ភ្នំពេញៈ ការសម្តែងទម្រង់សិល្បៈបុរាណរយៈពេល ១ ម៉ោងមាន ៣ ផ្ទាំងទស្សនីយភាពចាប់ពីម៉ោង ៦ និង ៣០ នាទីល្ងាចដល់ ៧ និង ៣០ នាទីយប់ នៅរោងល្ខោនបណ្ណាល័យជាតិដោយក្រុមសមគមសិល្បករគោកធ្លកចូលទស្សនាដោយសេរី ដើម្បីចូលរួមរក្សាមរតកដូនតាឲ្យមានភាពគង់វង្ស និងក៏ចង់សិក្សាដែរថា តើនឹងមានពលរដ្ឋខ្មែរប៉ុន្មាននឹងចូលរួមគាំទ្រលើវិស័យសិល្បៈបុរាណប្រភេទនេះ?
ទម្រង់សិល្បៈបុរាណដែលមានការសម្តែងលោ្ខនស្បែកតូច ស្បែកធំ និងល្ខោនយីកេ ផងដែរនឹងត្រូវបានក្រុមសិល្បករសិល្បករការិនីខ្មែរមានប្រមាណ ២២ រូបនៃក្រុមសមាគមសិល្បករគោកធ្លកដែលកកើតជាផ្លូវការនៅឆ្នាំ ២០០៨ បានរួមចិត្តរួមគំនិតគ្នាក្នុងការសហការសម្តែងនៅលើឆាកសិល្បៈក្នុងបណ្ណាល័យជាតិនៅថ្ងៃទី ១០ ខែមីនា ឆ្នាំ ២០១៩ ចុងសប្តាហ៍នេះដើម្បីចូលរួមរក្សានូវសិល្បៈជាកេរដំណែលដូនតាមួយនេះ បើទោះបីជាត្រូវសម្តែងដូរបាយក៏ដោយ។
នេះបើតាមការបង្ហើបពីលោក ភឿង កុម្ភៈ បុរសវ័យ ៤៣ ឆ្នាំមានស្រុកកំណើតនៅខេត្តបាត់ដំបងជាប្រធានសមាគមសិល្បករគោកធ្លកបានបង្ហើបប្រាប់ភ្នំពេញប៉ុស្តិ៍ឲ្យដឹងថា៖ «តាមពិតទៅកាលពីឆ្នាំមុន (២០១៨) ក្រុមសមាគមសិល្បករគោកធ្លកក៏ធ្លាប់បានសម្តែងនៅឯបរិវេណបណ្ណាល័យជាតិម្តងហើយ តែការសម្តែងនោះនៅពុំទាន់មានឆាក ឬរោងល្ខោនសមរម្យនៅឡើយ ហើយឆ្នាំនេះក្រោយពីមានការសម្របសម្រួលជួយពីសំណាក់លោកជំទាវរដ្ឋមន្ត្រី ក្រសួងវប្បធម៌ និងវិចិត្រសិល្បៈមកក្រុមសមាគមសិល្បករគោកធ្លកក៏មានការរៀបចំផែនការសម្តែងប្រចាំឆ្នាំតែម្តង បើទោះបីជាត្រូវចំណាយនូវប្រាក់ផ្ទាល់ខ្លួនមិនមានអ្នកចូលរួមជួយឧបត្ថម្ភ ឬមិនមានស្គាល់បណ្តាញនៃក្រុមហ៊ុនស្ពនស័រក៏ដោយ»។
លោ ភឿង កុម្ភៈ ដែលមាននាមត្រកូលដូចជាលោកជំទាវរដ្ឋមន្ត្រីក្រសួងវប្បធម៌ និងវិចិត្រសិល្បៈ តែមិនមានជាប់សាច់ឈាមគ្នានោះបានបន្ត៖ «ចាប់ពីថ្ងៃទី ១៨ ខែមីនា ឆ្នាំ ២០១៩ តទៅនឹងមានការសម្តែងចំនួន ៣ ថ្ងៃក្នុង ១ សប្តាហ៍គឺថ្ងៃចន្ទ ពុធ និងសុក្រពេលវេលាដដែលគឺចាប់ពីម៉ោង ៦ និង ៣០ នាទីល្ងាចដល់ ៧ និង ៣០ នាទីយប់ដោយសម្តែងស្បែកតូច ២០ នាទី ស្បែកធំ ២០ នាទី និងយីកេ ២០ នាទី។ ខណៈចូលទស្សនាដោយសេរី តែក៏ត្រូវប្រាប់ពីវត្តមានជាមុនដែរ ព្រោះយើងខ្លាចអត់មានកៅអីគ្រប់គ្រាន់សម្រាប់ឲ្យអ្នកទស្សនាអង្គុយ ខណៈយើងមានកៅអីត្រឹមតែជាង ១០០ កៅអីនោះ។ យើងក៏មានគម្រោងសម្តែងចំនួន ១០ រឿងក្នុងរយៈពេល ១ ឆ្នាំផងដែរដោយយើងនឹងសម្តែងដូចជា រឿងរាមកេរ្តិ៍ រឿងទិព្វសូដាចន្ទ រឿងសព្វសិទ្ធិ រឿងព្រះចន្ទគោរពបែបទម្រង់យីកេ និងការសម្តែងល្ខោនស្បែកមានដូចជារឿងអាប៉ក់- អាប៉ែន រឿងគង់ហ៊ាន និងរឿងធនញ្ជ័យ ជាដើម»។
ទម្រង់សិល្បៈបុរាណដែលមានពីដូនតានេះត្រូវបានប្រធានសមាគមសិល្បករគោកធ្លកតែងតែលះបង់ប្រាក់ផ្ទាល់ខ្លួនដើម្បីបន្តការរៀបចំឲ្យមានការសម្តែងទម្រង់សិល្បៈល្ខោនស្បែកតូច ស្បែកធំ និងល្ខោនយីកេ យូរមកហើយដោយ ១ ខែលោកត្រូវចំណាយប្រាក់ខែផ្ទាល់ខ្លួនចន្លោះ ពី ៣០០-៤០០ ដុល្លារ៕