ភ្នំពេញ៖ ថ្មីៗនេះ វិចិត្រករ ឈើន ចាន់នី ដែលមានស្រុកកំណើតដូច នឹងអតីតកវីនិពន្ធចម្រៀង ដងស្ទឹងសង្កែដ៏ល្បីលោក គង្គ ប៊ុនឈឿន បានចូលរួមចែករំលែកនូវបទពិសោធពីជំនាញសិល្បៈដល់ក្រុមសិល្បករនៅ Open Studio Cambodia និងសហការបង្កើតគម្រោងស្នាដៃសិល្បៈគំនូរសម្រាប់ឆ្នាំ ២០២០។
វិចិត្រករលោក ឈើន ចាន់នី មានស្រុកកំណើត នៅភូមិទួលល្វាង ឃុំអូរដំបង ២ ស្រុកសង្កែ ខេត្តបាត់ដំបង ដែលជាអតីតសិស្សរៀនចប់ជំនាញវិចិត្រកម្ម នៅសាលាហ្វារពន្លឺសិល្បៈជំនាន់ទី ៧ បានចូលរៀនឆ្នាំ ២០០៦ និងបានបញ្ចប់ការសិក្សាឆ្នាំ ២០១៣ ហើយលោកក៏ធ្លាប់បានជោគជ័យនៅក្នុងការតាំងស្នាដៃគំនូរខ្លួនដំបូងកាលពីឆ្នាំ ២០១៦ នៅខេត្តសៀមរាប និង បើកសម្ពោធពិព័រណ៍ស្នាដៃគំនូរចំនួន ១៣ ផ្ទាំង ក្រោមចំណងជើងថា «Out of Control» នៅឯវិចិត្រសាលនៃសណ្ឋាគារសូហ្វីតែល កាលពីចុងឆ្នាំ ២០១៩ កន្លងមកផងដែរ។
ដោយចង់សហការទាំងការបង្កើតគម្រោងសា្នដៃសិល្បៈគំនូរខ្លួន និងចង់ចែករំលែកនូវបទពិសោធជំនាញសិល្បៈគំនូរដល់ក្រុមវិចិត្រករជំនាន់ក្រោយមិនមានឱកាសរៀនជំនាញនៅសាលាសិល្បៈផងនោះ ទើបលោក ឈើន ចាន់នី បានចូលជាមួយនឹងក្រុមវិចិត្រករនៅ Open Studio Cambodia ដែលមានវិចិត្រករស្រីចិត្តធម៌ ជាកូនកាត់ជប៉ុន-អាមេរិក កញ្ញា ឡូរ៉េន អ៊ីអិដា ជាសហស្ថាបនិក Open Studio Cambodia។
វិចិត្រករ ឈើន ចាន់នី ដែលរមែងមានការរំលេចពីទេសភាពធម្មជាតិព្រៃព្រឹក្សា ឬតំបន់ភ្នំនៃទីជនបទ និងបង្ហាញពីបញ្ហាសង្គមនានា បានបង្កប់ន័យអប់រំនៅក្នុងផ្ទាំងគំនូររបស់ខ្លួនជារឿយៗ ដោយមានចំណូលចិត្តដើរកម្សាន្តតាមតំបន់ព្រៃភ្នំ មើលសត្វព្រៃ និងស្វែងយល់ពីបញ្ហាសង្គមនានា។
គួររំឭកដែរថា បណ្តុំស្នាដៃគំនូរដែលបានបើកសម្ពោធពិព័រណ៍កាលពីថ្ងៃទី ៥ ខែ សីហា ឆ្នាំ ២០១៩ កន្លងមក នៅវិចិត្រសាលនៃសណ្ឋាគារសូហ្វីតែល នោះលោក ឈើន ចាន់នី បានយកស្នាដៃសិល្បៈគំនូរខ្លួន គឺបានសម្រិតសម្រាំងស្នាដៃចំនួន ១៣ ផ្ទាំង មានទំហំខ្នាត និងតម្លៃខុសគ្នា ខណៈគំនូរដែលមានតម្លៃទាបបំផុតត្រឹម ១ ៦០០ ដុល្លារ និងតម្លៃខ្ពស់បំផុត ៧ ៥០០ ដុល្លារ នោះលក់ដាច់អស់ហើយមកដល់ដើមឆ្នាំ ២០២០ នេះ។
លោក ឈើន ចាន់នី បង្ហើបពីគោលបំណងនៃការសហការជាមួយនឹង Open Studio Cambodia នៅដើមឆ្នាំ ២០២០ នេះថា៖ «ដោយសារបានដឹងថា ក្រុមវិចិត្រករនៅទីនេះ ពួកគាត់មិនមានឱកាស និងពេលវេលាគ្រប់គ្រាន់រៀនជំនាញវិចិត្រកម្មនោះ ទើបខ្ញុំបានជួបពិភាក្សាជាមួយនឹងកញ្ញា Lauren Iida ក្នុងគោលបំណង ២ យ៉ាង។ ទី១ ខ្ញុំកំពុងតែមានគម្រោងបង្កើតស្នាដៃសិល្បៈក្រៅម៉ោងមួយនឹងត្រូវយកទៅដាក់បង្ហាញនៅក្រៅប្រទេសនាពេលឆាប់នេះ។
មួយទៀតគឺខ្ញុំចង់ឆ្លៀតឱកាសខ្លះចូលរួមចែករំលែកបទពិសោធផ្ទាល់ខ្លួនក្នុងការងារបង្កើតស្នាដៃគំនូរជាមួយក្រុមវិចិត្រករនៅ Open Studio Cambodia ដោយសារពួកគាត់ ភាគច្រើនគឺមិនបានឆ្លងកាត់ការរៀនជំនាញសិល្បៈនៅតាមសាលាឡើយ»៕