The Phnom Penh Post Search

Search form




Logo of Phnom Penh Post newspaper Phnom Penh Post - សណ្ឋា​គារ​អាង​ហែល​ទឹក​កញ្ចក់​ដំបូង​បង្អស់​នៅ​ភ្នំពេញ​




សណ្ឋា​គារ​អាង​ហែល​ទឹក​កញ្ចក់​ដំបូង​បង្អស់​នៅ​ភ្នំពេញ​

Content image - Phnom Penh Post
ហាង​កញ្ចក់​ដែល​អាច​ឲ្យ​យើង​មើលឃើញ​អ្នក​ហែល​ទឹក​ពី​លើ​ និង​ពី​ចំហៀង​។ រូប សហការី

សណ្ឋា​គារ​អាង​ហែល​ទឹក​កញ្ចក់​ដំបូង​បង្អស់​នៅ​ភ្នំពេញ​

ភ្នំពេញ: ស្ថិតនៅ​លើ​កំពូល​អគារ​ដ៏​ស្កឹមស្កៃ អាង​កញ្ចក់​ដ៏ថ្លា​ឆ្វង់​ចាំង​ឆ្លុះ​កាយវិការ​អ្នកហែល​ទឹកយ៉ាង​ល្វតល្វន់​ ដែល​នេះជា​ទស្សនីយ​ភាព​ពុំធ្លាប់​មាន​ឡើយនៅ​ភ្នំពេញ។

អាង​ហែលមាន​ជញ្ជាំង​កញ្ចក់​រំលេច​ទឹក​ពណ៌ខៀវ​ហ៊ុមព័ទ្ធ​រុក្ខជាតិ​ បៃតង បន្ទប់​គេង​ទំនើប​លម្អដោយ​ឃ្លា​អក្សរ​ខ្មែរដ៏​កក់ក្ដៅ រសជាតិ​អាហារ និង​ស្រា​ក្រឡុក​ដ៏ឆ្ងាញ់​ បាន​ធ្វើឲ្យ​សណ្ឋាគារ​ Aquarius Hotel & Urban Resort ដែល​ទើបតែ​បើកថ្មី​ថ្មោង​ ស័ក្ដិសម​ជាទីឋាន​លម្ហែ​កាយ​រំសាយ​ភាព​តានតឹង​នៃ​ជីវភាព​ដ៏​មមា​ញឹក។

នៅខាង​លិច​ព្រះបរម​រាជវាំង អគារ​ពណ៌​ត្នោត​ផុស​ខ្ពស់​មើលទៅ​គួរឲ្យ​ទាក់ភ្នែក​មែន​ទែន។ ឈាន​ជើង​ចូលទៅ​សណ្ឋាគារ​ភ្លាម អ្វីដែល​ទាក់ចិត្ត​បំផុតគឺ​កន្លែង​ទទួល​ភ្ញៀវ​មាន​ដាក់​តាំង​ព្យញ្ជនៈ​ខ្មែរធំៗ ដូចជា​អក្សរ ឈ ណ រង និង ន​ ជាដើម។

កន្លែង​អង្គុយ​រង់ចាំ​មាន​ដាក់តាំង​ផ្ទាំង​រូបគំនូរ និង​រូបថត​បែប​សិល្បៈជា​ស្នាដៃ​កូនខ្មែរ។

Content image - Phnom Penh Post
ស្ដេក​សាច់គោ​នៅ​ភោជ​នីយ​ដ្ឋាន​ជាន់​លើ​​។ ឈឹម ស្រីនាង

ម្ចាស់​សណ្ឋាគារ លោក ជុង ហ៊ីចាង (Jung Hee Jang) ឲ្យដឹង​ថា៖ «ខ្ញុំធ្វើ​សណ្ឋាគារ​នេះឡើង​ដើម្បី​ទាក់ទាញ​ភ្ញៀវជាតិ​ និង​​អន្តរជាតិ​តាមរយៈ​បែបបទ ការ​រចនា​ថ្មីប្លែក​គឺការ​លាយឡំ​ម៉ូដ​ទាន់សម័យ​និង​ក្បាច់​បុរាណ​ខ្លះ​របស់​ខ្មែរ»។

អ្នក​ជំនួញ​ជន​ជាតិ​កូរ៉េ​រូបនេះ​បាន​ថ្លែងទៀត​ថា៖ «ការ​ដាក់តាំង​តួអក្សរ​ និង​ព្យព្ជានៈ​ខ្មែរ​នៅតាម​បន្ទប់​នីមួយៗ​ដូចជា​ពាក្យ​ថា ជម្រាប​សួរ សុខភាព​ល្អ អ្នកសុខ​សប្បាយ​ទេ និង​ពាក្យ​សិរីសួស្ដី​ជាច្រើន​ទៀតក្នុង​បន្ទប់​នីមួយៗ។ ធ្វើបែប​នេះ​ ចង់ឲ្យ​​ភ្ញៀវ​ដែល​មកលេង​ស្រុកខ្មែរ​បាន​ស្គាល់ពី​តួអក្សរ​ខ្មែរ និង​ចេះនិយាយ​ពាក្យ​សួស្តី​ខ្លះៗជា​ភាសាខ្មែរ»។

Content image - Phnom Penh Post
បន្ទប់​ស្នាក់​រចនា​ប័ទ្ម​ទំនើប​មាន​លម្អ​ដោយ​អក្សរ​ខ្មែរ។ រូប សហការី

សណ្ឋាគារ​នេះ​ក៏មាន​ភោជនីយ​ដ្ឋាន​បម្រើ​អាហារ​ខ្មែរ អាស៊ី ​អឺរ៉ុប និង Skybar នៅលើ​ដំបូល ដែល​អាចឲ្យ​ភ្ញៀវគយគន់​ទេសភាព​រាជធានី​ភ្នំពេញ​ផងដែរ។ អ្វី​ពិសេស​នោះ​គឺអាង​ហែល​ទឹកកញ្ចក់ ដែល​អាចឲ្យ​ភ្ញៀវមើល​ឃើញ​អ្នក​ហែល​ទឹកនៅ​ក្នុង​អាងពី​ជញ្ជាំង​ចំហៀង។ ភ្ញៀវមិន​ស្នាក់នៅ​សណ្ឋាគារ​ត្រូវបង់​ថ្លៃហែល​ទឹក​ម្នាក់ ១២ ដុល្លារ។

លោក ជុង បាន​ថ្លែង​ថា៖ «អាង​ទឹកកញ្ចក់​ឆ្លុះឃើញ​ពេល​យើង​កំពុង​ហែល​បែបនេះ​យើងអាច​និយាយ​ថា​ មិន​ទាន់​ឃើញ​មាននៅ​ទីក្រុង​ភ្នំពេញ​នៅ​ឡើយទេ»។

សណ្ឋាគារ Aquarius Hotel & Urban Resort ស្ថិត​នៅ ផ្ទះ​លេខ៥ ផ្លូវ ២៤០ សង្កាត់​ចតុមុខ ខណ្ឌ​ដូនពេញ​រាជធានី​ភ្នំពេញ​៕​

អត្ថបទគួរចាប់អារម្មណ៍