុះបណ្តាលផ្នែកគំនូរ និងផ្តើមគូរវាសរូបគំនូរទេសភាពប្លែកៗអំឡុងឆ្នាំ ២០០៤-២០០៥ និងទើបតែចាប់ផ្តើមបង្កើតស្នាដៃលក់ដូររកប្រាក់កម្រៃអាចចិញ្ចឹមគ្រួសារតាំងពីឆ្នាំ ២០១៤ ក្រោយពីមហាជនទទួលស្គាល់ស្នាដៃដ៏ល្អវិចិត្ររបស់លោកមក។
ជាទូទៅវិចិត្រករមានស្រុកកំណើតនៅស្រុកគាស់ក្រឡ ខេត្តបាត់ដំបង វ័យ ៣៨ ឆ្នាំរូបនេះមានទឹកដៃល្អឯកផ្នែកគំនូរប្រេងបែបសេចក្តីស្រមៃគិត ដើម្បីបង្កើតស្នាដៃដ៏ល្អប្រណីត ដែលមើលទៅស្រស់ស្អាត និងល្អឥតខ្ចោះគួរឲ្យចង់គយគន់។
ដោយសារពុំទាន់មានលទ្ធភាពអាចបើកវិចិត្រសាលផ្ទាល់ខ្លួនបាននៅឡើយនោះ ទើបរាល់ការជាវស្នាដៃគំនូរលោកតម្រូវឲ្យកុម្ម៉ង់មុន ដោយស្នាដៃគំនូរទាំងនោះមានតម្លៃចាប់ពី ១ ផ្ទាំង ៥០ ដុល្លារដល់ជាង ១ ពាន់ ដុល្លារ។ រីឯស្នាដៃផ្សេងៗទៀតរបស់លោកស្រី បូរ៉ា ក៏ត្រូវបានលក់ដុំទៅឲ្យបណ្តាវិចិត្រសាល ឬទីកន្លែងទទួលលក់ស្នាដៃវិចិត្រកម្មនានាផងដែរ។
លោក ស្រី បូរ៉ា បង្ហើបឲ្យដឹងពីតម្លៃគំនូរតាមទំហំឲ្យដឹងថា៖ «កាលពីមុនគំនូរតូចបំផុត ១ ផ្ទាំងមានតម្លៃ ៥០ ដុល្លារ ប្រើពេលកន្លះថ្ងៃ ខណៈទំហំមធ្យម ១ ផ្ទាំង តម្លៃ ៥០០ ដុល្លារ ប្រើពេល ៣-៤ ថ្ងៃ និង ១ ផ្ទាំងតម្លៃជាង ១ ពាន់ដុល្លារ ដោយត្រូវប្រើពេលវេលា ១ អាទិត្យ ខណៈទំហំធំអាចមានទំហំ ១,៥ ម៉ែត្រ x ៣ ម៉ែត្រ និងទំហំ ២ ម៉ែត្រ x ៤ ម៉ែត្រ គឺអាចកុម្ម៉ង់ជាវតាមទំហំដែលត្រូវការបាន»។
កាលពីដំបូងអាជីពជាងគំនូរលោកស្រី បូរ៉ា គ្មានទីផ្សារល្អអាចរកប្រាក់ចិញ្ចឹមគ្រួសារបានឡើយ តែចាប់តាំងពីមានអ្នកស្គាល់ពីទឹកដៃគំនូរដ៏ល្អវិចិត្រលោកត្រឹមឆ្នាំ ២០១៤ មកនោះមុខរបរជាជាងគំនូរក៏ឲ្យមានភាពជាទីពឹង និងជាប្រភពសេដ្ឋកិច្ចរកប្រាក់ចំណូលផ្គត់ផ្គង់ជីវភាពគ្រួសារ មានប្រពន្ធ និងកូន ២ នាក់នៃគ្រួសាររបស់លោកបានតរៀងមក។
លោក ស្រី បូរ៉ា ក៏បញ្ជាក់ឲ្យដឹងដែរថា៖ «ចាប់តាំងពីឆ្នាំ ២០១៤ មក ការប្រកបរបរជាងគំនូររបស់ខ្ញុំអាចរកប្រាក់ចំណូលសម្រាប់ផ្គត់ផ្គង់ និងចិញ្ចឹមគ្រួសារខ្ញុំបាន។ ដោយសារតែស្នាដៃគំនូររបស់ខ្ញុំក្នុង ១ ខែ គឺអាចលក់ចេញចន្លោះពី ៧-៨ ផ្ទាំងគំនូរ បានដោយមានលក្ខណៈចម្រុះគឺទាំងតូច និងធំ»។
ប្រសិនបើចង់បានស្នាដៃគំនូរដ៏ល្អវិចិត្រដែលមើលទៅល្អដូចជារូបថតពិតៗនោះអាចទាក់ទងវិចិត្រករ ស្រី បូរ៉ា ផ្ទាល់តាមលេខទូរស័ព្ទ 012 8181 63/ 081 529 095៕