ភ្នំពេញ៖ តាំងពីជួបវិបត្ដិសកលកូវីដ ភ្ញៀវទេសចរត្រូវបានរារ៉ាំងមិនឱ្យមានការធ្វើដំណើរ ដែលជាហេតុធ្វើឱ្យទឹកដីអង្គរនៅខេត្តសៀមរាបរងការប៉ះពាល់ខ្លាំងបំផុតទៅដល់ប្រជាជនដែលប្រកបរបរលក់ដូរ។
សភាពាណិជ្ជកម្មបារាំងប្រចាំនៅសៀមរាបបានព្យាយាមរិះរកវិធីការជួយដល់សមាជិករបស់ពួកគាត់ក៏ដូចជាប្រជាជនដទៃទៀតដែលរងវិបិត្តិនេះដូចគ្នា។
លោក រ៉ូមេនណូ ព្យែអេនដ្រេ និងដៃគូលោកបីនាក់ទៀតបានរៀបចំការបើកលក់ជាលក្ខណៈបណ្ដោះអាសន្ននៅភ្នំពេញដោយយល់ថានៅទីក្រុងមិនសូវជាមានផលប៉ះពាល់ប៉ុន្មាននិងទីផ្សារនៅតែសកម្មទាំងសម្រាប់ប្រជាជនកម្ពុជា ក៏ដូចជាជនបរទេស។
ជាប្រធានសភាពាណិជ្ជកម្មបារាំងនិងជាប្រធាន Beyond Retail Business លោក ព្យែអេនដ្រេ បានប្រាប់ពីគោលបំណងនៃកម្មវិធីនេះថា៖ «កម្មវិធីដែលនឹងដំណើរការបីថ្ងៃចាប់ពីថ្ងៃទី ២៩ ដល់ទី ៣១ ខែមករានេះ ជាកម្មវិធីតាំងពិព័រណ៍អំពីផលិតកម្ម និងសិប្បកម្ម របស់សិប្បករនៅសៀមរាបដែលអ្នកខ្លះមិនទាន់មានអ្នកស្គាល់នៅឡើយ។ បើសិនជាកម្មវិធីនេះជោគជ័យ យើងនឹងមានការចាប់ផ្ដើមច្រើនទៀតរួមទាំងអាចបោះទីតាំងអចិន្រ្តៃយ៍នៅទីនេះតែម្ដង»។
នៅក្នុងការតាំងពិព័រណ៍នេះនឹងមានការលក់គ្រឿងតុបតែង ផលិតផលសុខភាព ហ្វាសសិន គ្រឿងអលង្ការ ចំណីអាហារ គ្រឿងសង្ហារឹមនិងសម្ភារសិប្បកម្មផ្សេងៗទៀត។
ជាង ២០ ឆ្នាំ ដែលលោកព្យែអេនដ្រេបានឡើងចុះបារាំង-កម្ពុជាញឹកញយ បានលើកសរសើរពីស្នាដៃរបស់សិប្បករខ្មែរថា៖ «អ្នកដែលចូលរួមគឺពួកគាត់សុទ្ធតែមានទឹកដៃដ៏គួរឱ្យកោតសរសើរ។ អតិថិជនដែលចូលរួមនឹងទទួលបាននូវផលិតផលមានទាំងគុណភាព សោភ័ណភាព ក៏ដូចជាទទួលបាននូវចំណេះដឹងពីអ្នកជំនាញដ៏ប៉ិនប្រសព្វ។ ពួកគាត់នឹងរៀបរាប់ត្រួសៗនូវវិធីធ្វើ និងហេតុអ្វីដែលយើងគួរតែទិញផលិតផលខ្មែរ»។
លោកបានបន្ថែមទៀតថា៖ «សម្រាប់ការទិញវត្ថុទាំងអស់នេះវានឹងគឺជាការចូលរួមគាំទ្រសេដ្ឋកិច្ចក្នុងស្រុកជាការថែរក្សាតម្លៃនៃការងារនិងទេពកោសល្យរបស់ពួកគាត់ ការពារកេរដំណែលនិងប្រពៃណីនៃភាពប៉ិនប្រសព្វ ការធ្វើឱ្យលូតលាស់ទៅលើការច្នៃប្រឌិត និងជាអ្នកចូលរួមចំណែកមានមោទនភាពលើទឹកដីរាជាណាចក្រ»។
សិប្បករដែលចូលរួមទាំងឡាយពួកគាត់នឹងទទួលបានទីផ្សារបើកលក់មួយដោយមិនចាំបាច់ចេញមុខដោយខ្លួនឯង។ ពួកគាត់អាចទទួលបានផលប្រយោជន៍នៅក្នុងការស្វែងរកអតិថិជននិងទំនាក់ទំនងក៏ដូចជាបង្ហាញនូវអ្វីដែលគាត់មាន។
សម្រាប់ក្ដីរំពឹងទុកដែលលោកមានចំពោះការតាំងពិព័រណ៍នៅរាជធានាភ្នំពេញជាលើកដំបូង លោកសង្ឃឹមថាវាគឺជាចំណុចចាប់ផ្ដើម ឬជាបង្អួចនៃភាពជោគជ័យសម្រាប់ផលិតផលខ្មែរនិងអាចជាជំហានភ្ជាប់ពីផលិតផលរបស់សៀមរាបទៅតាមខេត្តក្រុងនានា។
កម្មវិធីដែលលោកទើបតែបានរៀបចំឡើងកាលពីខែវិច្ឆិកាឆ្នាំទៅនៅទីក្រុងតៃប៉ិ។ វាគឺមានទាំងជាការលក់អនឡាញ និងដាក់លក់តាមតូប។
ដោយបានរៀបចំឡើងជាតូបផលិតកម្មខ្មែរសម្រាប់អតិថិជននៅតៃវ៉ាន់ផ្ទាល់ ដែលមានការដាក់តាំងវត្ថុជាង ១០ និងដាក់លក់អនឡាញតាមវេបសាយសម្រាប់ជនបរទេសពីបណ្ដាលប្រទេសផ្សេងៗជាការបង្ហាញពីអ្វីដែលខ្មែរមាន ហើយវាទទួលបានលទ្ធផលយ៉ាងល្អពីសំណាក់អតិថិជននៅតៃវ៉ាន់និងអ្នកទិញតាមអនឡាញ។
ជាចុងក្រោយលោក ព្យែអេនដ្រេ បានផ្ដាំផ្ញើរទៅអតិថិជនថា៖ «ខ្ញុំសូមឱ្យអតិថិជនបានមកចូលរួមការតាំងពិព័រណ៍ ក៏ដូចជាគាំទ្រទិញវត្ថុមួយចំនួនសម្រាប់ជាការគាំទ្រត្រឡប់ទៅវិញ ពីព្រោះវាជាមោទនភាពពិតនៃការបង្កើតសម្ភារអស់នេះឡើង»។
លោកបន្ដថា៖ «ខ្ញុំសង្ឃឹមថានឹងមានប្រជាជនខ្មែរចូលរូម ច្រើនក៏ដូចជាចង់អរគុណទៅដល់អ្នកឧបត្ថម្ភមកពី Cellcard និង Wing ដែលសកម្មក្នុងការចូលរួមជាមួយពួកយើងទៅលើបណ្តាញសង្គមក្នុងសប្ដាហ៍នេះ ក៏ដូចជាជនបរទេសដែលរស់នៅទីក្រុងភ្នំពេញផងដែរ»។
ពិព័រណ៍ផលិតផលក្នុងខេត្ដសៀមរាប ចាប់បើកពីថ្ងៃទី ២៩ វេលាម៉ោង ១ រសៀល ដល់ម៉ោង ៥ ល្ងាចសម្រាប់អ្នកពាក់ព័ន្ធទាក់ទងនឹងវិស័យនេះ។
ចំណែកឯចាប់ពីថ្ងៃទី ៣០ ដល់ ៣១ នឹងបើកជាសាធារណៈដោយសេរីចាប់ពីម៉ោង ១០ ព្រឹករហូតដល់ម៉ោង ៦ ល្ងាច។
សម្រាប់ព័ត៌មានបន្ថែមសុំចូលទៅកាន់ហ្វេសប៊ុក @MadeinSiemReapFair៕