The Phnom Penh Post Search

Search form




Logo of Phnom Penh Post newspaper Phnom Penh Post - វិល​ចូល​ហង្ស​មាស​ភ្លាម សុគន្ធ នីសា​រាសី​ឡើង​បើក​ហាង​លក់​គុយទាវ​ភ្លែត




វិល​ចូល​ហង្ស​មាស​ភ្លាម សុគន្ធ នីសា​រាសី​ឡើង​បើក​ហាង​លក់​គុយទាវ​ភ្លែត

Content image - Phnom Penh Post
សុគន្ធនីសា គ្រង​ឈុត​ចុងភៅ​ដ៏​ស្រស់​ស្អាត​លើក​បង្ហាញ​គុយទាវ​ខ្ចប់ពី​ហាង​គុយទាវ​របស់​ខ្លួន។ ហ្វេសប៊ុក

វិល​ចូល​ហង្ស​មាស​ភ្លាម សុគន្ធ នីសា​រាសី​ឡើង​បើក​ហាង​លក់​គុយទាវ​ភ្លែត

ភ្នំពេញៈ គ្រាន់តែ​ចាកចេញ​ពី​ផលិត​កម្ម​ថោននិង​វិល​ត្រឡប់​ចូលមក​កាន់​ទ្រនំ​ចាស់​ផលិតកម្ម​ហង្សមាស​វិញ​ភ្លាម តារា​ចម្រៀង​ស្រី​និយម​ស្ទីល​ស្រគត់​ស្រគំ កញ្ញា សុគន្ធ នីសា ហាក់​ដូចជា​មានរាសី​ខ្ពស់​ ហុងស៊ុយ​ឡើង​ក្រឺតៗ ​តែម្តង​ ដោយ​នាង​កំពុង​តែ​ចាប់ផ្តើម​អាជីវកម្ម​ក្រៅ​សិល្បៈ​ជាមួយ​នឹងការ​បើកហាង​លក់​គុយ​ទាវខ្ចប់​មួយ​កន្លែង​ដែល​ស្ថិត​នៅ​ម្តុំ​កោះ​ពេជ្រ​ភ្នំពេញ។​

នេះបើ​តាមរូប​ថតពីរ​សន្លឹក មាន​សម្លៀក​បំពាក់​ក្នុង​ឈុតជា​ចុងភៅ​ ដោយ​មានមួយ​សន្លឹក​គេឃើញ​កញ្ញា សុគន្ធ នីសា ប្រើ​ដៃម្ខាង​កាន់ចាន​បន្លែ​ និង​ម្ខាង​កាន់ចាន​ទឹកជ្រលក់​រួមផ្សំ​នឹង​រូបសម្រស់​ដ៏​ផូរផង់​ ដែល​បានបង្ហោះ​លើទំព័រ​ហ្វេសប៊ុក​នាងផ្ទាល់​នៅ​សប្តាហ៍នេះ។

ក៏ព្រោះ​តែ​ជាតារា​ចម្រៀង​ស្រី​រូបស្រស់​មាន​កេរ្តិ៍​ឈ្មោះ​ល្បី​ និងមាន​អ្នក​គាំទ្រ​ក៏ច្រើន​នោះ ទើបនា​ពេល​ឃើញ​សារបង្ហោះ​ផ្សព្វផ្សាយ​តាម​ហ្វេសប៊ុកភ្លាម​ ក៏​ឃើញ​មាន​ប្រិយមិត្ត​ជាច្រើន​នាំគ្នា​ជជែក​ដេញ​ដោល និងចោទ​សួរគ្នា​មួយ​រំពេច​ផងដែរ​ដើម្បី​រកទីតាំង និងសួរ​បញ្ជាក់​ឲ្យ​ដឹងថា តើហាង​នោះ​ពិតជា​ហាង​របស់​នាងមែន ​ឬយ៉ាង​ណា?

Content image - Phnom Penh Post
រូបថត​ពីរ​សន្លឹក​ដែល​បង្ហោះ​ក្នុង​ទំព័រហ្វេស​ប៊ុក​កញ្ញា​ សុគន្ធ នីសា​។ ហ្វេសប៊ុក​

មានអ្នកខ្លះ​ចោទ​សួរថា​ តើហាង​នោះនឹង​បើកសម្ពោធ​ជាផ្លូវ​ការពេល​ណា និង​មានទី​តាំង​នៅ​ឯណា ហើយបាន​ដាក់ឈ្មោះ​អ្វីដែរ​? ខណៈ​ខ្លះទៀត​សួរបែប​លេងសើច​ថា​តើហាង​គុយទាវ​ខ្ចប់​ហ្នឹង​មាន​សេវា​ខ្ចប់ដល់​ផ្ទះទេ ឬក៏អត់​មាន​កន្លែង​អង្គុយទេ?

ខ្លះសួរ​ថាបើ​លក់​ដំបូង​អ៊ីចឹង​តើមាន Special Discount ដែរ​ឬទេ?រីឯ​ខាង​សារ​ព័ត៌មាន​នានា​ក៏មាន​ការ​ចាប់​អារម្មណ៍​ទៅនឹង​ដំណឹង​បើក​ហាង​លក់​គុយទាវ​របស់​ សុគន្ធ នីសា ព្រោះ​ថានាង​ទើប​តែចូល​មក​ទ្រនំ​ចាស់​ហង្សមាស​វិញ​ នៅ​មិនទាន់​បាន​ប៉ុន្មាន​ខែផង​នោះ ក៏​ស្រាប់តែ​បង្ហាញពី​ភាព​ភ្ញាក់ផ្អើល​ថ្មីមួយ​ទៀត​ក្រៅ​វិស័យ​សិល្បៈ​ដោយ​បាន​បើកហាង​សេវាកម្ម​ម្ហូបអាហារ​ដូច្នេះ​ ខណៈ​ឃើញ​ក្រុម​តារាខ្មែរ​ភាគច្រើន​និយម​បើកមុខ​របរក្រៅ​សិល្បៈ​លើ​សម្អាង​ការ ឬ​សម្អាង​កាយ​ជារឿយៗ។

ភ្នំពេញ​ប៉ុស្តិ៍ក៏​បាន​ទូរស័ព្ទ​ទៅ សុគន្ធ​ នីសា ផងដែរ​ដើម្បី​សាកសួរ​ពី​ដំណើរ​ដើមទង​ ឬ​មូលហេតុ​អ្វី​បណ្តាល​ឲ្យងាក​មកចាប់​អារម្មណ៍​បើក​អាជីវកម្ម​ប្រភេទ​នេះ តែ​ប្រព័ន្ធ​ទូរស័ព្ទលេខ​ចាស់​របស់​នាង​មិនអាច​ទាក់ទង​បាន​ឡើយ។

បើទោះ​ជាយ៉ាង​ណាក៏អាច​ទទួល​ដំណឹង​ខ្លះៗ​ដែរ​ពាក់ព័ន្ធ​នឹងទីតាំង​ និង​ការ​បើក​សម្ពោធ​ហាងលក់​គុយទាវ​របស់​តារា​ចម្រៀង​ស្រីសំឡេង​ស្រទន់​នេះ​ តាម​រយៈសារ​ផ្សព្វផ្សាយ​នៅឯ​ទំព័រ​ហ្វេសប៊ុកថា៖ «សូម​បងប្អូន​ទាំងអស់​ជួយ​គាំទ្រ​ហាង (គុយ​ទាវ​ខ្ចប់) ជា​ហាង​របស់​ខ្ញុំ [សុគន្ធ នីសា] ទីតាំង​ស្ថិតនៅ​កោះពេជ្រ ជាប់​នឹងស្ពាន​នាគភ្លោះ ឬជាប់​នឹង​ហាងបុក​កន្តួត​កោះពេជ្រ​។ ហាង​ខ្ញុំនឹងចាប់​ផ្តើម​សម្ពោធ​នៅ​ថ្ងៃទី ៦ ខែ​ឧសភា ឆ្នាំ ២០១៦!»។

គួរ​រំឭកថា នីសា​ បាន​ចេញពី​ផលិត​កម្ម​ថោន​នៅដើម​ឆ្នាំ ២០១៦ ហើយ​ដឹងថា បាន​ត្រឡប់​ទៅ​ផលិតកម្ម​ចាស់វិញ តាមរយៈ​សារខ្លី​មួយបង្ហោះ​នៅលើ​ទំព័រ​ហ្វេស​ប៊ុក​របស់​លោក​ព្រាប សុវត្ថិ នៅ​ថ្ងៃទី ៣ ខែមីនា​ ដោយបាន​សរសេរ​ជា​ភាសា​អង់គ្លេស និង​ប្រែសម្រួល​ន័យថា៖ «នេះ​រូបក្រោយ​ពេល​ថតចម្រៀង​ត្រៀម​ចេញ​ថ្ងៃបុណ្យ​ចូលឆ្នាំ​ខ្មែរឆ្នាំ​ថ្មី​ឆ្នាំ ២០១៦» ក៏មាន​វត្តមាន​តារា​ចម្រៀង​ស្រី​ សុគន្ធ នីសា អង្គុយ​នៅ​ក្បែរ​នឹង​លោក​ ព្រាប សុវត្ថិ៕​

អត្ថបទគួរចាប់អារម្មណ៍