The Phnom Penh Post Search

Search form




Logo of Phnom Penh Post newspaper Phnom Penh Post - សមធម៌​ ផលិត​ម៉ាស់​​ពី​សរសៃ​ដើម​ឈូក​លើក​​ស្ទួយ​ជីវភាព​ស្ត្រី​ខ្មែរ

សមធម៌​ ផលិត​ម៉ាស់​​ពី​សរសៃ​ដើម​ឈូក​លើក​​ស្ទួយ​ជីវភាព​ស្ត្រី​ខ្មែរ

Content image - Phnom Penh Post
ម៉ាស់​ធ្វើពី​ក្រណាត់​សរសៃឈូកទន់ល្មើយ និង​មិនប៉ះពាល់សុខភាព​​​។ រូបថត សហ​ការី

សមធម៌​ ផលិត​ម៉ាស់​​ពី​សរសៃ​ដើម​ឈូក​លើក​​ស្ទួយ​ជីវភាព​ស្ត្រី​ខ្មែរ

សៀមរាប៖ ជា​​​​រុក្ខជាតិ​​ត្រូវ​បាន​ប្រទះ​ឃើញ​ក្នុង​បឹង​ ឬ​ចោល​តាម​គំនរ​សំរាម​ ដើម​ឈូក​ត្រូវ​បាន​អ្នក​ច្នៃ​ម៉ូដ​ជនជាតិ​បារាំង​ប្រើប្រាស់​ផលិត​​ម៉ាស់​ពាក់​ដ៏​ទន់ល្មើយ​ ដើម្បី​បំពេញ​តម្រូវ​ការ​​អតិថិជន​ក្នុង​ និង​ក្រៅ​ស្រុក​​​ ដែល​និយម​​វាយណភណ្ឌ​​ពី​ធម្មជាតិ​។

ក្នុង​បំណង​អភិរក្ស​សិប្បកម្ម​​បុរាណ​បន្សល់​​ទុក​ពី​ដូនតា​ និង​ផ្តល់​ឱកាស​ការងារ​ដល់​ស្រី្ត​ខ្មែរ​នៅ​តាម​តំបន់​ជនបទ​​លោក​ Awen Delaval ជា​អ្នក​ច្នៃម៉ូដ​ជនជាតិ​បារាំង​​ ដែល​គិតគូរ​ពី​​បរិស្ថាន​បាន​​ចំណាយ​ពេល​ជា​ច្រើន​​សិក្សា​ស្រាវជ្រាវ​​​​បច្ចេកទេស​របស់​បុព្វបុរស​ក្នុង​ការ​ផលិត​ក្រណាត់​​ចេញពី​សរសៃ​ឈូក។

ក្រោយ​ពី​បាន​ស្វែង​យល់​ពី​សិប្បកម្ម​​តម្បាញ​​ពី​សរសៃ​ឈូក លោក​ក៏​​បាន​រៀបចំ​កន្លែង​ពិសោធន៍​មួយ​ក្នុង​ខេត្ត​សៀមរាប នៅ​ក្នុង​ឆ្នាំ ​២០០៩​។

ស្ថាបនិក និង​ជា​អ្នក​ឌីហ្សាញ​រូប​នេះ​ក៏​លើក​ឡើង​បន្ថែម​ថា​៖ «ផ្កាឈូក​ ជា​និមិត្ត​សញ្ញា​នៃ​ភាព​ថ្លៃថ្នូរ​ ភាព​ស្រស់​ស្អាត​ និង​ភាព​បរិសុទ្ធ​។ ដូច្នេះ​ហើយ​​ «សមធម៌» ​កំណត់​ផ្កាឈូក​ជា​អត្តសញ្ញាណ​របស់​ក្រុមហ៊ុន​ដែល​តំណាង​​ឲ្យ​ភាព​ល្អ​ឥតខ្ចោះ​»។

«សមធម៌» មាន​ជំនឿ​ទៅ​លើ​និមិត្ត​សញ្ញា​នៃ​ភាព​រឹងមាំ​របស់​​សរសៃ​ឈូក​ ជា​ការ​រួម​ចំណែក​​អភិវឌ្ឍ​សេដ្ឋកិច្ច​ សង្គម​ និង​បរិស្ថាន​ ដើម្បី​ជួយ​ស្ត្រី​រងគ្រោះ​មក​ពី​ភូមិ​តូចៗ​ក្នុង​តំបន់​ជនបទ​ឲ្យ​រឹងមាំ​អាច​​រក​ប្រាក់​ចំណូល​ចិញ្ចឹម​​ខ្លួន​ឯង និង​ក្រុម​គ្រួសារ​បាន​។​

ជោគជ័យ​ក្នុង​ការ​ផលិត​ក្រណាត់​​សរសៃ​ឈូក​នេះ ​គឺ​ក្នុង​ឆ្នាំ ​២០១៦​ ​​បន្ទាប់​​ពី​លោក​បាន​សាកល្បង​​ធ្វើ​តេស្ត​ការ​ផលិត​សរសៃ​ឈូក​នេះ​នៅ​មន្ទីរ​ពិសោធន៍​ដ៏​ល្បីល្បាញ​​របស់​បារាំង​មាន​ឈ្មោះ​ថា​ French Institute Of Textile and Garment។

Content image - Phnom Penh Post
ក្រោយ​ពីដើមឈូក​ត្រូវ​បាន​សម្អាត​រួច បុគ្គលិក​ សមធម៌​​ កាច់​​​​ទាញយក​សរសៃ​ឈូក​នៅលើ​តុ​រាង​ទ្រវែង​។ រូបថត ភ្នំពេញ ប៉ុស្ដិ៍

ដើម្បី​បាន​ប្រភព​ដែល​អាច​ផ្គត់ផ្គង់​ដើម​ឈូក​​​ល្អ​ លោក​បាន​​ជ្រើសរើស​យក​បឹង​កំពីងពួយ​នៅ​ខេត្ត​បាត់ដំបង ​ធ្វើ​ជា​ទី​យក​​វត្ថុ​ធាតុ​ដើម ​«ដើម​ឈូក​»។

អ្នក​ច្នៃ​ម៉ូដ​ជនជាតិ​បារាំង​រូប​នេះ​បាន​​ពន្យល់​ថា​ ការ​ផលិត​ក្រណាត់​ចេញ​ពី​សរសៃ​ឈូក​ ពិត​ជា​ចំណាយ​កម្លាំង​​ និង​​ការ​អត់ធ្មត់​ខ្លាំង។ កម្លាំង​​​ក្នុង​សិប្បកម្ម​ ភាគ​ច្រើន​​ជា​មនុស្ស​ស្រី​ ដែល​ធ្វើ​ការ​យ៉ាង​​​ផ្ចិតផ្ចង់​បំផុត​ ដើម្បី​​ផលិត​សរសៃ​ឈូក​​ឲ្យ​បាន​ស្អាត​ល្អ។

រៀង​រាល់​ល្ងាច​ ​មនុស្ស​ម្នាក់​ត្រូវ​ប្រើ​ពេល​​ ៤ ម៉ោង​ ដើម្បី​ប្រមូល​ដើម​ឈូក​ឲ្យ​បាន​ ១០០ គីឡូក្រាម។ ព្រឹក​បន្ទាប់​​ មនុស្ស​​​ម្នាក់​ទៀត​ ត្រូវ​សម្អាត​​ដើម​ឈូក ​១០០ គីឡូក្រាម​​ ជាមួយ​ច្រាស​ដែក​ ហើយ​ម្នាក់​ទៀត​កាត់​ដើម​ឈូក​ ពុះវា​ ដក​ហូត​ទាញ​យក​សរសៃ​​នៅ​លើ​តុ​ប្រវែង ​១ ម៉ែត្រ​ ដើម្បី​បង្កើត​ជា​បន្ទះ​សរសៃ​ឈូក​ដ៏​ស្អាត​​ ប្រវែង​​ ២០ គុណ​នឹង ​១០០ ​សង់ទីម៉ែត្រ​។

បុគ្គលិក​​ម្នាក់​ត្រូវ​ចំណាយ​ពេល​ ១ ម៉ោង​ ដើម្បី​រៀប​បន្ទះ​សរសៃ ​១ បន្ទះ​ ស្មើ​នឹង​ប្រាក់​ចំណូល​ ២ ០០០ រៀល។ ដូច្នេះ​ប្រសិន​បើ​ពួក​គេ​មាន​សមាជិក​គ្រួសារ​មក​ជួយ​​ ​​ពួក​គេ​អាច​រក​ប្រាក់​ចំណូល​បាន​ប្រមាណ​ ២០ ​ដុល្លារ​។
យោង​​តាម​ Awen ដើម​ឈូក​ ៤ ម៉ឺន​​ដើម​ អាច​ទាញ​សរសៃ​​បាន​ប្រហែល ​​៣ ពាន់​ម៉ែត្រ​ ដែល​​អាច​ផលិត​បាន​​ក្រណាត់​ត្រឹម​តែ​ ១ ម៉ែត្រ​​ប៉ុណ្ណោះ​។

លោក Awen លើក​ឡើង​ថា៖ «ស្រ្តី​ម្នាក់​អាច​ផលិត​សរសៃ​ឈូក​បាន​ ៤០ ទៅ​ ៨០ ក្រាម​ ក្នុង ​១ ថ្ងៃ​ ដើម្បី​ផលិត​​ម៉ាស់​ពី ​៤០ ​ទៅ ​៨០ ម៉ាស់។ រីឯ​អ្នក​ដេរ​​​ម្នាក់​ អាច​ដេរ​ម៉ាស់​បាន​​ប្រហែល​ ៤០​ ម៉ាស់​ ក្នុង ​១ ថ្ងៃ»។

ក្រណាត់​ត្បាញ​ពី​សរសៃ​ដើម​ឈូក​មាន​ភាព​ទន់ល្មើយ ​មិន​ប៉ះពាល់​ដល់​សុខភាព​អ្នក​ពាក់​ ​​ងាយ​ស្រួល​ក្នុង​ការ​ដក​ដង្ហើម​ មិន​បង្ក​ប្រតិកម្ម​ស្បែក ​និង​​​មិន​ប៉ះពាល់​ដល់​សុខភាព​អ្នក​ពាក់​។

ដើម្បី​ផលិត​ម៉ាស់​សរសៃ​ឈូក​ លោក ​Awen ត្រូវ​សិក្សា​ និង​ស្តាប់​តាម​ការ​ណែនាំ​របស់​ Afnor Standards នៅ​​​​បារាំង​ និង​មជ្ឈមណ្ឌល​​ជំងឺ​ទូទៅ​ក្នុង​សហរដ្ឋ​អាមេរិក​ក្នុង​ការ​ផលិត​ក្រឡា​ និង​ដេរ​ក្រណាត់​នេះ​​ឲ្យ​ទៅ​ជា​ម៉ាស់​សម្រាប់​ពាក់​មុខ​។

Content image - Phnom Penh Post
ដើមឈូក ៤ ម៉ឺន​ដើម អាច​ទាញសរសៃ​​បាន​ប្រហែល​​ ៣ ពាន់​ម៉ែត្រ និងផលិត​ក្រណាត់បាន​ ​១ ម៉ែត្រ​។ រូបថត សហ​ការី

ផ្តើម​ពី​ការ​ផលិត ​​៥០ ​ម៉ាស់​ ដល់ ​​២០០ ​ម៉ាស់ ក្នុង ​១ ថ្ងៃ លោក​បាន​បន្ត​​ថា៖ «សមធម៌​ ផលិត​ម៉ាស់​សរសៃ​ឈូក​ ៣ ស្រទាប់។ ១ ​ស្រទាប់​ ជា​​សរសៃឈូក​សុទ្ធ​ និង ២ ​ស្រទាប់​ទៀត​​ជា​​កប្បាស​សរីរាង្គ​មាន​គុណភាព​​​ខ្ពស់​។ តម្លៃ​ម៉ាស់​សរសៃ​ឈូក ​១ ​នៅ​ទីផ្សារ​មាន​ចាប់​ពី​​ ៧​ ទៅ​ ១២ ​ដុល្លារ​»។

សមធម៌​ បាន​រៀបចំ​ការ​ដាក់​តាំង​បង្ហាញ​ម៉ាស់​សរសៃ​ឈូក​ដំបូង​បង្អស់​របស់​ខ្លួន​ ដែល​ឲ្យ​មនុស្ស​គ្រប់​គ្នា​ស្ញប់ស្ញែង​នឹង​​​​គំនិត​ច្នៃ​ប្រឌិត​ថ្មី ហើយ​ការ​បញ្ជា​ទិញ​ម៉ាស់​រឹត​តែ​កើន​ឡើង​ រហូត​ដល់​លោក ​Awen ប្រឈម​នឹង​កង្វះ​ខាត​​ការ​ផ្គត់ផ្គង់​​​លក់​នៅ​លើ​ទីផ្សារ​។

លោក​បាន​លើក​ឡើង​ថា៖ «យើង​ត្រូវ​តែ​បង្កើន​ការ​ផលិត​ដល់ ​២៥ ០០០ ម៉ាស់ ក្នុង ​១ សប្តាហ៍ ​ដើម្បី​ឆ្លើយ​តប​​​ទៅ​នឹង​តម្រូវការ​​អតិថិជន​ធំ​នៅ​​​បារាំង និង​សហរដ្ឋ​អាមេរិក។ រីឯ​​​អ្នក​លក់​ដុំ​ជា​ច្រើន​នាក់​ មក​ពី​ប្រទេស​ផ្សេង​គ្នា​​​ក៏​បាន​ទាក់ទង​មក​យើង​។​ ​បើ​យើង​អាច​ផ្គត់ផ្គង់​ និង​បំពេញ​តម្រូវ​ការ​​​អតិថិជន​​នៅ​ប្រទេស​ទាំង ២ នេះ​បាន​ យើង​​នឹង​បង្ហាញ​វត្តមាន​ផលិតផល​របស់​យើង​នៅ​​អង់គ្លេស​ និង​អេស្ប៉ាញ​»។​

យ៉ាងណា ​លោក ​Awen​ បញ្ជាក់​​ថា​ ផលិតផល​របស់​លោក​​​មិន​ទាន់​មាន​​វិញ្ញាបនបត្រ​ទទួល​ស្គាល់​នៅ​ឡើយ​ទេ​ ដែល​នេះ​ជា​បញ្ហា​ប្រឈម​មួយ​ក្នុង​ការ​ពង្រីក​ទីផ្សារ​ឲ្យ​កាន់​តែ​ទូលាយ​។ ​​លោក​ក៏​​​ត្រូវ​ពង្រីក​សមត្ថភាព​ផលិត​ម៉ាស់​​ឲ្យ​បាន​ច្រើន​ជាង​មុន​ផង​ដែរ​​។

លោក​បញ្ជាក់​ថា៖ «យើង​ក៏​បាន​សហការ​ជាមួយ​សមាគម​វាយនភណ្ឌ​កម្ពុជា​​​។ ក្រៅ​ពី​ដើម្បី​បង្កើន​សមត្ថភាព​ផលិត​ពី​​ ២០០ ម៉ាស់ ​ក្នុង ​១ ថ្ងៃ​​ ទៅ​ជា ​៣ ០០០ ម៉ាស់ យើង​ត្រូវ​ការ​កម្លាំង​ក៏​ដូចជា​វត្ថុ​ធាតុ​ដើម​បន្ថែម​»។

អតិថិជន​អាច​រក​ជាវ​​ម៉ាស់​សរសៃ​ឈូក​​នៅ​​ក្រុង​ភ្នំពេញ ​តាម​ទូរស័ព្ទ​លេខ ​០១២ ៤៦៥ ៦៨៦ ​សៀមរាប​ ០១៧ ៥៧២ ០៧១​ ប្រទេស​បារាំង ពី​ Lotus Paradis Brand សហរដ្ឋ​អាមេរិក​ ពី​ Zelia Trace Brand​ និង​អូស្ត្រាលី​ ពី​ Neue Brand៕

អត្ថបទគួរចាប់អារម្មណ៍