.jpg)
ស្វាអ៊ូរ៉ង់ ១០ ក្បាល ត្រូវបានលើកពន្យួរលើអាកាសតាមឧទ្ធម្ភាគចក្រទៅកាន់ជម្រកធម្មជាតិនៃដែនកោះបូណេអូ ប្រទេសឥណ្ឌូនេស៊ី។ AFP
ក្រុងហ្សាការតា៖ ស្វាអ៊ូរ៉ង់ ១០ ក្បាល ត្រូវបានលើកពន្យួរលើអាកាសតាមឧទ្ធម្ភាគចក្រទៅកាន់ជម្រកធម្មជាតិនៃដែនកោះបូណេអូ ប្រទេសឥណ្ឌូនេស៊ី ក្នុងយុទ្ធនាការដោះលែងស្វាធំទៅកាន់ព្រៃជាលើកដំបូងក្នុងរយៈពេលមួយឆ្នាំដោយសារវិបត្ដិកូវីដ ១៩។
សត្វទាំងនោះត្រូវបានដឹកតាមអាកាសឆ្លងកាត់ព្រៃព្រឹក្សាកាលពីដើមខែ ដើម្បីបញ្ជៀសការធ្វើដំណើរដ៏វែងឆ្ងាយតាមផ្លូវគោក និងឆ្លងសមុទ្រ ដែលអាចបង្កហានិភ័យឱ្យពួកវាឆ្លងវីរុស។
ស្វាអ៊ូរ៉ង់ មានហ្សែនឌីអិនអេមនុស្ស ៩៧ ភាគរយ ដែលក្រុមអ្នកអភិរក្សបានព្រមានពីលទ្ធភាពអាចឆ្លងវីរុសខ្ពស់។ វិបត្ដិកូវីដសកល បានបង្កក្ដីកង្វល់ដល់ក្រុមអ្នកអភិវឌ្ឍក្នុងការបំលាស់ទីពួកវា។
ស្វាអ៊ូរ៉ង់ មានហ្សែនឌីអិនអេមនុស្ស ៩៧ភាគរយ ដែលក្រុមអ្នកអភិរក្សបានព្រមានពីលទ្ធភាពអាចឆ្លងវីរុសខ្ពស់។ AFP
លោក ចាម៉ាទីន ស៊ីហ៊ីត នាយកប្រតិបត្ដិអង្គការមូលនិធិនៃការរស់រានរបស់ស្វាអ៊ូរ៉ង់នៅកោះបូណេអូ (BOSF) បាននិយាយថា៖ «ពេញមួយឆ្នាំយើងមិនអាចធ្វើពិធីដោះលែងសត្វទាំងនេះឡើយ ដោយសារវិបត្ដិកូវីដសកល។ យើងបានអនុវត្ដគោលការណ៍សុវត្ថិភាពតឹងរ៉ឹង និងដាក់ចេញនូវផែនការកាត់បន្ថយហានិភ័យនៃលទ្ធភាពឆ្លងវីរុស។ ការប្រើប្រាស់ឧទ្ធម្ភាគចក្រជួយកាត់បន្ថយហានិភ័យនៃការរីករាលដាលជំងឺឆ្លង»។
សត្វរោមក្រញ៉ាញ់ត្រូវបានបាញ់ថ្នាំសណ្ដំមុនពេលធ្វើការហោះហើរ និងដាក់ឱ្យនៅក្នុងទ្រុងរុំសំណាញ់។ យ៉ាងហោចណាស់ ស្វាមុខព្រះចន្ទនេះមួយក្បាលបានប្រឹងបុកទ្រុងដែក ពេលវាព្យាយាមគេចពីស្ថានភាពតែងតោលលើអាកាស។
វិបត្ដិកូវីដសកល បានបង្កក្ដីកង្វល់ដល់ក្រុមអ្នកអភិវឌ្ឍក្នុងការបំលាស់ទីពួកវា។ AFP
សត្វស្វាអ៊ូរ៉ង់ ធ្វើដំណើរតាមទូករយៈពេលខ្លី ក្រោយជិតដល់គោលដៅមុនពេលប្រលែងក្នុងតំបន់ព្រៃការពារបាទីកាបភាគកណ្ដាលកាលីម៉ាន់តាន់ ជាផ្នែកមួយនៃដែនកោះបូណេអូរបស់ឥណ្ឌូនេស៊ី។
សត្វស្វាជាច្រើនក្បាលក៏ត្រូវបានប្រលែងចូលព្រៃផ្សេងទៀតនៅភាគខាងកើតកាលីម៉ាន់តាន់ផងដែរ។ ការបរបាញ់ និងការបាត់បង់ជម្រកធម្មជាតិ បានរំខានដល់ចំនួនសត្វស្វាអ៊ូរ៉ង់នៅតំបន់អាស៊ីអាគ្នេយ៍ មុនពេលវិបត្ដិកូរ៉ូណាវាយលុក ដែលកាន់តែជំរុញឱ្យអម្បូរសត្វនេះខិតទៅជិតការវិនាសសាបសូន្យ។
វីវីវីសាន់ទី ជាពេទ្យសត្វមកពី BOSF បានឱ្យដឹងថា៖ «បើសត្វស្វាអ៊ូរ៉ង់មួយក្បាលបង្ហាញអាការរោគសញ្ញាផ្លូវដង្ហើម វាអាចឆ្លងជំងឺកូវីដ។ លើសពីនេះបើបុគ្គលិកណាម្នាក់តេស្ដវិជ្ជមាន យើងនឹងធ្វើការតាមដានលើសត្វស្វាអ៊ូរ៉ង់ពីលទ្ធភាពឆ្លងផងដែរ»៕ AFP/HR
ស្វាអ៊ូរ៉ង់ ១០ក្បាលត្រូវបានលើកពន្យួរលើអាកាសតាមឧទ្ធម្ភាគចក្រទៅកាន់ជម្រកធម្មជាតិនៃដែនកោះបូណេអូ ប្រទេសឥណ្ឌូនេស៊ី។ AFP
