.jpg)
កញ្ញា សុខ ចិន្តា ហៅ វ៉ាន់ នីឡា អតីតតារាចម្រៀងជ្រកទ្រនំភ្លេងរីខត រៀបរាប់រឿងសង្គមសិល្បៈ ជាផ្នែកសំខាន់នៃជីវិតនាង។ រូបថត អ៊ីនស្តាក្រាម ,ភ្នំពេញ ប៉ុស្តិ៍
ភ្នំពេញៈ អតីតតារាចម្រៀងជ្រកនៅទ្រនំភ្លេងរីខត ដែលបានជំពប់រឿងអាស្រូវស្នេហា ដោយសារតែអតីតមិត្តប្រុសលួចទម្លាយរូបអាក្រាតកញ្ញា វ៉ាន់ នីឡា បង្ហើរសារជាតម្រុយប្រាប់បំណងចង់វិលត្រឡប់មករកឆ្នាំងបាយចាស់លើវិថីសិល្បៈវិញសាជាថ្មីម្តងទៀតនាដើមឆ្នាំ ២០២០ ខណៈមហាជនគឺនៅចាំបានថា តារាចម្រៀងស្រីរូបនេះធ្លាប់ព្រលយបង្កការភ្ញាក់ផ្អើលដូច្នេះដែរកាលពីឆ្នាំមុននោះ។
តារាចម្រៀងស្រីមានឈ្មោះពិត សុខ ចិន្តា ហៅ វ៉ាន់ នីឡា បង្ហោះសារស្តែងពីអារម្មណ៍ខ្លួនពីរឿងក្នុងចិត្តតាមបណ្តាញអ៊ីនស្តាក្រាមថា៖ «អ្នកទាំងអស់គ្នាប្រហែលជាមិនដឹងទេថា ការច្រៀងគឺជាចំណែកមួយនៃជីវិតរបស់ខ្ញុំ។ ខ្ញុំពិតជាចង់ស្រោចស្រង់ក្តីស្រមៃរបស់ខ្ញុំមួយនេះត្រឡប់មកវិញ ហើយប្រសិនជាខ្ញុំ មានឱកាសត្រឡប់រកអាជីពរបស់ខ្ញុំម្តងទៀត ខ្ញុំនឹងខំប្រឹងប្រែងឲ្យកាន់តែល្អជាងមុន»។
រំពេចនោះប្រិយមិត្តគាំទ្ររបស់នាងតបសារថា៖ «ចង់ស្តាប់បទថ្មីរបស់បង សុំវិលវិញមក!ខ្ញុំពិតជានឹករំឭកសំឡេងដ៏ស្រទន់របស់អ្នកណាស់។ ខ្ញុំតែងតែស្តាប់ចម្រៀងបង តើពេលណាបងវិលមកវិញទៅ? មានពេលខ្លះខ្ញុំមានអារម្មណ៍ចង់ជួបបងផ្ទាល់ទៀតផង និងឆ្ងល់ថា ហេតុអ្វីបានបងមិនវិលមកវិញ? ខ្ញុំពិតជានឹកសំឡេងបង និងមិនចង់ស្តាប់តែបទចាស់ទេ គឺខ្ញុំចង់ឲ្យបងច្រៀងបទថ្មីចេញជាបន្តបន្ទាប់»។
ភ្លាមៗនោះក៏មានអ្នកចូល Like និង Comment ចូលស្វាគមន៍យ៉ាងច្រើន ខណៈអ្នកគាំទ្រខ្លះថា៖ «នឹក idol ណាស់រាល់ឆ្នាំពេលចូលឆ្នាំម្ដងៗតែងរង់ចាំបទថ្មីបងស្រី វិលចូលច្រៀងវិញមកចាប់ផ្ដើមពី ពេលនេះ វេលានេះ ឆ្នាំនេះ fan រង់ចាំ បងស្រីច្រើនណាស់ សង្ឃឹមថាឆ្នាំនេះនឹងបានស្ដាប់បទចូលឆ្នាំ idol ចុះ!» និងអ្នកខ្លះទៀតថា៖ «សួរបងជំនោរឲ្យគាត់ផលិតបទឲ្យសិន! ចាំជួយគាំទ្រណា! រង់ចាំមើលបទថ្មីចម្រៀងថ្មី ធ្វើអ្វីដែលខ្លួនឯងស្រឡាញ់ចូលចិត្តទើបជាការពិតប្រាកដ ស៊ូស៊ូ!ពួកយើងនៅតែរង់ចាំបងត្រទ្បប់មកជាតារាចម្រៀងវិញណា love you បង!»។
តែភ្នំពេញប៉ុស្តិ៍ក៏មិនអាចទទួលបានការបកស្រាយផ្ទាល់ពីតារាចម្រៀងស្រី កញ្ញា វ៉ាន់នីឡា បានឡើយដោយសារប្រព័ន្ធទូរស័ព្ទរបស់កញ្ញាធ្លាប់ទាក់ទងនោះពុំអាចទាក់ទងបាននាពេលនេះ។ ការចង់មកច្រៀងបំពេអារម្មណ៍ប្រិយមិត្តតាមបណ្តាញហ្វេសប៊ុកក៏ឃើញកញ្ញា វ៉ាន់ នីឡា ធ្លាប់បង្ហើបកាលពីមុនដែរថាចង់ឡើងច្រៀងលើឆាកវិញ ចង់ចេញបទចម្រៀងថ្មី ចង់ធ្វើអ្វីដែលខ្ញុំធ្លាប់ធ្វើកាលពីមុន។
កញ្ញា វ៉ាន់នីឡា ធ្លាប់ព្រលយថា៖ «ចាសបង!ជាការពិតគឺខ្ញុំមានបំណងចង់វិលទៅរកវិស័យសិល្បៈចម្រៀងវិញមែន!កន្លងមកខ្ញុំក៏ពុំដែលប្រាប់ថា ខ្ញុំលាឈប់ពីវិស័យសិល្បៈនោះទេ។ ដោយសារថ្មីៗនេះខ្ញុំតែងមានអារម្មណ៍នឹកនាខ្លាំងទៅនឹងសិល្បៈចម្រៀង ហើយពេលនាងខ្ញុំនិយាយរឿងពីអារម្មណ៍ពិតចេញមកក្រៅតាមបណ្តាញសង្គមឃើញបងប្អូនប្រិយមិត្ត នៅតែគាំទ្រច្រើន ទើបសម្រេចចិត្តនឹងចូលប្រឡូកវិញឆាប់ៗនេះ»៕
