.jpg)
លោក ឈើន ចាន់នី វិចិត្រករដែលមានស្រុកកំណើតនៅខេត្តបាត់ដំបង និងស្នាដៃគំនូរ។ រូបថត ហ្វេសប៊ុក
ភ្នំពេញៈ វេលាល្ងាចថ្ងៃនេះ វិចិត្រករ កំលោះ ឈើន ចាន់នី ដែលមានស្រុកកំណើតដូចគ្នាទៅនឹងអតីតកវីនិពន្ធចម្រៀងនៃម្ចាស់ដងស្ទឹងសង្កែដ៏ល្បីគឺលោក គង្គ ប៊ុនឈឿន ដែរនោះនឹងបើកសម្ពោធពិព័រណ៍ស្នាដៃគំនូររបស់ខ្លួនចំនួន ១៣ ផ្ទាំងក្រោមចំណងជើងថា «Out of Control» ដោយចាប់ពីម៉ោង ៦ ល្ងាចទៅនៅវិចិត្រសាលនៃសណ្ឋាគារសូហ្វីតែល ភ្នំពេញ-ភូគីត្រា។
វិចិត្រករលោក ឈើន ចាន់នី មានស្រុកកំណើតនៅក្នុងភូមិទួលល្វាង ឃុំអូរដំបង ២ ស្រុកសង្កែ ខេត្តបាត់ដំបងដែលជាអតីតសិស្សរៀនចប់នូវជំនាញវិចិត្រកម្មនៅសាលាហ្វារពន្លឺសិល្បៈជំនាន់ទី ៧ បានចូលរៀនឆ្នាំ ២០០៦ និងបានបញ្ចប់ការសិក្សាឆ្នាំ ២០១៣ ហើយលោកក៏ធ្លាប់បានជោគជ័យនៅក្នុងការតាំងស្នាដៃគំនូរខ្លួនដំបូងកាលពីឆ្នាំ ២០១៦ នៅឯខេត្តសៀមរាបផងដែរ។
ដោយសារមានចំណូលចិត្តដើរកម្សាន្តតាមតំបន់ព្រៃភ្នំ មើលសត្វព្រៃ និងស្វែងយល់ពីបញ្ហាសង្គមទើបសង្កេតឃើញរាល់ការរំលេចចេញស្នាដៃគំនូររបស់វិចិត្រករ ឈើន ចាន់នី រមែងមានរំលេចពីទេសភាពធម្មជាតិព្រៃព្រឹក្សា ឬតំបន់ភ្នំនៃទីជនបទ និងបង្ហាញពីបញ្ហាសង្គមនានាដែលបានបង្កប់ន័យអប់រំនៅក្នុងផ្ទាំងគំនូររបស់ខ្លួនជារឿយៗផងដែរ។
គំនូរបង្ហាញពីជីវចម្រុះនៃសត្វស្លាបក្នុងប្រទេសកម្ពុជារបស់វិចិត្រករ ឈើន ចាន់នី ។ រូបថត សហការី
វិចិត្រករ ចាន់នី បានបញ្ជាក់ថា៖ «កាលពីដើមឡើយ ខ្ញុំមិនសូវបានចាប់អារម្មណ៍បញ្ហាសង្គមប៉ុន្មាននោះទេ តែចាប់តាំងពីខ្ញុំបានចូលរៀនផ្នែកគំនូរមក ខ្ញុំក៏ចាប់ផ្តើមប្រែប្រួលដោយសារសង្កេតឃើញថាខ្លួនឯងចេះមានការតាមដាន និងស្វែងយល់ពីបញ្ហាសង្គម និងបញ្ហាសត្វព្រៃ ព្រៃព្រឹក្សា ឬបរិស្ថានច្រើនជាងមុន។ ជាក់ស្តែងសម្រាប់ស្នាដៃគំនូរទាំង ១៣ ផ្ទាំងដែលនឹងត្រូវយកទៅដាក់តាំងនេះគឺសុទ្ធតែបានបង្កប់ន័យអប់រំពីបញ្ហាសង្គមនានាដូចជាបញ្ហាញៀនស្រា ញៀនបារី និងបញ្ហាបរិស្ថានដែលកំពុងតែប្រឈមដូចជាពូជសត្វទាំងឡាយក្នុងប្រទេសកម្ពុជាកាន់តែបាត់បង់ពូជស្ទើរអស់ ហើយសព្វថ្ងៃនេះក្មេងៗជំនាន់ក្រោយភាគច្រើនក៏លែងស្គាល់ប្រភេទសត្វទាំងនោះទៀតផង។ អ៊ីចឹងហើយបានជាស្នាដៃគំនូរខ្ញុំ តែងពណ៌នាពីសត្វនោះ និងបានរៀបរាប់ពីឈ្មោះសត្វទៀតដោយសារតែចង់ណែនាំឲ្យអ្នកទស្សនា ឬក្មេងជំនាន់ក្រោយអាចស្គាល់ឈ្មោះពពួកសត្វទាំងឡាយនោះឡើងវិញ»។
បណ្តុំស្នាដៃគំនូរដែលត្រូវបើកសម្ពោធពិព័រណ៍នាល្ងាចថ្ងៃទី ៥ ខែសីហា ឆ្នាំ ២០១៩ នៅឯវិចិត្រសាលនៃសណ្ឋាគារសូហ្វីតែលនោះលោក ឈើន ចាន់នី នឹងយកស្នាដៃសិល្បៈគំនូររបស់ខ្លួនគឺបានសម្រិតសម្រាំងចំនួន ១៣ ផ្ទាំងដែលមានទំហំខ្នាត និងតម្លៃខុសគ្នា ខណៈគំនូរដែលមានតម្លៃទាបបំផុតត្រឹម ១៦០០ ដុល្លារ និងតម្លៃខ្ពស់ថ្លៃបំផុត ៧៥០០ ដុល្លារ។
គំនូរបញ្ហាពីសង្គមដែលមនុស្ស និងសត្វកំពុងតែប្រឈមនៅក្នុងជីវិតប្រចាំថ្ងៃ។ រូបថត សហការី
លោក ឈើន ចាននី បានបង្ហើបប្រាប់ថា៖ «តាមពិតទៅគេចង់ឲ្យខ្ញុំបង្កើតសា្នដៃគំនូរចំនួន ១៥ ផ្ទាំងដើម្បីដាក់តាំងលើកនេះ តែខ្ញុំធ្វើមិនទាន់ ដូច្នេះមានតែ ១៣ ផ្ទាំង ប៉ុណ្ណោះសម្រាប់ដាក់តាំងលើកនេះដែលមានរយៈពេលដល់ទៅ ៣ ខែឯណោះគឺចាប់ពីថ្ងៃទី ៥ ខែសីហានេះតទៅ។ ចំពោះតម្លៃផ្ទាំងគំនូររបស់ខ្ញុំគឺមានតម្លៃខុសៗគ្នា គឺអាស្រ័យតាមទំហំនិមួយៗ ខណៈតម្លៃចន្លោះពី ១៦០០ ដុល្លារ ដល់ ៧៥០០ ដុល្លារ»។
គួររំឭកដែរថា ខណៈកាលពីចូលរៀនដំបូងលោក ឈើន ចាន់នី ត្រូវឪពុកជំរុញឲ្យរៀនផ្នែកភ្លេងខ្មែរ ដោយសារតែឪពុកលោកគឺជាតន្ត្រីករភ្លេងខ្មែរស្រាប់ ហើយចង់ឲ្យកូនរៀនជំនាញនេះបន្តពីគាត់។ តែនិស្ស័យចូលចិត្តតែស្តាប់ភ្លេងខ្មែរប៉ុណ្ណោះ មិនចូលចិត្តលេងឧបករណ៍នេះឡើយគឺលោកមានការចូលចិត្តផ្នែកគូររូបតាំងពីក្មេងមក ដូច្នេះក៏សម្រេចចាប់ការសិក្សាតាមចំណូលខ្លួនវិញអត់តាមគន្លងឪពុកឡើយ។
វិចិត្រករវ័យ ៣១ ឆ្នាំដែលមានបងប្អូនបង្កើត ៥ នាក់ ខណៈលោកគឺជាកូនច្បងនៅក្នុងគ្រួសារ តែចូលចិត្តសិល្បៈគំនូរមានតែខ្លួនប៉ុណ្ណោះបានរៀបរាប់រំឭកពីប្រវត្តិការសិក្សាខ្លួនដែរថា៖ «កាលដំបូងខ្ញុំបានចូលផ្នែកភ្លេងខ្មែរ តាមការណែនាំពីឪពុកគឺជំនាញភ្លេងខ្មែរ។ តែខ្ញុំចូលរៀនបានតែ ១ អាទិត្យប៉ុណ្ណោះក៏គេចម៉ោងរៀនលើជំនាញនេះតែម្តង ព្រោះដឹងថាខ្លួនឯងគឺពិតជាមិនអាចបន្ត និងបានចាប់យកជំនាញភ្លេងខ្មែរតាមបំណងឪពុកបានទេ ហើយក៏សុំគាត់មករៀនជំនាញដែលខ្លួនបានស្រឡាញ់តាំងពីក្មេងមកវិញគឺផ្នែកគូរគំនូរនេះ»៕
