ក្រុងសេអ៊ូល: តុលាការក្រុងសេអ៊ូល បានចេញសេចក្ដីសម្រេចថា ការសម្លាប់ឆ្កែធ្វើជាអាហារជាទង្វើខុសច្បាប់។ នេះជាសេចក្ដីសម្រេចដែលឆ្លើយតបទៅនឹងការតស៊ូមតិរបស់ក្រុមអ្នកការពារសិទ្ធិសត្វ។
ជាយូរលង់ណាស់មកហើយ សាច់ឆ្កែ ត្រូវបានប្រជាជនកូរ៉េមួយចំនួនចាត់ទុកជាអាហារដ៏ឆ្ងាញ់ ដោយឆ្កែប្រមាណមួយលានក្បាលត្រូវបានសម្លាប់យកសាច់បរិភោគក្នុង ១ ឆ្នាំ។
ប៉ុន្តែទម្លាប់ទទួលទានសាច់ឆ្កែនៅកូរ៉េខាងត្បូងហាក់បីដូចជាសាបរលាបប្រជាប្រិយភាព នៅពេលដែលពលរដ្ឋក្មេងៗបានងាកមកចាប់យកទស្សនៈថា ឆ្កែជាសម្លាញ់របស់មនុស្ស ជាជាងសត្វចិញ្ចឹមយកសាច់។
ជាទូទៅ ប្រជាជនកូរ៉េ និងចិននិយមទទួលទានសាច់ឆ្កែនៅរដូវក្ដៅ ជាមួយនឹងជំនឿថា វាជាសាច់ពិសេសអាចប៉ូវកម្លាំងថាមពល។
ការស្ទាបស្ទង់មតិឆ្នាំមុនបានរកឃើញថា ពលរដ្ឋកូរ៉េ ៧០ ភាគរយមិនបរិភោគសាច់ឆ្កែទេ ប៉ុន្តែក្នុងនោះមានតែ ៤០ ភាគរយ ដែលយល់ឃើញថា ប្រពៃណីទទួលទានសាច់ឆ្កែនេះគួរតែត្រូវបានលុបបំបាត់។
ប៉ុន្តែ ការសម្រេចរបស់តុលាការក្រុងសេអ៊ូលបានធ្វើឲ្យប៉ះពាល់ដល់អាជីវកម្មសត្តឃាត ១៧០០០ កន្លែង ដែលជំនាញកាប់សាច់ឆ្កែ។
លោក ឆូ ហ្វានរ៉ូ ជាអ្នកតំណាងទីសត្វឃាតទាំងនោះ បានប្រាប់ទូរទស្សន៍ YTN ថា៖ «សត្វឆ្កែសម្រាប់ហូបសាច់ និងសត្វឆ្កែដែលជាមិត្តសម្លាញ់របស់មនុស្ស គឺវាខុសគ្នា។ យើងត្រូវបែងចែកឲ្យដាច់។ វាត្រូវបានបង្កាត់ពូជ និងចិញ្ចឹមក្នុងគោលបំណងខុសៗគ្នា»។
លោកតវ៉ាថា៖ «គោ ជ្រូក មាន់ ទា គេចិញ្ចឹមសម្រាប់ទទួលទាន ម៉េចក៏ហូបសាច់ឆ្កែមិនបាន?»៕