.jpg)
អ្នកចូលរួមគ្រាន់តែរៀបចំស្ទីលថតរូបទៅតាមគំនូរ ដែលខ្លួនស្រឡាញ់ រួចបង្ហោះរូបថតជាមួយ #sraartchallenge។ រូបថត សហការី
ភ្នំពេញ៖ មិនខុសពីអាជីវកម្មដទៃដែលត្រូវផ្អាកដំណើរការ វិចិត្រសាល «ស្រាអាត» កំពុងព្យាយាមរិះរកវិធីសាស្ត្រផ្សេងៗ ដើម្បីផ្តល់សេវាកម្ម ទស្សនីយភាព និងភាពសប្បាយរីករាយ ជាការរក្សាទំនាក់ទំនងជាមួយអតិថិជន និងបណ្ដាអ្នកស្នេហាសិល្បៈ។
វិចិត្រសាលនេះបានបង្កើតសកម្មភាពដូចជា វីដេអូនិយាយពីសិល្បៈគំនូររបស់វិចិត្រករច្រើនរូប ការបង្ហោះរូបគំនូរ និងអត្ថន័យរបស់វា ក៏ដូចជា កម្មវិធីប្រកួតប្រជែងផ្សេងៗ ដើម្បីឲ្យអ្នកស្រឡាញ់សិល្បៈអាចចូលរួមបាននៅតាមផ្ទះ។
សកម្មភាពនេះ ជាស្ពានសម្រាប់ឲ្យអ្នកចូលចិត្តគំនូរអាចផ្សារភ្ជាប់ទំនាក់ទំនងជាមួយសិល្បករ ស្វែងយល់ពីបទពិសោធ បច្ចេកទេសគូររូប និងគម្រោងថ្មីៗ ដែលនឹងត្រៀមចេញពីបណ្ដាសិល្បករទាំងនោះ។
ស្រាអាត ឆាលេង (#sraartchallenge) គឺជាការប្រកួតប្រជែងលើការប្រើប្រាស់វត្ថុផ្សេងៗ ជាមួយនឹងក្តីស្រមើស្រមៃរបស់អ្នក ដើម្បីធ្វើត្រាប់តាមរូបគំនូរណាមួយ ដែលអ្នកស្រឡាញ់ពេញចិត្ត។
អ្នកនាង Cecile Eap ស្ត្រីខ្មែរ-បារាំង ជាស្ថាបនិកវិចិត្រសាលបានឲ្យដឹងថា៖ «នៅពេលការចេញទៅធ្វើទស្សនកិច្ចនៅវិចិត្រសាលដោយផ្ទាល់ មិនត្រូវបានអនុញ្ញាតដូចកន្លងមក យើងបានបង្កើតការប្រកួតប្រជែងនេះឡើង សម្រាប់អ្នកដែលស្រឡាញ់សិល្បៈ ទាំងឡាយដែលមានគំនិតច្នៃប្រឌិតខ្ពស់ ព្រោះការប្រកួតនេះជាគំនិតច្នៃប្រឌិតថ្មី របស់បុគ្គលនីមួយៗនៅតាមផ្ទះ»។
អ្នកចូលរួមគ្រាន់តែរៀបចំស្ទីលថតរូបទៅតាមគំនូរ ដែលខ្លួនស្រឡាញ់ រួចបង្ហោះរូបថតជាមួយ #sraartchallenge។ រូបថត សហការី
ជាមួយក្តីស្រឡាញ់យ៉ាងជ្រាលជ្រៅ លើវិស័យសិល្បៈ នាងបានប្រាប់ថា នាងព្យាយាមរិះរកសកម្មភាពថ្មីៗ ដើម្បីផ្សារភ្ជាប់ទំនាក់ទំនងជាមួយអ្នកទស្សនិកជន នៅពេលដែលវិចិត្រសាលកំពុងបិទ។
ស្រាអាត ឆាលេង គឺកម្មវិធីមានទម្រង់ដូចទៅនឹងសកម្មភាពផ្ដួចផ្តើមដោយសារមន្ទីរ Getty ជាកន្លែងប្រមូលផ្តុំស្នាដៃសិល្បៈ និងការស្រាវជ្រាវរបស់ J. Paul Getty Trust។
អ្នកនាងបានរៀបរាប់ថា៖ «ដើម្បីចូលរួមការប្រកួតនេះ លោកអ្នកគ្រាន់តែចូលទៅកាន់ផេករបស់ស្រាអាត រួចជ្រើសរើសរូបគំនូរពីស្នាដៃវិចិត្រករណាមួយ ហើយចូរស្រមើស្រមៃ និងធ្វើត្រាប់តាម រូបគំនូរនោះ បន្ទាប់មកថតរូបនោះភ្ជាប់ជាមួយរូបដើមរួចផ្ញើមកកាន់ពួកយើង ឬអាចផុសនៅលើផេករបស់ស្រាអាត ដោយគ្រាន់តែវាយ #sraartchallenge ជាការស្រេច»។
អ្នកចូលរួមគ្រាន់តែរៀបចំស្ទីលថតរូបទៅតាមគំនូរ ដែលខ្លួនស្រឡាញ់ រួចបង្ហោះរូបថតជាមួយ #sraartchallenge។ រូបថត សហការី
ការប្រកួតប្រជែងនេះនឹងបញ្ចប់នៅចុងខែឧសភា រូបភាពដែលមានប្រជាប្រិយភាពជាងគេ ចំនួន ៣ នឹងទទួលបានរង្វាន់ Sip and Paint មានតម្លៃប្រហែល ២៥ ដុល្លារ នៅ ស្រាអាត រួមជាមួយនឹងរង្វាន់ផ្សេងៗជាច្រើនទៀតដូចជា ផ្ទាំងគំនូរក្រណាត់ រូបគំនូរ ស្រា និងសម្ភារផ្សេងទៀតពីនិស្សិតមកពីសាកលវិទ្យាល័យភូមិន្ទវិចិត្រសិល្បៈ។
អ្នកនាង Cecile បានឲ្យដឹងទៀតថា ការប្រកួតប្រជែងនេះទើបតែចាប់ផ្តើម តែមានអ្នកចូលរួមច្រើន ព្រមទាំងមានរូបថតជាច្រើន ត្រូវបានថត រួចបង្ហោះនៅលើហ្វេសប៊ុកផេករបស់ស្រាអាតកាលពីពេលថ្មីៗនេះ។
វិចិត្រសាលដែលសម្ពោធដំណើរការកាលពីខែតុលា ឆ្នាំ ២០១៩ នេះ ក៏មានគម្រោងនឹងបើកដំណើរការសាជាថ្មីនៅថ្ងៃសៅរ៍ទី ៩ ខែឧសភា ស្អែកនេះ ប្រសិនបើមិនមានករណីឆ្លងថ្មីនៃជំងឺកូវីដ ១៩។
ការបើកដំណើរការវិចិត្រសាលឡើងវិញ នឹងរៀបចំឡើងដោយវិចិត្រករចំណានៗជាច្រើនរូបដោយមានការច្នៃប្រឌិតថ្មីៗផងដែរ ជាមួយនឹងការរៀបចំកម្មវិធីដាក់តាំងបង្ហាញ គំនូរ និងការគូរគំនូរដោយផ្ទាល់ នៅលើកែវកាហ្វេ ដបទឹក ស្បែកជើង ប្រអប់ដាក់វ៉ែនតា សម្បកទូរស័ព្ទ ជាដើម ។
ការប្រកួតថតត្រាប់តាមគំនូរនឹងបញ្ចប់នៅចុងខែឧសភាខាងមុខនេះ។ រូបថត សហការី
ស្ថាបនិកដែលមានឆន្ទៈផ្ដល់ឱកាសឲ្យសិល្បករខ្មែរបញ្ចេញស្នាដៃនៅវិចិត្រសាលសហសម័យរូបនេះ ក៏បានបង្ហាញគោលជំហរទៅថ្ងៃមុខថា៖ «បច្ចុប្បន្ន យើងគ្រាន់តែជាវិចិត្រសាលមួយក្នុងរាជធានីភ្នំពេញប៉ុណ្ណោះ យើងសង្ឃឹមថា យើងអាចក្លាយជាផ្នែកមួយនៃការអភិវឌ្ឍសិល្បៈកម្ពុជា និងជំរុញឲ្យមនុស្សគ្រប់គ្នាកាន់តែស្គាល់ច្បាស់អំពីវប្បធម៌ដ៏អស្ចារ្យរបស់ខ្មែរ ដែលកំពុងត្រឡប់មកមានពន្លឺ បន្ទាប់ពីត្រូវបានបំផ្លាញចោលនាអតីតកាល។ យើងក៏រំពឹងថា សកម្មភាពរបស់យើងនឹងផ្លាស់ប្តូរគំនិត និងជួយឲ្យប្រជាជនជួយថែរក្សាវប្បធម៌ក៏ដូចជាបេតិកភ័ណ្ឌជាតិផងដែរ»។
ស្រាអាត មានទីតាំងនៅជិតសារមន្ទីរជាតិ និងព្រះបរមរាជវាំង នៅលើបណ្តោយវិថីសុធារស។ សម្រាប់ព័ត៌មានលម្អិតសូមចូលទៅកាន់ហ្វេសប៊ុកផេក @sraartstudio ឬអ៊ីនស្តាក្រាម @sraart_studio ឬចូលទៅកាន់ វេបសាយwww.sraarstudios.com ឬខលទៅកាន់លេខ ០៨១ ៤៦១ ៧១១៕
