.jpg)
សិល្បករផ្នែកសិល្បៈគំនូរសហសម័យ និងច្នៃប្រឌិត លោក ហេង ភូន បានចូលរៀនជំនាញផ្នែក 3D Printing Design នៅអង្គការសិល្បៈខ្មែរអមតៈ។ សហការី
ភ្នំពេញ៖ ជាសិល្បករមានពិការភាពមួយរូបលោក ហេង ភូន ជាសិល្បករផ្នែកសិល្បៈគំនូរសហសម័យ និងច្នៃប្រឌិតមានសេចក្ដីក្លាហានក្នុងការដាក់ពាក្យស្នើសុំអាហារូបករណ៍ ដើម្បីរៀនជំនាញផ្នែក 3D Printing Design នៅអង្គការសិល្បៈខ្មែរអមតៈ ដែលជាអង្គការមានអាយុកាលដ៏ចំណាស់ធ្វើកិច្ចការលើកកម្ពស់វិស័យសិល្បៈនៅកម្ពុជា។
កម្មវិធីអាហារូបករណ៍អង្គការសិល្បៈខ្មែរអមតៈ ជួយដល់សិស្សានុសិស្ស ឬនិស្សិត អភិវឌ្ឍជំនាញភាពជាអ្នកដឹកនាំ ការគ្រប់គ្រងហិរញ្ញវត្ថុ ការរៀបចំផែនការអាជីពការងារ និងផ្តល់ជូនកញ្ចប់ថវិកា ដើម្បីចំណាយលើថ្លៃចូលរួមវគ្គបណ្តុះបណ្តាល និងចំណាយផ្សេងៗទៀតផង ដែលមានរយៈពេលតិច ឬច្រើនឆ្នាំអាស្រ័យទៅលើការស្នើសុំលើមុខជំនាញរបស់បេក្ខជនតាមជំនាញ។
បេក្ខជនអាទិភាពជាស្ត្រី ជនពិការ ជនជាតិភាគតិច ឬអ្នកមកពីសហគមន៍សំឡេងតិចនឹងត្រូវបានលើកទឹកចិត្តឲ្យដាក់ស្នើសុំអាហារូបករណ៍សិល្បៈ អមតៈអាន ចនផន ឆ្នាំ ២០២១ ដើម្បីបន្តអាជីពការងាររបស់ខ្លួននៅក្នុងវិស័យសិល្បៈ។
សិល្បករ ហេង ភូន ក៏លើកទឹកចិត្តទៅដល់អ្នករាល់គ្នា ដែលត្រូវការឱកាសដ៏ល្អនេះឱ្យមានភាពក្លាហាន និងមានទំនុកចិត្តលើខ្លួនឯងក្នុងការដាក់ពាក្យស្នើសុំអាហារូបករណ៍ ដើម្បីឈានទៅរកគោលដៅរបស់ខ្លួន។
ជាពិសេសលោក ភូន សូមលើកទឹកចិត្តដល់អ្នក ដែលមានពិការរភាព កុំមានការខ្មាសអៀន និងភ័យខ្លាច ត្រូវតែហ៊ានដាក់ពាក្យស្នើសុំ ដើម្បីឈានទៅរកគោលដៅពិតប្រាកដ។
ពិការភាពមិនមែនជាឧបសគ្គរបស់យុវជនវ័យ ២៥ ឆ្នាំក្នុងការស្វែងរកក្ដីស្រមៃលើវិថីសិល្បៈគំនូរឡើយ។ សហការី
វិចិត្រករ ហេង ភូន បានលើកឡើងថា៖ «នៅក្នុងរយៈពេល ១ ឆ្នាំ ដែលខ្ញុំទទួលបានអាហាររូបករណ៍នេះខ្ញុំមានការអភិវឌ្ឍខ្លួនឯងល្អ ជាងមុនច្រើនណាស់ ដូចជាជំនាញរបស់ខ្ញុំ ចំណេះដឹង ការអប់រំ និងសុជីវធម៌ ជាដើម ដោយសារតែខ្ញុំទទួលបានវគ្គបណ្តុះបណ្តាល មានគុណតម្លៃបន្ថែមពីអាហារូបករណ៍សិល្បៈខ្មែរអមតៈ អានចនផន»។
ការទទួលពាក្យស្នើសុំអាហារូបករណ៍សិល្បៈ អមតៈ អាន ចនផន ឆ្នាំ ២០២១ ចាប់ទទួលពាក្យហើយសម្រាប់សិល្បករ សិស្ស ឬនិស្សិតសិល្បៈ និងអ្នកបម្រើការក្នុងវិស័យសិល្បៈ។
សូមកុំខកខានឱកាសទទួលបានអាហារូបករណ៍នេះ ដើម្បីពង្រឹងសមត្ថភាពរបស់ខ្លួនទាំងក្នុង និងក្រៅជំនាញសិល្បៈ។
សូមទាក់ទងមកកាន់ក្រុមការងាររបស់អង្គការសិល្បៈខ្មែរអមតៈ តាមរយៈលេខទូរស័ព្ទ 010 941 224 ពីថ្ងៃចន្ទ-សុក្រ (៨ ព្រឹក ៥.៣០ ល្ងាច) ខណៈព័ត៌មាន និងពាក្យស្នើសុំ ដែលបានបំពេញរួចរាល់នោះ សូមផ្ញើទៅកាន់ sormanak@cambodianlivingarts.org ឬយកពាក្យនៅឯការិយាល័យអង្គការសិល្បៈខ្មែរអមតៈ ឬទាញយកពាក្យស្នើសុំតាមរយៈ https://www.cambodianlivingarts.org/.../scholarship... ។
ការផ្តល់ការឧបត្ថម្ភថវិកាដល់សិស្សសម្រេចផ្តល់ជូនជាកញ្ចប់ធំតម្លៃ ១២០០ ដុល្លារ សម្រាប់សិស្សជាប់អាហារូបករណ៍សិល្បៈអតមៈ អាន ចនផន នៅឆ្នាំ ២០២១ នេះ។
ចំពោះការផ្តល់ជូនវិញអាចមានតិចឆ្នាំ ឬច្រើនឆ្នាំអាស្រ័យការស្នើសុំរបស់បេក្ខជនគឺអាចមានរយៈពេល ១ ឆ្នាំ ឬ ២ ឆ្នាំ ឬអាចសម្រាប់ការសិក្សាជាកម្រិតបរិញ្ញបត្រ (៤ ឆ្នាំ) ក៏មាន។
ចំណែកឯបេក្ខជនដាក់ពាក្យរួចនោះខាងអង្គការសិល្បៈខ្មែរអមតៈនឹងមានក្រុមគណៈកម្មការវាយតម្លៃ ដើម្បីធ្វើការជម្រុះ និងចម្រាញ់យកសិស្សអាហារូបករណ៍មាន ៣ ដំណាក់កាលផងដែរ ទើបឈានដល់ការសម្រេចចុងក្រោយចំនួន ១០ នាក់៕
