ក្រុងប៊ុយការ៉េស៖ ពេលកូនប្រុសអ្នកស្រី ម៉ារៀ ឡាកាទូស បើកទ្វារកសិដ្ឋាន វាហួសពេលទៅហើយ។ ស្ដ្រីវ័យ ៨៦ ឆ្នាំ បាននិយាយទាំងខ្សឹកខ្សួលអួលដើមកថា៖ «ខ្លាឃ្មុំជាមច្ចុរាជដ៏គ្រោះថ្នាក់មួយចំពោះជ្រូក»។
ក្រោយពីបាត់បង់សេះ ១ ក្បាលទៀត នៅប៉ុន្មានថ្ងៃក្រោយមក អ្នកស្រី បានឯកភាពជាមួយអ្នកជិតខាងនៅក្នុងភូមិគូស្មា ភាគខាងជើងរូម៉ានី ដែលថា ការប្រមាញ់ខ្លាឃ្មុំអភិរក្ស គឺជាជម្រើសតែ ១ គត់។
អ្នកស្រីបន្ដថា ខ្លាឃ្មុំបានគេចខ្លួនបាត់ដោយការហែកជញ្ជាំងក្ដារ ដែលមិនអាចរារាំងក្រញាំដ៏មុតស្រួចរបស់វាឡើយ ហើយវាស្ទើរតែធ្វើឲ្យអ្នកស្រីលួសព្រលឹង។
ស្ដ្រីរូបនេះ បានរស់នៅជាមួយកូនប្រុស កូនប្រសារស្រី ដែលអ្នកទាំង ២ ខំប្រឹងប្រែងដើម្បីជីវភាពប្រចាំថ្ងៃ និងកូន ៧ នាក់របស់ពួកគេក្នុងផ្ទះតែមួយ ដែលការពារដោយរបងឈើ។ ជ្រូកជាធនធានចំណូលដ៏សំខាន់។
រូម៉ានី មានខ្លាឃ្មុំសម្បុរត្នោតច្រើនបំផុតនៅអឺរ៉ុប ដែលតែងតែបង្ហាញខ្លួនញឹកញយក្នុងភូមិ គូស្មា ដែលមានប្រជាជន ៦០០ នាក់ លើផ្លូវធ្វើដំណើរ ៨ ម៉ោង ពីទីក្រុងប៊ុយការ៉េស។
នៅតំបន់ផ្សេងៗទៀតនៃប្រទេស មនុស្សក៏ត្រូវរងការវាយប្រហារពីសត្វខ្លាឃ្មុំផងដែរ។ គ្រាន់តែខែតុលាកន្លងទៅ ខ្លាឃ្មុំ ១ ក្បាល សម្លាប់មនុស្សអាយុ ៤៧ ឆ្នាំម្នាក់ ដែលកំពុងជីកផ្សិត ហើយមនុស្សអាយុ ៦១ ឆ្នាំម្នាក់ទៀតបានស្លាប់ អំឡុងពេលស្ទូចត្រី។
យោងតាមទិន្នន័យរដ្ឋាភិបាលបានបង្ហាញថា មនុស្ស ៣២ នាក់ ត្រូវបានប្រហារ ដោយ ២ នាក់បានស្លាប់ ក្នុងឆ្នាំ ២០១៧ និងឆ្នាំ ២០១៨។ អាជ្ញាធរបានស្នើថា សហគមន៍គួរតែដំឡើងរបងលួសអគ្គិសនី និងប្រើឆ្កែប្រមាញ់ ដើម្បីបណ្ដេញខ្លាឃ្មុំ។
ប៉ុន្ដែមានក្ដីសង្ឃឹមតិចតួច ដូចជា ក្រុង Baile Tusnad វិធានការនានាមិនត្រូវបានអនុវត្ដឡើយ៕ AFP