សៀមរាប: សណ្ឋាគារទើបបើកថ្មី Memoire Palace Resort & Spa រចនាប័ទ្មបែបសម័យបារាំង បានចាប់យកគោលការណ៍សេវាកម្មគ្មានប្លាស្ទិកក្នុងវិស័យបដិសណ្ឋារកិច្ចក្នុងក្រុងសៀមរាប និងប្រកាសបើកពិព័រណ៍ស្នាដៃសិល្បៈសហសម័យរបស់សិល្បករក្នុងស្រុកស្ដីពីបញ្ហាបរិស្ថាន និងក្ដីកង្វល់នៃការប្រើប្រាស់ប្លាស្ទិក ដែលជះឥទ្ធិពលអាក្រក់ដល់កូនចៅជំនាន់ក្រោយ។
ផ្ដើមពីសិល្បករខ្មែរលោក ភើ សុផុន នៅថ្ងៃបើកសម្ពោធ បានបង្ហាញស្នាដៃសិល្បៈដំឡើង «Water Shed» ស្ដីពីបរិស្ថាន ដែលលោកបានប្រើប្រាស់ដបទឹកបរិសុទ្ធ ៧០០០ ដប ច្នៃជាវត្ថុក្នុងទម្រង់ផ្សេងៗ ដើម្បីទាក់ទាញចំណាប់អារម្មណ៍អ្នកចូលរួមឲ្យគិតគូរដល់កង្វល់នៃការប្រើប្រាស់ប្លាស្ទិក។
ជាសិល្បករច្នៃដបទឹកសុទ្ធបង្ហាញផលប៉ះពាល់បរិស្ថានដែលផ្ដើមពីការរចនាជាអក្សរ «ភ្នំពេញ» រូប «ខួរក្បាល» «ចេតិយ» «មកុដ» «តំណក់ទឹក» និង «ស្នូកខ្យង» ជាដើម លោក សុផុន ចង់ឆ្លុះបញ្ចាំងពីការដាំដុះរីកការគិត និងការកែច្នៃរបស់មនុស្ស។
សិល្បកររូបនេះបានប្រាប់ថា៖ «រូបនីមួយៗ មុននឹងចេញជារូបរាងខ្ញុំគិតណាស់ ខ្ញុំមានអំណះអំណាងរបស់ខ្ញុំ។ ពេលខ្លះខ្ញុំឃើញ environment ជុំវិញអ្នកបោះចោលសំរាម។ អ្នកមានធូរធារគាត់រស់នៅមិនខ្វាយខ្វល់ ហើយអ្នកក្រីក្រ គាត់រស់នៅបែបអ៊ីចេះ។ វាចាប់ផ្ដើមឲ្យខួរក្បាលរបស់យើងគិតថា តើគួរយកអ្វីមកធ្វើកើត?»។
អ្នកស្រី Marina Pok អគ្គនាយិកាអង្គការ Anicca Foundation បានប្រាប់មូលហេតុផ្ដួចផ្ដើមពិព័រណ៍ Water Shed នៅ Memoire Palace ថា៖ «សណ្ឋាគារនេះ មានយុទ្ធនាការមិនប្រើប្លាស្ទិក។ គាត់ពិតជាយកចិត្ដទុកដាក់ចំពោះបរិស្ថាន។ លោក សុផុន ជាសិល្បករ វ័យក្មេងមកពីភ្នំពេញ។ គាត់បារម្ភពីបញ្ហាបរិស្ថាន»។
ក្រៅពីមុខជំនួញក្នុងវិស័យបដិសណ្ឋារកិច្ច សណ្ឋាគារដែលរចនា បែបសម័យបារាំង ទសវត្សរ៍ទី ៤០ និង ៥០ នេះក៏បានកាត់បន្ថយប្រើប្រាស់ប្លាស្ទិកក្នុងប្រតិបត្តិការផងដែរ។
លោក ងួន វែងឆាយ ជានាយកគ្រប់គ្រងទូទៅនៃសណ្ឋាគារ Memoire Palace Resort & Spa បាននិយាយថា៖ «យើងចាប់ផ្ដើមផលិតទឹកខ្លួនឯង។ យើងផលិតទុយោបឺតពីស្រទាប់ដើមស្លឹកគ្រៃ។ ផ្ដើមពីគំនិតនេះ យើងចង់បង្កើតពិព័រណ៍មួយដែលជាការ អប់រំផ្លូវការដើម្បីឲ្យអ្នកចូលរួមបានស្វែងយល់ពីកង្វក់ចំពោះបរិស្ថាន»។
នាយកគ្រប់គ្រងទូទៅរូបនេះ ទទួលស្គាល់ថា៖ «ទោះយើងមិនធ្វើបានច្រើន តែយើងអាចកាត់បន្ថយមួយចំនួនតូច។ អ្វីដែលសំខាន់ យើងជួយអប់រំបុគ្គលិកឲ្យយល់ដូចគ្នា ដើម្បីឲ្យគាត់ត្រឡប់ទៅផ្ទះវិញ គាត់បន្ដប្រាប់មិត្ដភក្ដិ និងក្រុមគ្រួសារ»។
គោលការណ៍គ្មានប្លាស្ទិកនៅទីឋានបណ្ដុំមនុស្សម្នាមកពីគ្រប់ច្រកល្ហកនៃពិភពលោក លោក វែងឆាយ សារភាពថា Memoire Palace ត្រូវចំណាយខ្ពស់ជាងការប្រើប្លាស្ទិក ប៉ុន្ដែលោកមិនឲ្យកូនខ្មែរជំនាន់ក្រោយបន្ទោសចាស់ជំនាន់នេះ ហើយលោកក៏ចង់ឲ្យភូមិស្រុកមានបរិស្ថានស្អាត។
លោកបានប្រាប់ថា៖ «២០ ឆ្នាំ ក្រោយ យើងមិនចង់ឲ្យកូនចៅយើងសួរថា រឿងរ៉ាវកើតឡើងនេះដោយសារតែជំនាន់ប៉ាឯង ឬតាឯងនោះទេ។ ហេតុអ្វីអ្នកទាំងអស់គ្នាមិនធ្វើ? ហើយហេតុអ្វីក៏ចាំដល់ចៅៗជាអ្នកធ្វើបែបនេះ? យើងមិនចង់ឲ្យក្មេងជំនាន់ក្រោយស្ដីបន្ទោសយើងនោះទេ»។
ភ្លៀវដែលចូលរួមក្នុងឱកាសបើកសម្ពោធពិព័រណ៍បរិស្ថាននេះ បានភ្លក្សអាហារសម្រន់ ដែលត្រូវបានច្នៃជារូបរាងវត្ថុប្លាស្ទិកផ្សេងៗផងដែរ។
ពិព័រណ៍ Water Shed ស្ថិតនៅសណ្ឋាគារ Memoire Palace Resort & Spa ស្ថិតលើវិថីផ្សារក្រោម ភូមិវិហារចិន សង្កាត់ស្វាយដង្គំ នឹងបន្តដាក់តាំងរហូតដល់ខែវិច្ឆិកា៕
វីដេអូ៖