.jpg)
កញ្ញា វ៉ាន់ នីឡា និងគូដណ្តឹង ប្រកាសពន្យារពេលមង្គលការនៅខែឧសភា ខាងមុខ។ រូបថត ហ្វេសប៊ុក, តារាកំប្លែងស្រីស្រស់ស្អាតកញ្ញា វ៉ាន់ នីឡា កូនស្រីលោក សុវណ្ណ ឫទ្ធី ហៅតាវុិចទ័រ។ រូបថត ភ្នំពេញប៉ុស្តិ៍
ភ្នំពេញ៖ ដោយសារឃើញបទពិសោធគូស្នេហ៍ជិតចូលរោងការជាច្រើនបានលុបចោល ឬពន្យារពេលថ្ងៃពិសេសរបស់ខ្លួនក្រោមរូបភាពព្រួយបារម្ភខ្លាចគ្មានភ្ញៀវចូលរួម ព្រោះឥទ្ធិពលរាតត្បាតពេញសកលលោកជំងឺកូវីដ ១៩ ក៏ជំរុញឲ្យតារាកំប្លែងស្រីកញ្ញា វ៉ាន់ នីឡា ប្រចាំទូរទស្សន៍ CTN នោះ ក៏បានពន្យារពេលពិធីមង្គលការរបស់ខ្លួនពីចម្ងាយផងដែរ។
តារាកំប្លែងស្រីសម្តីញ៉ែតៗមានទេពកោសល្យខ្ពស់ពីក្មេងមានវ័យម្ភៃឆ្នាំប៉ឹមៗ កញ្ញា វ៉ាន់ នីឡា ដែលជាកូនស្រីសំណព្វចិត្តលោក តា វ៉ិចទ័រ ជាអ្នកដឹកនាំកម្មវិធីកម្សាន្តនៅក្រុមហ៊ុន CBS បានបញ្ជាក់ប្រាប់កាលពីថ្មីៗនេះថា គម្រោងរៀបអាពាហ៍ពិពាហ៍របស់នាងនៅអំឡុងខែឧសភា នេះ នឹងត្រូវលើកពេលទៅខែវិច្ឆិកា ឆ្នាំ ២០២០ វិញ ដោយសារតែក្តីបារម្ភដូចគ្នា ដែលបង្កឡើងដោយជំងឺកូវីដ ១៩។
តារាកំប្លែងស្រីវ័យ ២០ ឆ្នាំ រូបនេះបង្ហើបពីមូលហេតុពន្យារពេលពិធីមង្គលការនេះថា៖ «ចំពោះមូលហេតុដែលនាងខ្ញុំ និងក្រុមគ្រួសារសម្រេចលើកពេល ដោយសារតែមានហេតុផលចំនួន ២ ចំណុចគឺមកពីរវល់ការងារច្រើនមិនអាចដកឃ្លាបាន និងបញ្ហាជំងឺកូវីដ ១៩ ដែលកំពុងតែកើតមាននៅប្រទេសយើងផងដែរ ហើយការលើកពេលមង្គលការនេះ មិនប៉ះពាល់លើចំណងស្នេហ៍របស់ពួកយើងទេ ព្រោះក្រុមគ្រួសារបានឯកភាពគ្នារួចហើយ ខណៈភ្ញៀវក៏មិនទាន់អញ្ជើញដែរ។
ចំណែកឯទីកន្លែងដែលគ្រោងរៀបចំមង្គលការ ក៏កំពុងសម្រុះសម្រួលគ្នាដែរ។
បើតាមគម្រោងនោះ តារាកំប្លែងវ័យក្មេងកញ្ញា វ៉ាន់ នីឡា នឹងត្រូវចូលរោងការទៅតាមប្រពៃណីខ្មែរជាមួយនឹងគូស្នេហ៍របស់នាង ដែលជាកូនប្រុសរបស់អតីតឯកអគ្គរដ្ឋទូតខ្មែរប្រចាំប្រទេស កូរ៉េខាងត្បូង នៅក្នុងខែឧសភា ឆ្នាំ ២០២០ ខាងមុខនេះ ប៉ុន្តែថ្មីៗនេះ កញ្ញាបានឲ្យដឹងថា នាងនឹងពន្យារពេលរៀបការរហូតទៅដល់ចុងឆ្នាំវិញ គឺអាចនៅខែវិច្ឆិកា ឆ្នាំ ២០២០។
តារាកំប្លែងស្រីវ័យក្មេងមានសម្តីញ៉ែតៗមិនសូវជាចាញ់តារាកំប្លែងរៀមច្បងរួមក្រុមប្រចាំទូរទស្សន៍ CTN & CNC ជាកូនស្រីសំណព្វចិត្តលោក សុវណ្ណ ឫទ្ធី ហៅ តាវ៉ិចទ័រ កញ្ញា នីឡា មានទំនាក់ទំនងស្នេហាជាមួយនឹងគូស្នេហ៍ថ្មីអស់រយៈពេលជាង ២ ឆ្នាំមកហើយ ទើបបានកំណត់រកពេលវេលា ដើម្បីរៀបការនៅឆ្នាំ ២០២០ នេះ។
ជាក់ស្តែងនាពេលថ្មីៗនេះ ក៏មានករណីលើកពេលវេលាមង្គលការរបស់តារាចម្រៀងប្រុស ១ រូបផងដែរគឺលោក ហ៊ុន បរិញ្ញា ដែលនឹងត្រូវចូលរោងជ័យរបស់ខ្លួននៅថ្ងៃទី ២៨ ខែ មីនា ឆ្នាំ ២០២០ ខាងមុខ តែលោកក៏បានរំសាយពិធីមង្គលនេះ ដោយលើកពេលទៅរៀបចំថ្ងៃក្រោយផងដែរ ដោយសារកង្វល់រឿងជំងឺកូវីដ ១៩ ដែលកំពុងតែយាយីនេះ៕
