ភ្នំពេញ៖ ដោយសារវត្តមាននៃការរីករាលដាលរបស់ជំងឺឆ្លងថ្មីមានឈ្មោះកូវីដ ១៩ នោះទើបបានជាកម្មវិធីបាឋកថា ក្រោមប្រធានបទថា «ស្វែងយល់ពីលក្ខណៈបុគ្គលការណ៍ និងលក្ខណៈសង្គមការណ៍នៅក្នុងស្នាដៃអក្សរសិល្ប៍ និងភាពយន្តរឿងរាជិនីភូមិគ្រឹះ» សម្រាប់ប្រចាំខែមីនា ត្រូវបានលើកពេលពន្យាររហូតមកដល់ថ្ងៃទី ២២ ខែ មេសា ឆ្នាំ ២០២០ ដែលប្តូរមកធ្វើតាមអនឡាញនៅអគារ ថ្មីជាប់សួនច្បារសម្តេច ហ៊ុន សែន ក្នុងសង្កាត់ទន្លេបាសាក់ ខណ្ឌចំការមន ភ្នំពេញ។
ខណៈបាឋកថាប្រចាំខែមីនា ឆ្នាំ ២០២០ ដែលត្រូវប្តូរមករៀបចំនៅថ្ងៃទី ២២ ខែ មេសា ឆ្នាំ ២០២០ តាមអនឡាញវិញ ដោយសារតែវិបត្តិកូវីដ ១៩ រៀបចំដោយវិទ្យាស្ថានពុទ្ធសាសនបណ្ឌិត្យ ខណៈវាគ្មិនជាអ្នកនិពន្ធកុនភាគរឿង «រាជិនីភូមិគ្រឹះ» ដែលទើបតែចាក់បញ្ចាំងចប់នៅប៉ុស្តិ៍ទូរទស្សន៍រស្មីហង្សមាស គឺលោកសាស្រ្តាចារ្យ យូ សុភា ដោយចាប់ពីម៉ោង ៩ ព្រឹកតទៅ។
បើតាមលោក ស សុខនី ប្រធានពុទ្ធសាសនបណ្ឌិត្យបង្ហើបប្រាប់ពីគោលបំណងសំខាន់ៗនៃការរៀបចំបាឋកថានេះផងដែរថា៖ «តាមពិតទៅបាឋកថានេះជាការធ្វើប្រចាំខែមីនា ខណៈ ខាងវិទ្យាស្ថានពុទ្ធសាសនបណ្ឌិត្យតែងតែរៀបចំរាល់ខែ តាមប្រធានបទផ្សេងៗគ្នា ដែលពាក់ព័ន្ធនឹងការស្រាវជ្រាវរឿងវប្បធម៌នានារួមមានដូចជា អក្សរសាស្រ្ត អក្សរសិល្ប៍ ប្រវត្តិសាស្រ្ត និងបុរាណវិទ្យាជាដើម ហើយប្រធានបទខែមីនា យើងគឺនិយាយពីការស្វែងយល់ពីលក្ខណៈ បុគ្គលការណ៍ និងលក្ខណៈសង្គមការណ៍ក្នុងស្នាដៃអក្សរសិល្ប៍ និងភាពយន្តរឿង «រាជិនីភូមិគ្រឹះ» ដែលជាស្នាដៃរបស់អ្នកនិពន្ធលោក យូ សុភា»។
ប្រធានពុទ្ធសាសនបណ្ឌិត្យលោក ស សុខនី បានបន្តថា៖ «គោលបំណងសំខាន់របស់យើងនៃការរៀបចំបាឋកថានេះ គឺចង់បង្ហាញអំពីតួនាទីនៃពុទ្ធសាសនបណ្ឌិត្យនៅក្នុងការលើកស្ទួយវិស័យអក្សរសាស្រ្តខ្មែរតាំងដើមមក។
ម្យ៉ាងទៀត យើងក៏ចង់រំឭកពីការជិតមកដល់នៃការប្រកួតប្រជែងពានរង្វាន់អក្សរសិល្ប៍នៃពុទ្ធសាសនបណ្ឌិត្យលើកទី ៣ ដែលកាន់តែខិតចូលមកដល់ហើយគឺនៅចុងខែឧសភា ឆ្នាំ ២០២០ ខាងមុខ ដែលនេះជាសារមួយ សម្រាប់អ្នកនិពន្ធទាំងផ្នែកកំណាព្យ និងរឿងខ្លី អាចរួសរាន់ដាក់ពាក្យ និងស្នាដៃខ្លួនចូលមកប្រកួត។
ចង់ឲ្យមហាជនដែលបានទស្សនាភាពយន្តភាគរឿង «រាជិនីភូមិគ្រឹះ» ដែលបានចាក់បញ្ចាំងចប់នៅឯទូរទស្សន៍ហង្សមាសនោះ គឺប្រិយមិត្តដែលមានចម្ងល់ផ្សេងៗ អាចចោទសួរផ្ទាល់ជាមួយនឹងអ្នកនិពន្ធលោក យូ សុភា តែម្តងនៅព្រឹកថ្ងៃពុធ ទី ២២ ខែ មេសា ឆ្នាំ ២០២០ ខាងមុខនេះ ខណៈយើងបានរៀបចំធ្វើតាមអនឡាញ។
គួររំឭកដែរថា លោក យូ សុភា ក្លាយជាអ្នកនិពន្ធរឿងប្រលោមលោកនៅក្នុងឆ្នាំ ២០០០ ដោយស្នាដៃល្បីៗរួមមានរឿង «កញ្ញាម្ទេសខ្មាំង» រឿង «រាជកញ្ញា» រឿង«បើបេះដូងជាប់ឈាម» រឿង «បងជាស្វាមីក្រៅបេះដូង» រឿង «ជាកំណប់ស្នេហ៍អូនថែជូនបង» រឿង «សច្ចៈសីលគុណ» រឿង «កុំផ្តាច់និស្ស័យកុំប្រល័យស្នេហ៍បង» រឿង «ទុកបរិញ្ញាបត្រឲ្យមេឃមើល» រឿង «ស្ពានកោះពេជ្រផ្តាច់ស្នេហ៍» រឿង «ព្រលឹងខ្មោចស្រីបំបែកក្តីឃាតកម្ម» រឿង «ស្អប់អូនចុះបើបងដឹង» រឿង «រាជិនីភូមិគ្រឹះ» និងរឿងខ្លីៗជាច្រើន ចុះផ្សាយតាមទស្សនាវដ្ដីនានា ហើយលោកក៏ត្រូវបានគេស្គាល់ថា ជាអ្នកនិពន្ធដែលទទួលបានពានរង្វាន់ច្រើនជាងគេដែលទទួលបានជាង ១០ លើកឯណោះក្នុងប្រទេស កម្ពុជា៕