.jpg)
ស្នាដៃរបស់សិល្បការិនី សៅ ស្រីម៉ៅ កាលពីឆ្នាំ ២០១៨ ស្តីពីកោះផ្តៅអតីតកាល និងអនាគត។ រូបថត គម្រោងសិល្បៈស-ស
ភ្នំពេញ៖ ថ្នាក់សិក្សាសិល្បៈសហសម័យ និងថ្នាក់សិល្បៈថតរូបបែបឯកសារ និងសហសម័យនៃគម្រោងសិល្បៈស-ស រៀបចំឡើងជាពិសេស សម្រាប់និស្សិតកំពុងសិក្សា ឬទើបបញ្ចប់ការសិក្សាពីមហាវិទ្យាល័យនានា ដែលមានទេពកោសល្យ និងក្តីស្រឡាញ់ផ្នែកសិល្បៈ។
បើយោងតាមសេចក្តីជូនដំណឹងពីគេហទំព័ររបស់គម្រោងវិចិត្រសាលស-ស បានឲ្យដឹងតាមសេចក្តីប្រកាសផ្តល់អាហារូបករណ៍នេះថា៖ « ឆ្នាំសិក្សាថ្មីរបស់ថ្នាក់សិល្បៈសហសម័យ ព្រមទាំងថ្នាក់សិល្បៈរូបថតបែបឯកសារ និងសហសម័យ បានចាប់ផ្តើមបើកហើយសម្រាប់អ្នកចង់ស្វែងរក និងអភិវឌ្ឍភាសាសិល្បៈឲ្យកាន់តែរីកចម្រើន និងចង់ក្លាយជាសិល្បករនោះ។ សម្រាប់ថ្នាក់ទាំង ២ នេះ សម្របសម្រួលដោយសហស្ថាបនិកនៃគម្រោងសិល្បៈស-ស គឺសិល្បករ ខ្វៃ សំណាង និង លឹម សុខចាន់លីណា ហើយមានគោលដៅជួយជំរុញភាពច្នៃប្រឌិតទៅលើការអភិវឌ្ឍគំនិត និងបង្កើតស្នាដៃសិល្បៈទស្សន៍ថ្មី (Visual Art)»។
ដោយឡែកការសិក្សានេះ សិស្សទាំងអស់មានការរួមពិភាក្សា អំពីទិដ្ឋភាពនានានៃសិល្បៈ ប្រវត្តិសាស្រ្ត ទស្សនវិជ្ជា នរវិទ្យា បរិស្ថាន និងសង្គមជាដើម។ល។
ក្រុមសិល្បករនាពេលធ្វើបទបង្ហាញពីស្នាដៃខ្លួន នៅឯវិចិត្រសាលនៃគម្រោងសិល្បៈស-ស។ រូបថត គម្រោងសិល្បៈស-ស
តាមប្រភពដំណឹងដដែលបានបន្តថា៖ «លើសពីនេះ យើងនឹងមានការជួបជាមួយវាគ្មិនជំនាញថ្នាក់ជាតិ និងអន្តរជាតិ ព្រមទាំងមានទស្សនកិច្ចសិក្សាទៅកាន់វិចិត្រសាលសិល្បៈ និងស្ទូឌីយោរបស់ក្រុមសិល្បករនានានៅភ្នំពេញផងដែរ។ សិស្ស និស្សិតម្នាក់ៗ នឹងមានឱកាសបង្កើតស្នាដៃសិល្បៈថ្មីៗ សម្រាប់ដាក់តាំងពិព័រណ៍ជាក្រុម នាចុងបញ្ចប់វគ្គនេះ។ ខណៈឯកសារទាំងឡាយ ដែលសិស្ស និស្សិត តម្រូវភ្ជាប់មកជាមួយ រួមមានប្រវត្តិរូបសង្ខេប រូបភាពស្នាដៃសិល្បៈកន្លងមក និងអត្ថបទមួយទំព័រស្តីពីចំណាប់អារម្មណ៍ស្នើសុំចូលរៀន និងផែនការបង្កើតគម្រោងស្នាដៃថ្មី។ ការបង្រៀនដោយសិល្បករ ខ្វៃ សំណាង និង លីម សុខចាន់លីណា រយៈពេល ១២ សប្តាហ៍ ចាប់តាំងពីខែកញ្ញា ដល់ខែវិច្ឆិកា ឆ្នាំ ២០២០។ កាលវិភាគសិក្សា ថ្នាក់សិល្បៈសហសម័យ រៀងរាល់ថ្ងៃសៅរ៍ ពីថ្ងៃទី ៥ កញ្ញា ឆ្នាំ ២០២០ និងថ្នាក់សិល្បៈរូបថតបែបសហសម័យ និងឯកសារ រាល់ថ្ងៃអាទិត្យចាប់ពីថ្ងៃទី ៦ ខែ កញ្ញា ឆ្នាំ ២០២០»។
គម្រោងសិល្បៈស-ស មានអាសយដ្ឋាននៅផ្ទះលេខ ៤៧ ផ្លូវលេខ ៣៥០ (កែងផ្លូវលេខ ៩៥) នៅជិតសារមន្ទីរទួលស្លែង។ ការដាក់ពាក្យផ្ញើទៅកាន់ lyna@sasaart.info និងឈប់ទទួលពាក្យនៅថ្ងៃទី ២៣ ខែ សីហា ឆ្នាំ ២០២០ ឬអាចទាក់ទងតាមរយៈទូរស័ព្ទលេខ ០៩២ ៩៦១ ៩៧៤ / ០១០ ៨៩១ ៤៧០៕
