The Phnom Penh Post Search

Search form




Logo of Phnom Penh Post newspaper Phnom Penh Post - វិចិត្រ​ករ​បីរូប​សម្ពោធ​ពិព័រណ៍​គំនូរ​របាំ​ អប្សរា ​នៅ​ឯ​ផ្ទះ​មេត្តា




វិចិត្រ​ករ​បីរូប​សម្ពោធ​ពិព័រណ៍​គំនូរ​របាំ​ អប្សរា ​នៅ​ឯ​ផ្ទះ​មេត្តា

Content image - Phnom Penh Post
វិចិត្ររ​លោក សួស្តិ៍ សុដាវី កញ្ញា ឆន ឌីណា និង​លោក ឈឹម សុធី។ ហុង មិនា

វិចិត្រ​ករ​បីរូប​សម្ពោធ​ពិព័រណ៍​គំនូរ​របាំ​ អប្សរា ​នៅ​ឯ​ផ្ទះ​មេត្តា

ភ្នំពេញៈ​ ផ្ទាំង​គំនូរ​ស្តីពី​ទម្រង់​របាំ​អប្សរា​ខ្មែរ​នា​សម័យ​បុរាណ​ចំនួន ១២​ ផ្ទាំង​របស់​វិចិត្រករ​ខ្មែរ​ឆ្នើម​ទាំង​បីរូប​ដែល​ទើប​តែ​ទទួល​បាន​ពាន​រង្វាន់​តំណាង​ប្រទេស​កម្ពុជា​ កាលពី​ខែ​កុម្ភៈ​ ២០១៦ កន្លង​មកនោះ​ នឹងបើក​សម្ពោធ​នូវពិព័រណ៍​ស្នាដៃ​គំនូរ​រួមគ្នា​នៅឯ​ផ្ទះ​មេត្តា ឬ​មណ្ឌល​វប្ប​ធម៌​អាល្លឺម៉ង់​ នៅថ្ងៃ​ទី ២៦​ ខែ​មេសា​ខាងមុខ​នេះ ដើម្បី​បង្កើត​ចំណង​ភាព​ស្និទ្ធស្នាល​រវាង​វិចិត្រ​ករ និង​ផ្សព្វផ្សាយ​សិល្បៈ​គំនូរ​អរូបី​ខ្មែរ។

Content image - Phnom Penh Post
ចម្លាក់​គំនូរ​អរូបី​ជាស្នាដៃ​វិចិត្រ​ករ​ស្រី កញ្ញា ឆន ឌីណា។ រូប សហការី

​វិចិត្រ​ករស្រី​វ័យ ៣១ ឆ្នាំ កញ្ញា ឆន ឌីណា បញ្ជាក់​ថា៖ «ដោយ​សារ​តែពួក​យើង​ទាំងបី ទើប​តែ​ទទួល​បានសមិ​ទ្ធផល​​ជាកិត្តិយស​តំណាង​ឲ្យ​ខ្លួនឯង​ និង​ប្រទេស​ជាតិ​រួមគ្នានៅ​សាកល​វិទ្យាល័យ​មហាសារា​ខាំនៅ​ក្នុង​ខេត្តមហា​សារា​ខាំ​ ប្រទេស​ថៃ​មកនោះហើយ​ ក៏​គិតថា គួរតែ​បង្កើត​ស្នាដៃ​ពិព័រណ៍​មួយរួមគ្នា ​ដើម្បី​ទុកជា​ការ​រឹតបន្តឹង​ចំណង​សម្ព័ន្ធភាព​គ្នាឲ្យ​បានល្អប្រសើរ​តាម​រយៈ​ស្នាដៃ​មួយ​ស្តីពី​ទម្រង់​របាំ​អប្សរា​ខ្មែរ ដាក់​តាំងនៅ​មណ្ឌល​វប្បធម៌​អាល្លឺម៉ង់​»។​

កញ្ញា បាន​បន្តថា៖ «យើង​ទាំងបីបាន​មូលមតិ​គ្នា​បង្កើតនូវ​ស្នាដៃ​ជា​ប្រភេទ​គំនូរ​អរូបី ​ដែល​ឆ្លុះបញ្ចាំង​អំពី​ទម្រង់​នៃ​សិល្បៈ​របាំ​អប្សរា​ខ្មែរ​នាសម័យ​បុរាណ​ទៅ​តាមគំនិត​រៀងៗ​ខ្លួន ខណៈ​ម្នាក់ៗ​មាន​ស្នាដៃ​ចំនួនបួន​ផ្ទាំង តែ​សម្រាប់នាង​ខ្ញុំមាន​គំនូរ​បី​ផ្ទាំង និង​រូប​ចម្លាក់​មួយ​។ ការ​សម្ពោធ​ពិព័រណ៍នេះ​ ធ្វើនៅ​ថ្ងៃទី ២៦ ខែមេសា​ និងបន្ត​ទៅ​ដល់​ខែឧសភា​ ឆ្នាំ ២០១៦ ខាងមុខ​។ ក្រៅពី​ការ​ចង់​រឹត​បន្តឹង​ចំណង​សម្ព័ន្ធ​ភាពនៃ​ពួកយើង​នោះ​ ក៏មាន​គោល​បំណង​ធំមួយ​​ដែរគឺចង់​បង្ហាញ​ដល់​កូនខ្មែរនា​ជំនាន់​ក្រោយៗ​ឲ្យពួកគេ​បាន​យល់​ដឹងពី​ទម្រង់​នៃ​របាំ​បុរាណខ្មែរ​យើង​ ដែល​មានតាំង​ពីបរម​បុរាណ​មកនោះ​ជាមួយ​នឹងផ្ទាំង​ទស្សនីយភាព​គំនូរ​ទាំងនេះ​តែម្តង»។​

គួរ​បញ្ជាក់ថា វិចិត្រ​ករខ្មែរ​ឆ្នើម​ទាំង​បីរូប​ខាងលើ​នេះ​គឺលោក សួស្តិ៍ សុដាវី វ័យ ៦០ ឆ្នាំ​ បាន​ពាន Venerable Artist Award លោក ឈឺម សុធី វ័យ ៤៩ ឆ្នាំ​ បានពាន Honored Artist Award និង​កញ្ញា ឆន ឌីណា វ័យ ៣១ ឆ្នាំ​ បានពាន​ Young Artist Award ​ពី​កម្មវិធី​ The CMLTV Contemporary Art Awards 2016 លើកដំបូង​ ដែល​បាន​រៀបចំ​ឡើង​ដោយ​សាកល​វិទ្យាល័យ​មហា​សារាខាំ​ នៅក្នុង​គោល​បំណង​ សិក្សា​ស្វែង​យល់​អំពី​សិល្បៈ​សហសម័យ​នៃ​ប្រទេស​ជា​សមាជិក​អាស៊ាន ទាំងប្រាំ​ប្រទេស​នោះ​រួមមាន​ ដូចជា​ កម្ពុជា មី​យ៉ាន់ម៉ា ឡាវ ថៃ និង​វៀត​ណាម​ និង​ក្រុម​​វិចិត្រករ​តំណាង​ប្រទេស​ខ្លួនសរុប​ទាំង​អស់​មានចំនួន ១៥ រូប៕

អត្ថបទគួរចាប់អារម្មណ៍