សៀមរាប៖ ដើម្បីជំរុញវិស័យទេសចរណ៍នៅសៀមរាបដែលធ្លាក់ភ្ញៀវរហូតដល់ ១ ភាគរយ ក្នុងរយៈពេល ៨ ខែនៃឆ្នាំនេះ និងដើម្បីអបអរពិធីទទួលទានអំបុកសាមគ្គី ដែលហៅថា៖ «ការទទួលទានអំបុករក្សាជាតិ សាសនា និងព្រះមហាក្សត្រ» ក្នុងឱកាសរំឭកខួបលើកទី ៦៤ ឆ្នាំនៃពិធីបុណ្យឯករាជ្យជាតិសណ្ឋាគាររចនាប័ទ្មអាណានិគមនិយមបារាំង ក្នុងក្រុងសៀមរាប បានរៀបចំព្រឹត្ដិការណ៍សកម្មភាពប្រពៃណីចម្រុះឲ្យភ្ញៀវជាតិ និងអន្ដរជាតិបានរីករាយរួមគ្នា។
សកម្មភាពចម្រុះដែលលើកស្ទួយដល់វប្បធម៌ខ្មែរទាំងនេះ រួមមានការបង្ហាញ និងបម្រើមុខម្ហូបខ្មែរ និងបង្អែមខ្មែរការសម្ដែងសិល្បៈបុរាណខ្មែរ ជាពិសេសការដាល់អំបុក ព្រមទាំងការទទួលទានអំបុកសាមគ្គី។
Memoire Palace Resort & Spa ជាម្ចាស់សណ្ឋាគារនេះក៏ជាប្រធានសមាគមក្លិបទេសចរណ៍សៀមរាប នឹងរៀបចំពិធីអកអំបុករយៈពេល ៤ ថ្ងៃ គឺចាប់ពីថ្ងៃទី ៩ ដល់ថ្ងៃទី ១១។
លោក សេង សេរីវុទ្ធ ជាប្រធានផ្នែកទីផ្សារសណ្ឋាគារនេះ បានឲ្យដឹងថា៖ «សណ្ឋាគារ Memoire Palace នឹងរៀបចំផ្ដល់សេវាកម្មម្ហូបអាហារ និងបង្អែមខ្មែរដ៏សម្រិតសម្រាំងរសជាតិដើមជូនដល់ភ្ញៀវទាំងអ្នកស្នាក់ក្នុងសណ្ឋាគារ និងភ្ញៀវអញ្ជើញមកពីក្រៅបានភ្លក្សរសជាតិដ៏ពិសេសពីស្នាដៃមេចុងភៅល្បី។ ម្យ៉ាងវិញទៀតវាជាការបង្ហាញដល់ភ្ញៀវទេសចរអន្ដរជាតិ បានឃើញពីវិធីដាល់អំបុកបែបប្រពៃណីហើយយើងនឹងនាំគ្នាទទួលទានរួមគ្នា»។
លោកបានបន្ដថា៖ «ក្នុងចំណោមកម្មវិធីទាំង ៣ ថ្ងៃ ព្រះរាជពិធីបុណ្យឯករាជ្យជាតិ ថ្ងៃទី ៩ ខែវិច្ឆិកា ខាងមុខនេះ យើងរៀបចំព្រឹត្ដិការណ៍ពិសេសជាងគេ។ យើងគាំទ្រដល់រាជរដ្ឋាភិបាលចំពោះការអំពាវនាវឲ្យបងប្អូនប្រជាពលរដ្ឋខ្មែរទទួលទានអំបុកទូទាំងប្រទេស»។
កាន់តែវិសេសថែមទៀតភ្ញៀវដែលចូលរួមក្នុងព្រឹត្ដិការណ៍ថ្ងៃទី ៩ នឹងបានទស្សនាល្ខោនស្បែកធំព្រមទាំងរីករាយ និងរាំលេងកម្សាន្ដជាមួយការប្រគំតន្ដ្រីភ្លេងស្គរដៃរហូតដល់ចប់កម្មវិធី។
លោក សេរីវុទ្ធ បានបន្តថា៖ «យើងមានមុខម្ហូបខ្មែរសុទ្ធសាធរួមទាំង ភេសជ្ជៈយើងផ្ដល់ជូននូវទឹកត្នោតផ្អែមជូរនំបង្កងចៀន និងនំខ្មែរប្លែកៗទៀត ដែលប្រមែប្រមូលពីតំបន់ដាច់ស្រយាលនានាទូទាំងប្រទេស»។
ប្រធានផ្នែកទីផ្សារ ដែលមានជំនឿចិត្ដនឹងទទួលបានការចូលរួមច្រើនពីសំណាក់ភ្ញៀវជាតិ និងអន្ដរជាតិលោក សេរីវុទ្ធ បានបន្ថែមថា មូលហេតុមួយផ្សេងទៀត សណ្ឋាគារចង់ផ្សព្វផ្សាយផលិតផលខ្មែរដល់ភ្ញៀវបរទេសបានស្គាល់បានឃើញ និងការទទួលបទពិសោធដាល់អំបុកផ្ទាល់។
លោកបានឲ្យដឹងថា៖ «យើងចង់ឲ្យភ្ញៀវទាំងអស់បានដឹងថា នៅខេត្ដសៀមរាបយើងមានរៀបចំកម្មវិធីដាល់អំបុក និងអកអំបុក ព្រមទាំងការសម្ដែងបែបប្រពៃណីខ្មែរយើង ហើយពេលដែលពួកគាត់បានមកចូលរួមទស្សនាក្នុងការកម្មវិធីនេះ ហើយក្រៅពីនោះពួកគាត់ចូលរួមសកម្មភាពដាល់អំបុកដោយខ្លួនឯង»។
លោក សេរីវុទ្ធ បានបញ្ជាក់ថា៖ «សរុបមកយើងចង់ទាក់ទាញភ្ញៀវទេសចរកាន់តែមកលេងសៀមរាបបន្ថែមទៀត»។
គួរបញ្ជាក់ថា ភ្ញៀវដែលមកស្នាក់នៅសណ្ឋាគារ Memoire Palace នឹងទទួលបានកញ្ចប់សេវាកម្មចូលរួមកម្មវិធីដ៏វិសេសនេះនៅថ្ងៃទី ៩ វិច្ឆិកា ហើយចំពោះភ្ញៀវមកពីខាងក្រៅ ពួកគេនឹងត្រូវចំណាយប្រាក់ ៣៥ ដុល្លារ សម្រាប់មនុស្សធំ និង ១៥ ដុល្លារ សម្រាប់កុមារមានអាយុចាប់ពី ៦ ឆ្នាំឡើង។
យ៉ាងណាមិញ ប្រធានផ្នែកទីផ្សារ និងតំណាងសណ្ឋាគារស្ថាបត្យកម្មរចនាប័ទ្មខ្មែរ-បារាំង រូបនេះបាននិយាយថា គោលបំណងនៃការប្រារឰទិវាដាល់អំបុកនៅថ្ងៃទី ៩ ខែវិច្ឆិកា គឺជាការគាំទ្រដល់គោលនយោបាយរបស់រាជរដ្ឋាភិបាល និងចង់បង្ហាញពីការចូលរួមរបស់វិស័យឯកជនជាមួយរាជរដ្ឋាភិបាល ក្នុងកិច្ចការពារជាតិលើកកម្ពស់ប្រពៃណី ទំនៀមទម្លាប់របស់ខ្មែរទៅដល់ភ្ញៀវទេសចរអន្ដរជាតិឲ្យបានឃើញ និងឈ្វេងយល់ពីវប្បធម៌ខ្មែរ៕