ក្រុងឡុងប៊ិចៈ តាមរយៈបណ្តុំរូបភាពយ៉ាងច្រើនតាមបណ្តាញសង្គម មិនមែនមានតែបងប្អូនខ្មែរក្នុងស្រុកនោះទេ ដែលមានភាពសកម្មប្រឹងប្រែងរក្សាវប្បធម៌ខ្មែរ ជាកេរមរតកពីដូនតា សូម្បីតែបងប្អូនខ្មែររស់នៅឯនាយសមុទ្រដែលនៅតំបន់នៃទីក្រុងឡុងប៊ិច រដ្ឋកាលីហ្វ័រនីញ៉ា សហរដ្ឋអាមេរិក ក៏បានអបអរសាទរបុណ្យចូលឆ្នាំថ្មីប្រពៃណីខ្មែរលើកទី ១០ ក្នុងឆ្នាំ ២០១៨ នេះ ក្រោមប្រធានបទថា «កម្មវិធីបុណ្យវប្បធម៌ខ្មែរ ឬ Cambodia Town Culture Festival» កាលចុងសប្តាហ៍កន្លងមក។
បើតាមសេចក្តីជូនដំណឹងត្រួសៗនៃគេហទំព័ររបស់ Cambodia Town Culture Festival ឲ្យដឹងថា កម្មវិធីបុណ្យវប្បធម៌ខ្មែរនេះ ប្រារព្ធធ្វើប្រចាំឆ្នាំ និងបានរៀបចំឡើងដោយពលរដ្ឋខ្មែររស់នៅ សហរដ្ឋអាមេរិក ជាពិសេស តំបន់នៃក្រុងឡុងប៊ិច ដែលចូលរួមយ៉ាងផុសផុលពីសំណាក់បងប្អូនខ្មែរទាំងបម្រើការងាររកស៊ី និងធ្វើការនៅអង្គការ NGO។
គេបានឃើញបងប្អូនខ្មែរគ្រប់ស្រទាប់វ័យតែម្តង បានចូលរួមយ៉ាងសស្រោកសស្រាំ ដើម្បីបុព្វហេតុបង្ហាញពីកម្រង ឬទម្រង់សិល្បៈវប្បធម៌ខ្មែរ ដែលបន្សល់ពីដូនតាដើម្បីចែកជូនដល់ជនបរទេសឲ្យបានស្គាល់ និងស្វែងយល់ពីខ្មែរ។
ជាទូទៅនោះគេឃើញមានបង្ហាញនូវទម្រង់សិល្បៈខ្មែរមានដូចជា ការសម្តែងរបាំបុរាណ ការបង្ហាញម៉ូដសម្លៀកបំពាក់ខ្មែរ ការលេងល្បែងប្រជាប្រិយ ការបង្ហាញពីសិល្បៈគំនូរ ការបង្ហាញសិល្បៈល្ខោនស្រមោល ឬល្ខោនស្បែក ការបង្ហាញឧបករណ៍តន្ត្រី និងភ្លេងខ្មែរ សិល្បៈសិប្បកម្មតម្បាញ បង្ហាញនូវសម្លៀកបំពាក់រៀបអាពាហ៍ពិពាហ៍ និងបង្ហាញមុខម្ហូបខ្មែរ ជាដើម។
អ្វីកាន់តែពិសេសទៀតនោះ គឺទើបតែរយៈពេល ២ ឆ្នាំចុងក្រោយតែប៉ុណ្ណោះ កម្មវិធីបានបញ្ចូលក្បាច់រាំវង់ទៅក្នុងមាតិកាពិសេសនៃកម្មវិធី ក្នុងរូបភាពជាការប្រកួតប្រជែងរាំតែម្តង សម្រាប់ក្បាច់រាំប្រពៃណីខ្មែរមួយនេះ ខណៈនៅឆ្នាំ ២០១៨ នេះដែរ គេក៏ឃើញមានការសម្តែងនូវឈុតសម្លៀកបំពាក់សម័យបុរាណនៃរជ្ជកាលស្តេចសូរ្យវរ្ម័នទី ២ និងឈុតសម្លៀកបំពាក់នៃក្រុមរាជវង្សានុវង្សក្សត្រក្នុងសម័យនោះផងដែរ ដោយបានធ្វើនៅឯបណ្ណាល័យ Mark Twain Library ដើម្បីចូលរួមលើកស្ទួយលើវិស័យអំណាន។
កម្មវិធីបុណ្យវប្បធម៌ខ្មែរលើកទី ១០ ឆ្នាំ ២០១៨ នេះ ក៏មានការសាទរពីខាងតំណាងរាស្ត្រអាមេរិកប្រចាំរដ្ឋ California លោក Alan Lowenthal តំណាងស្រុក Los Angeles នៅតំបន់ទី ៤ លោកស្រី Janice Hanh អភិបាលក្រុងឡុងប៊ិច លោក Robert Garcia ចៅសង្កាត់ទី ៤ លោក Daryl Supernaw និង ចៅសង្កាត់ទី ៦ លោក Dee Andrews ។
ចៅសង្កាត់ទី ៦ លោក Dee Andrews ក៏បង្ហាញចំណាប់អារម្មណ៍ខ្លួនឯងដែរថា៖ «កម្មវិធីបុណ្យវប្បធម៌ខ្មែរលើកទី ១០ នេះ ជាវិធីមួយសម្រាប់ការជួបជុំគ្នានៃសហគមន៍ខ្មែរ នៅក្រុងឡុងប៊ិច និងអាចបង្ហាញពីទម្រង់សិល្បៈវប្បធម៌ពួកគេផងដែរ»៕