.jpg)
ការសម្ដែងជាថ្មីរបស់ក្រុមចម្រៀង Brave Girls ក្រោយពីមានការផ្ទុះប្រជាប្រិយភាពតាមបណ្ដាញយូធូប។ AFP
ក្រុងសេអ៊ូល៖ ក្រុមចម្រៀង Brave Girls បាត់បង់ជំនឿចិត្ដអស់រលីងកាលពីប៉ុន្មានសប្ដាហ៍ ហើយពួកគេក៏បានត្រៀមខ្លួនចែកផ្លូវគ្នា និងបោះបង់ក្ដីសុបិនធ្វើជាតារា K-pop ក្រោយពីតែលតោលលើវិថីនេះអស់ជាច្រើនឆ្នាំមក។
ហាក់បីដូចជាព្រហ្មលិខិតមិនបំបិទផ្លូវក្រុមចម្រៀងនារីនេះ។ គាប់ជួន អ្នកប្រើប្រាស់បណ្ដាញសង្គមយូធូបម្នាក់ឈ្មោះ Viditor បានបង្ហោះសម្រង់វីដេអូខ្លីៗនៃការសម្ដែងរបស់ក្រុមចម្រៀងស្រីមួយនេះនៅមូលដ្ឋានកងទ័ពកូរ៉េខាងត្បូង។ អ្វីដែលមិននឹកស្មានដល់ វីដេអូក្នុងយូធូបនោះ បានសង្គ្រោះអាជីពសិល្បៈរបស់ពួកគេឱ្យផ្ទុះប្រជាប្រិយភាពយ៉ាងខ្លាំងក្លា។
ពួកគេបានស្រែកច្រៀង «Rollin'' rollin'' rollin'' rollin''/I am waiting for you/Babe just only you» ជាមួយក្បាច់រាំបែបទាហាន និងគ្រវីចង្កេះពន្លឺភ្លើងពណ៌។ ការសម្ដែងនេះទទួលបានប្រជាប្រិយភាព និងមានអ្នកចូលទស្សនារាប់លានដងនៅទូទាំងប្រទេស។
មិនដល់មួយខែផង ចម្រៀងរបស់ពួកគេបានឈរលើចំណាត់ថ្នាក់លេខ ១ នៅកូរ៉េខាងត្បូង និងស្ថិតលើកំពូលតារាង Billboard K-pop 100 នៅសហរដ្ឋអាមេរិក ខណៈបទទាំងនេះបានចេញផ្សាយជាផ្លូវការតាំងពី ៤ ឆ្នាំមុនមកម្ល៉េះ។
សមាជិកក្រុម Brave Girls តុបតែងកាយត្រៀមឡើងឆាកដ៏តូច ដើម្បីថតវីដេអូបង្ហោះតាមបណ្ដាញសង្គម។ AFP
ប្រជាប្រិយភាពរបស់ពួកគេបានកើនឡើងខ្លាំង ដោយសារប្រវត្ដិតស៊ូរបស់ក្រុម ដែលធ្លាប់ត្រូវបានគេចាត់ទុកថាតារាអាប់រស្មី។
ប្រធានក្រុម គីម មីនយ៉ាំង អាយុ ៣០ ឆ្នាំបានប្រាប់ទីភ្នាក់ងារ AFP ថា៖ «តាំងពីដើមឆ្នាំមក ខ្ញុំគិតថា វាដល់ពេលដែលយើងត្រូវបញ្ចប់បេសកកម្មរួមគ្នាហើយ»។
ក្រុម Brave Girls ចាប់ផ្ដើមអាជីពសិល្បៈក្នុងទ្រង់ទ្រាយជាក្រុមសមាជិក ៥ នាក់ កាលពីមួយទសវត្សរ៍មុន តែពួកគេមិនទទួលបានការគាំទ្រនោះទេ។ ពួកគេបានវិលមកជាថ្មីជាមួយសមាជិក ៧ នាក់ក្នុងឆ្នាំ ២០១៦ តែក្រុមតារាចម្រៀងស្រីនេះនៅតែទៅមុខមិនរួច។
ទើបតែប៉ុន្មានសប្ដាហ៍ចុងក្រោយ វីដេអូឃ្លីបរបស់ពួកនាងទទួលបានការចូលទស្សនាប្រមាណ ១៥ លានដងរយៈពេលមិនដល់មួយខែ។ អ្នកបង្ហោះវីដេអូសម្រង់ចម្រៀងនេះ ដែលបាននិយាយថា នាងមិនចង់លាតត្រដាងអត្ដសញ្ញាណផ្ទាល់ខ្លួន បានឱ្យដឹងថាខ្លួនពិតជាមានការភ្ញាក់ផ្អើលចំពោះប្រតិកម្មនៅលើយូធូបចំពោះក្រុម Brave Girls។
នាងបាននិយាយថា៖ «ប៉ុន្ដែខ្ញុំមិនធ្លាប់ជួបអ្វីល្បីខ្លាំងយ៉ាងនេះទេ។ ខ្ញុំនៅតែមិនជឿនូវអ្វីដែលបានកើតឡើងនេះសោះ»។
អភូតហេតុ K-pop ដោយមានក្រុមចម្រៀងបុរស BTS ជាគំរូស្រាប់ ដែលមានឈ្មោះបោះសំឡេងទូទាំងពិភពលោកបានរកចំណូលរាប់ពាន់លានដុល្លារក្នុងមួយឆ្នាំសម្រាប់ប្រទេសសេដ្ឋកិច្ចធំបំផុតលំដាប់ទី ១២ ក្នុងពិភពលោក។
ក្រុមតារាអស់រស្មី ដែលត្រៀមចែកជើងគ្នា មិននឹកស្មានថាមានឱកាសអង្គុយផាត់មុខ ត្រៀមឡើងឆាកសម្ដែងជូនអ្នកគាំទ្រតាមបណ្ដាញសង្គម។ AFP
ក្រុមតារាល្បីៗជាច្រើន ដែលរមែងជាយុវជន និងយុវតី ត្រូវបានបង្កើតឡើងរៀងរាល់ឆ្នាំ ដោយពួកគេរំពឹងថា នឹងមានដំណើរជោគជ័យតាមរៀមច្បង BTS និង BlackPink តែភាគច្រើនក៏រលាយបាត់ទៅវិញភ្លាមៗ ដោយបន្សល់ទុកតែអនុស្សាវរីយ៍ចម្រៀងតិចតួចប៉ុណ្ណោះ។
លោក គីម ជិនយុង នាយកប្រតិបត្ដិផលិតកម្ម Wuzo Entertainment បានប្រាប់ AFP ថា៖ «ច្បាស់ណាស់ ក្រុមចម្រៀងថ្មី ៥០ ក្រុមបានហក់ចូលទីផ្សារតន្ដ្រីរៀងរាល់ឆ្នាំ តែមិនដល់ពាក់កណ្ដាល ដែលបានឡើងប៉ុស្ដិ៍ទូរទស្សន៍»។
ក្រុមហ៊ុននានាក្នុងឧស្សាហកម្ម K-pop កំពុងតែនាំគ្នាងាកចាប់បណ្ដាញសង្គម ដូចជា YouTube, TikTok និង Facebook ដើម្បីអភិវឌ្ឍក្រុមអ្នកគាំទ្រចំពោះក្រុមចម្រៀងនីមួយ។ ប៉ុន្ដែសម្រាប់ក្រុម Brave Girls វាជាក្រុមថ្មីសន្លាងមួយ ដែលមានលក្ខណៈប្លែកពីក្រុមដទៃ ដោយពួកគេហៀបលិចទៅហើយ ក៏ស្រាប់តែរះខ្ពស់ត្រដែតវិញមួយរំពេច។
សមាជិកម្នាក់នៃក្រុម Brave Girls នាង លី យូណា បានលាន់មាត់ពីការផ្ទុះប្រជាប្រិយភាពដូចផ្លេកបន្ទោនេះថា៖ «មានរឿងមិនគួរឱ្យជឿនឹងអ្វីដែលបានកើតឡើង និងបានកើតលើរូបយើងផ្ទាល់»៕ HR
ដំណើរលើវិថីខេប៉ុបមួយទសវត្សរ៍ ទីបំផុត Brave Girls រកឃើញពន្លឺអាជីពសិល្បៈចម្រៀង តាមរយៈវីដេអូលើបណ្ដាញសង្គម។ AFP
