ភ្នំពេញៈ ការវិលទៅវិលមកលើទ្រនំសិល្បៈ នៃអតីតតារាចម្រៀងស្រីសាន់ដេគឺកញ្ញា ពេជ្រ សូលីកា នៅតែបន្តជាចម្ងល់សួរនាំគ្នាពីមហាជនដដែល តាមរយៈការលេចវត្តមានសម្តែងកុននៅទូរទស្សន៍ហង្សមាស បើទោះបីជានាងធ្លាប់បានសម្រេចចិត្តដើរចេញពីសិល្បៈក្រោយពីបែកធ្លាយរឿងឈឺចាប់ត្រូវបានសង្សារលាក់មុខដកយករថយន្តម៉ាក Lexus LS 460 ពណ៌ទឹកសមុទ្រ តម្លៃប្រហែល ១១ ម៉ឺនដុល្លារ ហើយក៏ប្តូរមកជិះ Lexus RX 300 ពណ៌សចាស់ តម្លៃជិត ១ ម៉ឺន ដុល្លារវិញមកនោះ។
តារាចម្រៀងស្រី ទើបតែបង្ហាញវត្តមានលើសិល្បៈចម្រៀងនាពេលថ្មីៗនេះ ដោយនាងបានចេញបទចម្រៀងអូរីជីណលច្រៀងជាមួយលោក នីកូ គួរឲ្យភ្ញាក់ផ្អើលខ្លាំងក្នុងបទថ្មី ដែលមាន ចំណងជើងថា «លាក់បាំង» នោះក៏ស្រាប់តែ លេចមុខក្នុងកុនភាគទូរទស្សន៍ហង្សមាស គឺចាប់ឱកាសក្លាយជាតួឯកស្រី សម្តែងនឹងតួឯកប្រុសជាដៃគូច្រៀងចាស់ដដែល ក្នុងកុនភាគដំបូងរឿង «អាពាហ៍ពិពាហ៍ចៃដន្យ» ហើយក៏លេចឮដែរថា កញ្ញា ពេជ្រ សូលីកា អាចនឹងវិលចូលច្រៀងនៅផលិតកម្មហង្សមាសសាជាថ្មីឡើងវិញទៀតផង។
យ៉ាងណាដំណឹងរឿងវិលចូលច្រៀងនៅផលិតកម្មហង្សមាសនោះ មិនត្រូវបានបកស្រាយពីសំណាក់តារាស្រីរូបស្រស់សោភា សាច់សខ្ចី មុខមានមន្តសេ្នហ៍ ដែលជាថៅកែហាងបាយឈ្មោះ «បាយអូនអ៊ូក» កញ្ញា ពេជ្រ សូលីកា នោះឡើយដោយសារប្រព័ន្ធទូរស័ព្ទនាង តេចូលតែគ្មានអ្នកលើក។
បើតាមរយៈលោក នីកូ ដែលជាតួឯកប្រុសសម្តែងកុនភាគដំបូងដូចគ្នាជាមួយនឹងតួឯកស្រីរូបនេះ ជាមិត្តសិ្នទ្ធស្នាលនឹងគ្នាដែរនោះ បានបង្ហើបប្រាប់ឲ្យដឹងថា៖ «បើតាមខ្ញុំដឹងនោះ សូលីកា ពេលនេះនាងដូចជាមិនទាន់អាចមានពេលវេលាមកច្រៀងវិញបានឡើយ ដោយសារតែរវល់នឹងការងាររកស៊ី ហើយការថតកុនភាគដំបូងឲ្យហង្សមាសគឺរឿង «អាពាហ៍ពិពាហ៍ចៃដន្យ» ដែលក្រុមហ៊ុនបានទិញសិទ្ធិពីប្រទេសចិនមកថតជាសាច់រឿងខ្មែរមានជាង ៣០ ភាគនេះ ដោយសារខាងក្រុមហ៊ុនឃើញយើងទាំង ២ ធ្លាប់សម្តែងជាមួយគ្នាល្អពេលសម្តែងថតបទចម្រៀងនោះ ក៏ចង់បានពួកយើងឲ្យថតកុនជាមួយគ្នាតែម្តង»។
អតីតតារាចម្រៀងស្រីមិនសូវជាមានឈ្មោះបោះសំឡេងខ្លាំង តែមានសម្រស់ស្រស់ស្អាតមុននេះបន្តិចមហាជនដែលធ្លាប់គាំទ្រនាង ក៏នាំគ្នាគិតដោយភាពមន្ទិលសង្ស័យថា កញ្ញា ពេជ្រ សូលីកា មានគម្រោងវិលមករកសង្វៀនចម្រៀងវិញហើយមើលទៅបានជាសុខៗនាងចេញបទថ្មី ហើយច្រៀងជាមួយដៃគូចាស់គឺ លោក នីកូ! តាមលោក នី ណូលី ជាអ្នកនិពន្ធទំនុកច្រៀង និងបទភ្លេងនៃបទ «លាក់បាំង» នេះបានបង្ហើបថា៖ «តាមពិតទៅបទចម្រៀងនេះផ្តើមចេញពីគំនិតរបស់លោក នីកូ បានបង្ហើបថា លោកចង់ឲ្យ Fans មានការភ្ញាក់ផ្អើលចំពោះបទចម្រៀងថ្មីរបស់លោក ដែលមានបំណងចង់ច្រៀងគូ ជាមួយនឹងតារាចម្រៀងស្រីណាម្នាក់។ ក្រោយមកលោកប្រាប់ ឈ្មោះតារាចម្រៀងស្រីគឺកញ្ញា សូលីកា មក ខ្ញុំក៏បានរៀបចំនិពន្ធជាទំនុកច្រៀង និងបទភ្លេង រហូតបានបង្ហោះចេញផ្សាយតាម Page របស់លោក នីកូ នាពេលនេះតែម្តង ហើយរឿងថា កញ្ញា ពេជ្រ សូលីកា វិលចូលសិល្បៈវិញ ខ្ញុំក៏បានដឹងច្បាស់ដែរ»៕