.jpg)
ឈុតស្រើបស្រាល (លើ) មិនមាននៅក្នុង MV នៃចម្រៀងបទ «ស្រីមុខលុយ» ទេ។ ហ្វេសប៊ុក
ភ្នំពេញៈ សូម្បីតែកញ្ញា វ៉ាន់ វល័ក្ខ ដែលជាតួសម្តែងស្រីក្នុង MV បទចម្រៀងមួយមានចំណងជើងថា «ស្រីមុខលុយ» របស់ផលិតកម្មសាស្តា (Sasda Production) នោះ ក៏មានការងឿងឆ្ងល់ដោយភ្ញាក់ផ្អើលផងដែរ នាពេលបានឃើញការផ្សព្វផ្សាយផ្អើលពេញតាមបណ្តាញសង្គមដោយចោទប្រកាន់ថា ការសម្តែងរបស់នាងមានភាពសិចស៊ី និងមានឈុតស្រើបស្រាល បែបហួសប្រមាណ។
ជាមួយនឹងបណ្តុំរូបថតបែបសិចស៊ី និងឈុតមនោសញ្ចេតនាស៊ីអារម្មណ៍ខ្លាំង ប្រកបដោយភាពស្រើបស្រាលរបស់គូស្នេហ៍នៅលើគ្រែ និងក្នុងបន្ទប់ទឹក តារាស្រីដែលរមែងលែងខ្លួនសិចស៊ី មានកំណើតពីទឹកដីក្រុងស្ទឹងសែនកញ្ញា វ៉ាន់ វល័ក្ខ ប្រាប់ភ្នំពេញប៉ុស្តិ៍ដោយសម្តីបដិសេធទាំងស្រុងថា៖ «ជាការពិតនោះ ឈុតថតស្រើបស្រាលមានសម្លៀកបំពាក់ពណ៌ខ្មៅ និងឈុតនៅក្នុងបន្ទប់ទឹកនោះ មិនមែនជាការថតនៅក្នុង MV នៃបទ «ស្រីមុខលុយ» ដែលនាងខ្ញុំបានថតនោះឡើយ។ ប្រសិនបើនាងខ្ញុំមានថតឈុតសិចស៊ីខ្លាំង ឬស្រើបស្រាលខ្លាំង ដូចជាគេចោទនោះមែន ក៏ខ្ញុំទទួលស្គាល់ដែរ តែនេះអត់មានសោះ។ ខ្ញុំក៏ឆ្ងល់ដែរថា មិនដឹងគេយករូបទាំងនោះមកពីណាទេ កូរនៅបទរបស់នាងខ្ញុំសម្តែងទៅវិញ»។
កញ្ញា វ៉ាន់ វល័ក្ខ តារាស្រីដែលទើបតែប្រកាសចំណាយប្រាក់ខ្ទង់ជាង ១០ ម៉ឺនដុល្លារ ដើម្បីទិញរថយន្តស៊េរីទំនើបម៉ាកឡង់គ្រីស័រនោះបានបន្តថា៖ «បើ MV បទដែលខ្ញុំថត មានឈុតទាំងនោះមែន ហើយត្រូវក្រសួងកោះហៅសួរមែនខ្ញុំនឹងតវ៉ាឲ្យដឹងគ្នាផងដែរជាមួយផលិតកម្ម»។
ឮថាក្រសួងវប្បធម៌ និងវិចិត្រសិល្បៈ ត្រៀមកោះហៅទាំង អ្នកដឹកនាំ និងតារាសម្ដែង ដែលថតនៅក្នុងវីដេអូបទ «ស្រីមុខលុយ» ដែលបកស្រាយដោយតារាចម្រៀងប្រុស ឈិន ធារ៉ាដេត យកមកដុសក្អែល បន្ទាប់ពីគេបានឃើញវីដេអូនេះ ត្រូវរងការរិះគន់យ៉ាងចាស់ដៃពីមហាជននៅតាមបណ្ដាញសង្គមមកនោះ។
លោក អ៊ុក រតនា ជាអ្នកគ្រប់គ្រងទូទៅផលិតកម្មសាស្តា ក៏បង្ហើបពីរឿងបទ «ស្រីមុខលុយ» រងការរិះគន់នោះដែរថា៖ «តាមពិតទៅយើងបានទៅបំភ្លឺជាមួយនឹងក្រសួងកាលពីសប្តាហ៍មុន និងធ្វើកិច្ចសន្យាព្រមទាំងចេញសេចក្តីប្រកាសសុំទោសផងដែរពីភាពខុសឆ្គង។ យើងក៏បានសម្រួលនូវឈុតឆាកណាមិនសមរម្យដែលកើតមានសម្រាប់ផលិតកម្មយើង។ តែក៏មានរឿងខ្លះ ត្រូវបានគេយករូបផ្សេងៗមក Troll នៅក្នុងបទចម្រៀងយើង ដែលធ្វើឲ្យមានប្រតិកម្មពីខាងតារាសម្តែងស្រីទៀតផង»។
គួរកត់សម្គាល់ថា ហេតុនាំឲ្យចម្រូងចម្រាសគ្នានៃភាពសិចស៊ី និងឈុតស្រើបស្រាលក្នុងវីដេអូឃ្លីប និងរូបភាពនោះ មានពាក់ព័ន្ធនឹងប្រភពបទចម្រៀង ២ នៅក្នុងផលិតកម្ម ២ ខុសគ្នា។ បើតាមការពិនិត្យមើល បទ «ស្រីមុខលុយ» នៅផលិតកម្មសាស្តា មិនមានឈុតស្រើបស្រាលខ្លាំងឡើយ ខណៈដែលឈុតទាំងនោះត្រូវបានគេប្រទះឃើញក្នុងបទ «ក្បត់ក៏បានមិនក្បត់ក៏បាន» នៃផលិតកម្មសាស្តាដូចគ្នា ដែលច្រៀងដោយតារាចម្រៀងស្រីកញ្ញា អេនណា ទៅវិញ៕
