ក្រុងប៉ារីស: ពាក់វ៉ែនតាខ្មៅលាក់បាំងអត្ដសញ្ញាណពេញលេញ អ្នកស្រី Heike បានប្រាប់ថា៖ «ចំពោះរូបខ្ញុំ ស្រាតគឺជារឿងសាមញ្ញបំផុត»។
ស្ដ្រីជនជាតិអាល្លឺម៉ង់ អាយុ ៣៦ ឆ្នាំបានស្គាល់ទីឋានបោះជំរំធម្មជាតិនិយម Arnaout-chot ក្នុងតំបន់ Landes តាំងពីអ្នកស្រីទើបពេញវ័យក្រមុំ និងត្រឡប់មកទីនេះជាថ្មីដោយនាំកូនៗអ្នកស្រីមកជាមួយ។
ប៉ុន្មានឆ្នាំចុងក្រោយនេះ ក្រុមគ្រួសារធម្មជាតិនិយមដូចអ្នកស្រី Heike នាំគ្នាមកកាន់ទីតាំងបោះជំរំអាក្រាត ដែលរំឭកពីប្រពៃណីអាក្រាតនៅទីសាធារណៈតាំងពីបរមបុរាណរបស់បារាំង។
យោងតាមការស្ទង់មតិមួយធ្វើឡើងក្នុងឆ្នាំ ២០១៨ នេះ ដោយ France 4 naturisme ជាទីប្រជុំក្រុមតំបន់បោះជំរំ ៦ ភូមិ ដែលឈានមុខនៅបារាំង រួមទាំង Arnaoutchot មានសមាជិក ១៤ ភាគរយអាយុក្រោម ៤០ ឆ្នាំ។ ៦៣ ភាគរយជាគូស្នេហ៍ ប្ដី និងប្រពន្ធ និង ២៣ ភាគរយជាក្រុមគ្រួសាររួមទាំងកូនៗផងដែរ។
លោក ហ្រង់ ហ្វីលីព ប៉ាវី ប្រធានក្រុមវិស្សមកាល ក៏បានស្ថិតក្នុងចំណោមក្រុមអាក្រាតនិយមផងដែរ។ លោកបាននិយាយថា៖ «រយៈពេលប៉ុន្មានឆ្នាំនេះ យើងបានទទួលសមជិកថ្មីៗជាច្រើន»។
គូស្នេហ៍វ័យក្មេងខ្លះមាន ឬគ្មានកូន ដែលមានអាយុចន្លោះពី ៣០ ទៅ ៤០-៤៥ ឆ្នាំ អត់មានប្រវត្ដិជាអ្នកអាក្រាតនិយមពីមុនមកទេ។ មិនខុសពីតំបន់បោះជំរំដទៃ Arnaoutchot មានមជ្ឈមណ្ឌលថែទាំទារក និងក្លិបកុមារ ដើម្បីសម្រួលបន្ទុកមើលថែកូនអតិថិជន។
ស្ថិតលើដីព្រៃ ៤៥ ហិកតា ទីបោះជំរំស័ក្ដិសមអ្នកមិនចូលចិត្តខោអាវស្អុះស្អាប់ អាចមានភ្ញៀវរហូតដល់ ២០០០ នាក់លែងខ្លួនអាក្រាតយ៉ាងរីករាយ ជាមួយបន្ទប់ស្ប៉ាថ្មី។
ទីតាំងទំនើបៗជាច្រើនមាននៅទីនេះទាំងអស់ លើកលែងតែបន្ទប់ងូតទឹកអត់ទ្វារ ដែលមិនចាំបាច់ប្រើ។
វិលពីសំដិលថ្ងៃលើឆ្នេរវិញ លោក Sylvain អាយុ ៤២ ឆ្នាំ បានស្លៀកខោខ្លីដើម្បីជិះកង់ ជាមួយភរិយា និងកូនៗ អាយុ ២ ឆ្នាំ និង ៤ ឆ្នាំ។
លោកនិយាយថា៖ «វាពិតជាសិទ្ធិស្មើភាពមែន។ មិនថា កម្មករ ឬថៅកែ យើងសុទ្ធតែស្រាតដូចគ្នា ស្មើភាពគ្នាទាំងអស់ គឺជារឿងដ៏ល្អបំផុត»។
ទោះជាក្រុមធម្មជាតិនិយម បានបន្តកើនសមាជិក ជាមួយទស្សនៈជម្រុះរនាំងសង្គមជាដើម ប៉ុន្តែមនុស្សជាច្រើនបានចូលរួមក្លិបអាក្រាតក្រោមហេតុផលឯកជនភាព។
ប្រធានជំរំបន្ដថា៖ «ពួកគេមកមិនមែនដើម្បីតែបទពិសោធវិស្សមកាលស្រាតប៉ុណ្ណោះទេ គឺថែមទាំងស្វែងរកជីវិតរស់នៅថ្មីប្លែកផងដែរ»៕