ក្រុងញូវដែលី៖ កសិករនៅកាស្មៀរ សុខចិត្ដទុកឲ្យផ្លែប៉ោមរបស់ខ្លួនស្អុយរលួយចោល ដែលធ្វើឲ្យខូចនូវផលិតផលនាំចេញដ៏មានតម្លៃបំផុត ដោយសារពួកគេមានការខឹងសម្បានឹងរដ្ឋាភិបាលឥណ្ឌា។
ក្រុងញូវដែលី បានដាក់ពង្រាយកងទ័ពរាប់ម៉ឺននាក់បន្ថែមតាំងពីដើមខែសីហា ពេលមានជម្លោះក្នុងដែនដីស្វយ័តដ៏តូចមួយនេះ ហើយវាធ្វើឲ្យកាត់ផ្ដាច់ទំនាក់ទំនងរវាងកាស្មៀរ និងពិភពលោក។ មេដឹកនាំនយោបាយ និងជនស៊ីវិលរាប់ពាន់នាក់ត្រូវបានចាប់ខ្លួនជាមួយការចោទអំពើទារុណកម្ម និងរំលោភបំពានសំដៅលើអាជ្ញាធរមូលដ្ឋាន ហើយការតវ៉ាកាន់តែមានសភាពព្រៃផ្សៃ។
ទាំងកំហឹង ឬជម្លោះជាមួយកងជីវពលមូលដ្ឋាន ប្រជាកសិករបានចូលរួមក្នុងការរិះគន់វិធានការរបស់រដ្ឋាភិបាលឥណ្ឌាដែលបំផ្លាញដល់ដំណាំដ៏មានតម្លៃដែលស្ទួយសេដ្ឋកិច្ចសហគមន៍។
តំបន់ដីដ៏មានជីជាតិនៃភ្នំហេមពាន្ដ តែងតែរកចំណូលរាប់រយលានដុល្លារពីដំណាំផ្លែប៉ោមក្នុង ១ ឆ្នាំៗ និងជាងពាក់កណ្ដាលនៃប្រជាជនតំបន់កាស្មៀរ សុទ្ធតែពាក់ព័ន្ធដោយផ្ទាល់ និងប្រយោលក្នុងវិស័យកសិកម្ម។
នៅចម្ការប៉ោមមួយ ភាគកណ្ដាលស្រុកសូព្យែន លោក ហ្គូឡាម ណាប៊ី ម៉ាលីក ជាមួយប្អូនប្រុសតែងតែលក់ផ្លែប៉ោម ៧ ពាន់កេស ក្នុង ១ ឆ្នាំ ទៅកាន់ទីផ្សារ និងផ្ទះបាយនានាទូទាំងប្រទេស ឥណ្ឌា ដោយរកចំណូលបាន ៧ លានរូពី (១០ ម៉ឺនដុល្លារ)។
ពេលនេះ ដីរបស់ពួកគេប្រែជាអត់ប្រយោជន៍ ដោយមែកប៉ោមបាក់ទ្រោបដល់ដីដោយសារតែផ្លែប៉ោមដ៏ច្រើនសន្ធឹកមិនត្រូវបានបេះ។ លោក ម៉ាលីក បាននិយាយថា៖ «ឲ្យវារលួយចោលលើដើមចុះ»។
ក្នុងពេលចលនាចុងក្រោយបំផុត លោក ម៉ាលីក បានប្រាប់ AFP ថា ការប្រមូលផលផ្លែប៉ោមគ្រាន់តែធ្វើឡើង ដោយរដ្ឋាភិបាលឥណ្ឌាចង់ប្រាប់ពិភពលោកថា អ្វីៗគ្រប់យ៉ាងសុទ្ធតែល្អនៅកាស្មៀរ។
លោកអះអាងថា តាមពិតប្រជាជនទឹកភ្នែកហើយ៕ AFP/HR