The Phnom Penh Post Search

Search form




Logo of Phnom Penh Post newspaper Phnom Penh Post - វិចិត្រករ​សហសម័យ​​លោក​ បូរ ហាក់ បង្កើត​​​គំនូរ​​ឈើ​ឆេះ​ ដើម្បី​ឆ្លុះ​បញ្ចាំង​ពី​ការ​ប្រតិបត្តិ​សាសនា​នៅ​​​ក្នុង​​​សង្គម​​ខ្មែរ​




វិចិត្រករ​សហសម័យ​​លោក​ បូរ ហាក់ បង្កើត​​​គំនូរ​​ឈើ​ឆេះ​ ដើម្បី​ឆ្លុះ​បញ្ចាំង​ពី​ការ​ប្រតិបត្តិ​សាសនា​នៅ​​​ក្នុង​​​សង្គម​​ខ្មែរ​

Content image - Phnom Penh Post
លោក បូរ ហាក់ ជាមួយ​ស្នាដៃគំនូរ​ឈើ​ឆេះស្តី​អំពី​ការប្រតិបត្តិ​សាសនា​។ គំនូរ​ឈើឆេះ​ស្តីពី​​សកម្ម​ភាពប្រចាំ​ថ្ងៃ​របស់​​ប្រជាជន​ខ្មែរ​ក្នុង​សង្គម​។ សហការី

វិចិត្រករ​សហសម័យ​​លោក​ បូរ ហាក់ បង្កើត​​​គំនូរ​​ឈើ​ឆេះ​ ដើម្បី​ឆ្លុះ​បញ្ចាំង​ពី​ការ​ប្រតិបត្តិ​សាសនា​នៅ​​​ក្នុង​​​សង្គម​​ខ្មែរ​

ក្រុង​បាត់ដំបង៖ ក្រោយ​ពី​​​ខំ​រិះរក​ឃើញ​វិធីសាស្រ្ត​ថ្មី​ ដើម្បី​​កែ​ច្នៃ​ បង្កើត​​គំនូរ​ប្លែកៗ​​ខុស​​ពី​​គេ​ ឃើញ​ថា​ ​ប្រភេទ​​គំនូរ​ឈើ​ឆេះ​ របស់​វិចិត្រករ បូរ ហាក់​ កំពុង​តែ​​ទទួល​​បាន​ការ​គាំទ្រ និង​មាន​ចំណាប់​​អារម្មណ៍​ខ្លាំង​ពី​ភ្ញៀវ​បរទេស ខណៈ​លោក​​ក៏​ត្រៀម​ស្នាដៃ​បន្ថែម​ទៀត​​​ ដើម្បី​យក​​ទៅ​​​​តាំង​ពិព័រណ៍​នៅ​ឯ​ទីក្រុង​ស៊ីថល​ រដ្ឋ​វ៉ាស៊ីនតោន សហរដ្ឋ​អាមេរិក នៅ​ខែ​ឧសភា ឆ្នាំ ​២០២០។

លោក បូរ ហាក់ (Bor Hak)​ ជា​វិចិត្រករ​គំនូរ និង​អ្នក​ជំនាញ​គំនូរ​ជីវចល​​វ័យ ​២៩ ឆ្នាំ ​មាន​​​​​​ស្រុក​កំណើត​​នៅ​ស្រុក​ស្ទោង ខេត្ត​កំពង់ធំ និង​​មក​រៀន​ជំនាញ​គំនូរ​នៅ​សាលា​ហ្វារពន្លឺ​សិល្បៈ​នៅ​ឆ្នាំ ​២០០៤ និង​​ចប់​​នៅ​ឆ្នាំ ​២០១០ ហើយ​ក៏​​​ចាកចេញ​ពី​ស្រុក​កំណើត​កំពង់ធំ មក​ធ្វើ​ការ​នៅ​ខេត្ត​បាត់ដំបង ​​​តាំង​ពី​​​ឆ្នាំ ​២០១៣ ខណៈ​ឆ្នាំ ​២០១៤ លោក​ក៏​ឆ្លៀត​​រៀន​ជំនាញ​​​ផលិត​គំនូរ​ជីវចល​​ នៅ​សាលា​ហ្វារ​ពន្លឺ​​​សិល្បៈ​​​បន្ថែ​ម​ទៀត​​​​​ ដោយ​បញ្ចប់​នៅ​ឆ្នាំ ​២០១៧។

ការ​​បង្កើត​ស្នាដៃ​គំនូរ​ថ្មី​ ដែល​លោក​ បូរ ហាក់ ​ហៅ​​ថា «​​គំនូរ​​ឈើ​​​​​ឆេះ»​ នេះ ទើប​​តែ​បាន​ចាប់​ផ្តើម​នៅ​ប៉ុន្មាន​ឆ្នាំ​ចុង​ក្រោយ ​គឺ​​នៅ​​ត្រឹម​​ឆ្នាំ ​២០១៧ ក្រោយ​ពី​លោក​​​បញ្ចប់​ជំនាញ​ទី ​២ គឺ​ជា​អ្នក​​ផលិត​គំនូរ​ជីវចល​​។​ ចំពោះ​​​​​ស្នាដៃ​​​​​វិញ​លោក​​ក៏​ប្រើ​ពណ៌​លាប ឬ​ផាត់​ សំខាន់​មួយ​​ចំនួន​ ដើម្បី​​​ឆ្លុះ​​បញ្ចាំង​ពី​​ខ្លឹមសារ​ ឬ​​អត្ថន័យ​​ស្នាដៃ​​នីមួយៗ​របស់​លោក ​មាន​​ដូច​ជា​ពណ៌​ស ពណ៌​ក្រហម និង​ពណ៌​​ខ្មៅ​​ជា​ដើម ខណៈ​លោក​​​ក៏​បាន​លើក​ពី​ភាព​​មិន​សម្បូរ​​​​​អ្នក​​យល់​ពី​អត្ថន័យ​​​​​ស្នាដៃ​គំនូរ​ឈើ​ឆេះ​​នេះ​​ផង​ដែរ​​​​។

លោក បូរ ហាក់ ក៏​បាន​ឲ្យ​ដឹង​​ថា​៖ «​​​​សម្រាប់​​បងប្អូន​ខ្មែរ​យើង​មិន​​​​សូវ​​​​​ជា​​មាន​​​​អ្នក​យល់​ពី​អត្ថន័យ​នោះ​​ទេ​ ហើយ​​​​​​ស្នាដៃ​​ថ្មី​ដែល​​ហៅ​​​​ថា «គំនូរ​ឈើ​ឆេះ​» ក៏​មិន​សូវ​មាន​ការ​គាំទ្រ និង​ជាវ​​​​​ដែរ​។ ដូច្នេះ​​​​​​​ខ្ញុំ​​នៅ​បន្ត​​បង្កើត​​សា្នដៃ​នេះ​​​ទៀត​ ​ដែល​ជា​ការ​ឆ្លុះ​បញ្ចាំង​​​ពី​សកម្មភាព​​​ប្រតិបត្តិ​សាសនា​ ក៏​ដូច​ជា​​សកម្មភាព​ជា​​បញ្ហា​សង្គម​​ផ្សេងៗ​​ឲ្យ​​ច្រើន​។ សម្រាប់​ការ​គាំទ្រ និង​​​ជាវ​ស្នាដៃ​វិញ​ សម្បូរ​តែ​ជន​បរទេស​តែ​ប៉ុណ្ណោះ​ ​ភាគ​​ច្រើន​ពួក​គាត់​​និយម​​ជាវ​ខ្នាត​មាន​ទំហំ ​១ ផ្ទាំង ​​​តម្លៃ ២៥០ ដុល្លារ។​ ស្នាដៃ​គំនូរ​​​ឈើ​​ឆេះ ​គឺ​ភាគ​ច្រើន​​មាន​ទំហំ​ ៥០x​៣០ សង់ទី​ម៉ែត្រ និង​​ទំហំ​ ៥០x​៤០ សង់​ទី​ម៉ែត្រ ខណៈ​​តម្លៃ​លក់​មាន​​តម្លៃ​ចន្លោះ​ចាប់​ពី​ ១ ផ្ទាំង​ ២៥០ ដុល្លារ រហូត​ទៅ​ដល់​ ១ ​ផ្ទាំង​ មាន​​តម្លៃ ៤៥០ ដុល្លារ។​​

វិចិត្រករ​​ បូរ ហាក់ ក៏​បាន​បង្ហើប​ឲ្យ​ដឹង​ពី​អត្ថន័យ​​នៃ​​ពណ៌​ ដែល​មាន​​​ក្នុង​ស្នាដៃ​គំនូរ​ជា​ចម្បង​​ខ្លួន​​ផ្តោត​លើ​​ការ​​​​ប្រតិបត្តិ​​សាសនា​ ក្នុង​​សង្គម​​ខ្មែរ​ថា៖ «ខ្ញុំ​​​បាន​​​​ប្រើ​ពណ៌​ស ជា​និមិត្ត​រូប​​​តំណាង​នូវ​​ភាព​​ល្អ​​បរិសុទ្ធ​​​នៃ​​​ព្រះ​ធម៌ ក្នុង​​ព្រះពុទ្ធ​​សាសនា​ ពណ៌​ក្រហម​ជា​តំណាង​ឲ្យ​ភាព​​​រស់រាន ​មាន​​ជីវិត​នៃ​សាសនា​តាមរយៈ​ការ​​ប្រតិបត្តិ​​របស់​ព្រះសង្ឃ និង​​​ពុទ្ធ​​បរិស័ទ​នៅ​ក្នុង​សង្គម​ខ្មែរ​យើង។ ចំណែក​ឯ​ពណ៌​ខ្មៅ​វិញ​នោះ គឺ​តំណាង​ឲ្យ​សកម្មភាព​នៃ​ការ​ប្រព្រឹត្ត ឬ​ប្រតិបត្តិ បែប​មិន​ល្អ ឬ​មិន​សូវ​ជា​​ត្រូវ​ទៅ​តាម​គន្លង​នៃ​ព្រះពុទ្ធ​សាសនា​​របស់​មនុស្ស​​លោក​ក្នុង​​សង្គម​ខ្មែរ​ មាន​​​ទាំង​​ព្រះសង្ឃ ឧបាសក​ឧបាសិកា​ជា​ពុទ្ធ​បរិស័ទ​ផង​ដែរ​»។​​

បច្ចុប្បន្ន​លោក បូរ ហាក់ ក៏​កំពុង​តែ​បង្កើត​​​ស្នាដៃ​គំនូរ​ឈើ​ឆេះ​មាន​ចំនួន​ប្រមាណ ​១៧-១៨ ស្នាដៃ​ ត្រៀម​នាំ​យក​ខ្លះ​ទៅ​ចូលរួម​នៅ​ក្នុង​​ការ​តាំង​ពិព័រណ៍​នៅ​ឯ​វិចិត្រសាល Artxchange Gallery នៅ​​​​ទីក្រុង​ស៊ីថល់​ ​(Seattle)​ រដ្ឋ​វ៉ាស៊ីនតោន (Washington) សហរដ្ឋ​​អាមេរិក នៅ​​ក្នុង​​ខែ​ឧសភា​ ឆ្នាំ ​២០២០ ខាង​មុខ​នេះ​ ជាមួយ​នឹង​ក្រុម​វិចិត្រករ​ជា​ច្រើន​ទៀត៕​

អត្ថបទគួរចាប់អារម្មណ៍