.jpg)
បាល់ឈើម៉ូដបុរាណដែលត្រូវបានយកមកប្រកួតដណ្ដើមគ្នា។ រូបថត AFP
ក្រុងហាណូយ: បុរសក្មេងៗដោះអាវសម្ញែងសាច់ទ្រូងសខ្ចីកំពុងរត់ប្រដេញគ្នាដណ្ដើមបាល់ឈើដ៏ធំ ខណៈមហាជនព័ទ្ធជុំវិញកំពុងតែទស្សនាយ៉ាងរំជើបរំជួលក្នុងពិធីបុណ្យប្រពៃណីវៀតណាមប្រចាំឆ្នាំ។
នេះជាការប្រកួត វ៉ាត កាវ ដែលមានប្រវត្តិអាយុកាលច្រើនសតវត្សរ៍ចេញពីការហាត់ទាហានតាមរយៈលំហាត់ប្រាណកូនកាត់រវាងកីឡាចំបាប់ និងកីឡា rugby។
វ៉ាត កាវ គឺជាការប្រកួតដែលទាក់ទាញមនុស្សម្នាជាច្រើននាក់មកចូលរួមពិធីបុណ្យចូលឆ្នាំប្រពៃណីក្នុងរយៈពេល ៣ ថ្ងៃជាប់ៗគ្នានៅភូមិធុយលីញ ចម្ងាយប្រមាណ ១០ គីឡូម៉ែត្រពីទីក្រុងហាណូយ។
បុរសៗចងកន្សែងចង្កេះពណ៌ខុសៗគ្នា រត់ប្រកួតដណ្ដើមបាល់ឈើ។ រូបថត AFP
ការប្រកួតមួយលើកត្រូវបានបែងចែកមនុស្ស ៨ នាក់ជា ៤ ក្រុមដោយក្រវាត់ចង្កេះពណ៌ខុសៗគ្នា។ ពួកគេប្រកួតដណ្ដើមបាល់យក្សទម្ងន់ ១៧ គីឡូក្រាម ដែលធ្វើពីឈើដើមខ្នុរ។
លោក ឡេ ដុកដុង ដែលជាកីឡាករចូលរួមប្រកួតចម្បាប់ដណ្ដើមបាល់ឈើអស់រយៈពេល ១៥ ឆ្នាំបានឲ្យដឹងថា៖ «ល្បែងនេះគឺជាប្រពៃណី និងជាមោទនភាពរបស់អ្នកភូមិយើង»។
អ្នកចូលរួមទស្សនាកាលពីចុងសប្ដាហ៍នាំគ្នាទះដៃ ហ៊ោ និងសើចក្អាកក្អាយ ខណៈអ្នកអត្ថាធិប្បាយរៀបរាប់ពីសកម្មភាពអ្នកប្រកួតយ៉ាងរស់រវើលក្នុងបរិវេណទីអារាម។
ទោះបីជាប្រាក់រង្វាន់សម្រាប់ក្រុមឈ្នះត្រឹមតែ ២៦០ ដុល្លារក្តី ប៉ុន្តែការប្រកួតរយៈពេល ៣ ថ្ងៃដែលមានមនុស្ស ១៦ ក្រុមចូលរួម នៅតែធ្វើឲ្យក្រុមជយលាភីមានមោទនភាព។
យោងតាមអ្នករៀបចំការប្រកួត វ៉ាត កាវ លោក ឡេ មិញសួង បានឲ្យដឹងថា ការប្រកួតដែលកកើតតាំងពីសតវត្សរ៍ទី ១១ ត្រូវបានបង្កើតឡើងក្នុងគោលបំណងសំខាន់លើស្មារតីក្រុមភាពឆ្លាតវៃ រហ័សរហួន និងកម្លាំងតទល់នឹងការឈ្លានពានពីបរទេស៕
