.jpg)
ក្រុមសិល្បករ-សិល្បការិនី នាពេលជុំគ្នាក្នុងកម្មវិធី «វេទិកាសិល្បៈស្ត្រី» កាលពីឆ្នាំកន្លងមក។ រូបថត សហការី
ភ្នំពេញៈ ក្រោយពីផ្អាកមួយលើកនោះកម្មវិធី «វេទិកាសិល្បៈស្ត្រី» នឹងប្រារព្ធធ្វើលើកទី ៤ នាថ្ងៃទី ១៥ ខែមីនា ឆ្នាំ ២០២០ ខាងមុខនេះនៅមហោស្រពចេនឡា ដោយមានក្រុមសិល្បករ-សិល្បការិនី ជាច្រើនក្រុមមកសម្តែងទម្រង់សិល្បៈរួមគ្នា។
វេទិកាសិល្បៈស្ត្រីលើកទី ៤ បានវិលត្រឡប់មកជួបលោកអ្នកសាជាថ្មីម្តងទៀតដោយមានការសម្តែងនូវផ្ទាំងទស្សនីយភាពសិល្បៈចម្រុះមកពីតំបន់នានានៃប្រទេសកម្ពុជា និងការតាំងពិព័រណ៍ផងដែរក្រោមប្រធានបទថា «ផ្ទះ»។ សម្រាប់វេទិកាលើកទី ៤ នេះមានក្រុមសិល្បៈនានាចូលរួមដូចជា ក្រុមសិល្បៈនៃអង្គការសិល្បៈខ្មែរអមតៈ ក្រុមសិល្បៈមកពីសាលាហ្វារពន្លឺសិល្បៈ ក្រុមសិល្បៈសូហ្វីលីន ក្រុមសិល្បៈនៃអង្គការអេពិកអាត ក្រុមសកម្មជនសិល្បៈ និងសមាគមក្រុមតន្ត្រីយុវវ័យនាំសារ។
បើតាមអ្នកស្រី ណម សុភ័ស ជាសមាជិកនៃក្រុមសមាគមក្រុមតន្ត្រីយុវវ័យនាំសារបង្ហើបថា៖ «យើងមានក្ដីរីករាយ សូមអញ្ជើញសាធារណជនចូលរួមទស្សនា កម្មវិធីវេទិកាសិល្បៈស្ត្រីលើកទី ៤ នឹងប្រារព្ធឡើងនៅថ្ងៃទី ១៥ ខែមីនា ឆ្នាំ ២០២០ នេះនៅសាលមហោស្រពចេនឡាចាប់ពីម៉ោង ២ រសៀលដល់ម៉ោង ៥ និង ៣០ នាទីល្ងាច។
ចំពោះប្រធានបទវិញពីមួយលើកទៅមួយលើក យើងតែងតែមានការដាក់ប្រធានបទខុសៗគ្នា ហើយការប្រារព្ធធ្វើដំបូងគឺនៅក្នុងឆ្នាំ ២០១៦ ដល់ឆ្នាំ ២០១៨ តែនៅឆ្នាំ ២០១៩ យើងខកខានធ្វើមួយលើកមកហើយដែរ ខណៈទើបតែមកធ្វើលើកទី ៤ នៅឆ្នាំ ២០២០ នេះ»។
ក្រុមសិល្បការិនីសម្តែងជាក្រុមនៃ «វេទិកាសិល្បៈស្ត្រី» កន្លងមក។ រូបថត សហការី
អ្នកនាង ណម សុភ័ស ក៏បានបន្តថា៖ «សម្រាប់ការសម្តែងសិល្បៈវិញនៅក្នុងឆ្នាំនេះ យើងក៏មានការរៀបចំប្លែកពីលើកមុនបន្តិចផងដែរ ត្រង់ថា ឆ្នាំកន្លងមកយើងឲ្យក្រុមអ្នកសិល្បៈនៃក្រុមនីមួយៗសម្តែងឈុតឆាកនៃសាច់រឿងជាលក្ខណៈដាច់ដោយឡែកពីគ្នា។ តែឆ្នាំនេះយើងមានការសម្តែងរួមគ្នាលក្ខណៈសម្តែងតាមក្រុមដែរ តែជាការផ្សារភ្ជាប់គ្នានូវសាច់រឿងរួមគ្នាចងដូចជា វគ្គ ឬភាគនៃសាច់រឿងធំ ១ អ៊ីចឹង»។
ដើម្បីលើកទឹកចិត្ត និងរួមចំណែកជួយសម្រួលដល់ក្រុមសិល្បករ-សិល្បការិនី ដែលនឹងមកសម្តែងនៅក្នុងវេទិកាសិល្បៈស្ត្រីលើកទី ៤ នេះសម្រាប់អ្នកទស្សនា ក៏តម្រូវឲ្យជួយជាវសំបុត្រចូលទស្សនាផងដែរ ដោយសំបុត្រ ១ សន្លឹកតម្លៃ ១ ម៉ឺនរៀលដែលចាប់ផ្តើមលក់ជាបណ្តើរៗហើយ។
អ្នកស្រី ណម សុភ័ស បានបញ្ជាក់ថា៖ «ប្រសិនបើអ្នកនៅជិតអង្គការសិល្បៈ-ខ្មែរអមតៈអ្នកអាចរកទិញសំបុត្រនៅការិយាល័យកណ្ដាល ឬនៅស្ដង់សំបុត្រការសម្ដែងនៅសារមន្ទីរជាតិក៏បាន ឬ អាចរកទិញនៅតាមទីតាំងនានានៅក្បែរលោកអ្នកបំផុតរួមមានដូចជានៅឯសាកលវិទ្យាល័យភូមិន្ទភ្នំពេញ (RUPP/IFL/DMC) ជាមួយភ្នាក់ងារលេខទូរស័ព្ទ 069 566 818 នៅសាកលវិទ្យាល័យភូមិន្ទភ្នំពេញមណ្ឌល ២២ (ក្បែរផ្សារពោធិ៍ចិនតុង) ជាមួយភ្នាក់ងារលេខទូរស័ព្ទ 070 375 112 វិទ្យាស្ថានជាតិពាណិជ្ជសាស្ត្រ (ក្បែរផ្សារស្ទឹងមានជ័យថ្មី) ជាមួយនឹងភ្នាក់ងារលេខទូរស័ព្ទ 081 600 443 នៅឯសមាគមក្រុមតន្ត្រីយុវវ័យនាំសារ (ក្បែរវត្តសន្សំកុសល) ជាមួយភ្នាក់ងារមានលេខទូរស័ព្ទ 096 849 4806/ 070 648 382 នៅឯទីស្នាក់ការអង្គការសិល្បៈខ្មែរអមតៈជាមួយភ្នាក់ងារលេខទូរស័ព្ទ 011 460 900 និងក្រុមសិល្បៈសូហ្វីលីនជាមួយភ្នាក់ងារដែលមានលេខទូរស័ព្ទ 017 938 993»៕
