.jpg)
តារាចម្រៀង និងពិធីការិនី អ្នកនាង យ៉ាន លីនដា ដែលទៅរស់នៅទឹកដីអូស្ត្រាលី ក្រោយត្រូវរងហិង្សាពីអតីតស្វាមី។ រ សហការី
ភ្នំពេញ: គ្រងសម្លៀកបំពាក់ជាអ្នកធ្វើការនៅការិយាល័យដ៏ថ្លៃថ្នូរ ចុះពីរថយន្ដ ទឹកមុខប្រែជាស្រពោន ស្ត្រីម្នាក់ក៏ស្រាយកៅស៊ូចងសក់ ទាញមួកសុវត្ថិភាពពីក្នុងរថយន្ដមកពាក់ រួចដើរសំដៅផ្ទះធំស្កឹមស្កៃ។
បន្តទៅប្ល្ង់មួយទៀតក្រោយបំពេញភារកិច្ចពីស្រែ ស្ដ្រីម្នាក់ទៀតក៏ទាញយកមួកសុវត្ថិភាពពីក្បែរពាងទឹកមកពាក់ ទឹកភ្នែកក៏ស្រក់ហូរ មុនពេលឈានជើងឡើងផ្ទះខ្ទមស្លឹក ដែលបញ្ជាក់ពីជីវភាពក្រខ្សត់។
សំឡេងសើចក្អាកក្អាយ ប្រែជាក្រៀមស្រពោន ពេលចុះពីលើរ៉ឺម៉ក ស្ដ្រីម្នាក់ ដែលទំនងជាកម្មការិនី ក៏បានទាញមួកសុវត្ថិភាពពីកាបូបមកពាក់ រួចដើរសំដៅផ្ទះឈើ។
មិនខុសគ្នាទេ បើទោះបីជាក្មេងស្រីម្នាក់នេះ គ្រងឈុតសិស្សសាលា ដែលត្រូវបានមិត្ដភក្ដិឌុបកង់ជូនមកផ្ទះ នាងក៏បានទាញយកមួកសុវត្ថិភាពពីកាតាបមកពាក់ ក្រោមទឹកមុខដ៏អស់សង្ឃឹមរបស់មិត្ដភក្ដិ។
មនុស្សមិនតិចទេដែលមានការងឿងឆ្ងល់ និងសរសេរនូវទស្សនៈផ្ទាល់ខ្លួនប្រយុទ្ធប្រឆាំងនឹងអំពើហិង្សាលើស្ដ្រី និងកុមារគ្រប់ទម្រង់ ពេលបានឃើញនូវទិដ្ឋភាពដ៏ក្រៀមក្រំរបស់ស្ដ្រីក្នុងវីដេអូអប់រំនេះ។
វីដេអូខាងលើគឺជាឈុតឆាកបង្ហាញអំពីរឿងរ៉ាវដ៏សែនឈឺចាប់របស់នារីកម្ពុជា ៤ នាក់ក្នុងរយៈពេលត្រឹមតែ ២ នាទី។ វាជាយុទ្ធនាការប្រឆាំងនឹងអំពើហិង្សា ដើម្បីបញ្ឈប់ការរំលោភបំពានលើស្ដ្រី និងកុមារ។
តារាចម្រៀង នីគី នីគី ចូលរួមផ្សព្វផ្សាយ។ សហការី
អង្គការជីវិតកម្ពុជា ឬ This Life Cambodia (TLC) ជាអង្គការអភិវឌ្ឍន៍សហគមន៍ដែលមានកម្មវិធីដោះស្រាយបញ្ហាយុត្តិធម៌សង្គមដ៏ស្មុគស្មាញ រួមទាំងអំពើហិង្សាលើស្ត្រី និងកុមារ យុត្តិធម៌អនីតិជន ការទទួលបានការអប់រំ និងការការពារគ្រួសារ បានផលិតវីដេអូអប់រំស្ដីពី «រួមគ្នាបញ្ឈប់អំពើហិង្សា» (End Violence Together) មានអ្នកចូលទស្សនានៅលើបណ្ដាញសង្គមហ្វេសប៊ុកជាងមួយលានដង ជាង ១៥៦ ០០០ បានឃើញយុទ្ធនាការ ទាំងការចុច (liked, commented ឬ shared) និងជាច្រើននាក់ទៀត បានផ្ញើសារទាំងឯកជន និងសាធារណៈពីអ្នកជួបនូវពិសោធផ្ទាល់នៃអំពើហិង្សា ព្រមទាំងបានអះអាងថា យុទ្ធនាការនេះបានជួយពួកគេផងដែរ។
យោងតាមរបាយការណ៍ពីលោក Jaime Gill នាយកផ្នែកទីផ្សារ និងទំនាក់ទំនងនៅអង្គការជីវិតកម្ពុជា បានឲ្យដឹងថា៖ «មនុស្សជាង ១,៧ លាននាក់ បានមើលឃើញយុទ្ធនាការតាមរយៈវីដេអូអប់រំ ដែលស្មើមនុស្សលើសពីម្នាក់ក្នុងចំណោម ១០ នាក់នៃប្រជាជនសរុប»។
លោកបានឲ្យដឹងពីគោលបំណងនៃកម្មវិធីយុទ្ធនាការនេះថា៖ «អង្គការជួយសហគមន៍លើកឡើងពីកត្ដាប្រឈម និងផលប៉ះពាល់នៃអំពើហិង្សាលើក្រុមគ្រួសារ និងសហគមន៍ទាំងមូល។ យើងគាំទ្រដល់អាជ្ញាធរមូលដ្ឋានជួយទប់ស្កាត់អំពើហិង្សា និងដោះស្រាយបញ្ហា។ យើងក៏បង្កើនការសម្របសម្រួលដោយជំរុញឲ្យសហគមន៍ស្វែងរកវិធានការផ្លូវច្បាប់ ជួយដល់ជនរងគ្រោះ ហើយយើងផ្សព្វផ្សាយចំណេះដឹងដល់សិស្សអនុវិទ្យាល័យឲ្យចេះបង្កើតទំនាក់ទំនងល្អ និងទប់ស្កាត់អំពើហិង្សា ដើម្បីបន្សាបផ្នត់គំនិតបុរាណក្នុងសង្គមខ្មែរ»។
បច្ចុប្បន្ននេះ កម្មវិធីជីវិតគ្មានអំពើហិង្សា បានធ្វើការដោយផ្ទាល់ជាមួយស្ដ្រី និងកុមារជាង ៣៥០០ នាក់ក្នុង ២២ ឃុំ និងដោយប្រយោលក្នុងចំនួនប្រមាណ ១៦៥០០០ នាក់។
ឈុតឆាកដកស្រង់ពីវីដេអូពញ្ញាក់អារម្មណ៍ពីអំពើហិង្សាលើស្ត្រី។ សហការី
កញ្ញា ហុង សារិទ្ធ អ្នកសម្របសម្រួលកម្មវិធីនៅ ជីវិតគ្មានអំពើហិង្សា (This Life Without Violence) បានឲ្យដឹងក្នុងរបាយការណ៍ថា៖ «ស្ដ្រី ៤០ ភាគរយបាននិយាយថា វាដោយសារតែពួកគេយល់ថា វាជារឿងធម្មតា ខណៈ ៣០ ភាគរយទៀត មិនបានរាយការណ៍ដោយសារវាជារឿងអាម៉ាស់។ យើងគួរក្រើនរំឭកដល់បុរសៗថា អំពើហិង្សាក្នុងគ្រួសារគឺជាបទឧក្រិដ្ឋ ហើយស្ដ្រីរងគ្រោះ ត្រូវតែចងចាំថា ពួកគេមានច្បាប់ការពារ»។
ដោយមានការចូលរួមពីតារា និងបុគ្គលល្បីៗមួយចំនួនយុទ្ធនាការនេះ គឺជាផ្នែកមួយនៃយុទ្ធនាការសកលរយៈពេល ១៦ ថ្ងៃ ដែលបានបញ្ចប់កាលពីថ្ងៃចន្ទ ទី ១០ ខែធ្នូកន្លងទៅនេះ ដើម្បីលុបបំបាត់អំពើហិង្សាប្រឆាំងនឹងស្ត្រី ដោយប្រើប្រាស់ពណ៌ទឹកក្រូចជានិមិត្តរូបនៃក្តីសង្ឃឹម និងអនាគតភ្លឺស្វាង ដោយគ្មានអំពើហិង្សា៕
