ក្រុងស្ទឹងត្រែងៈ ទើបតែបង្កើតមិនបាន ១ ឆ្នាំមែនក្តី តែផលិតផលច្នៃប្រឌិតនៅឯសហគមន៍បុរីអូរសា្វយក្នុងស្រុកបង្កើតថ្មីនៃខេត្តស្ទឹងត្រែងនោះកំពុងតែត្រូវបានអ្នកប្រើប្រាស់ចាប់អារម្មណ៍ជាវយកមកប្រើជាហូរហែ ទាំងក្នុងតំបន់ និងក្រៅតំបន់មានតម្លៃសមរម្យ ប្រើហើយមិនបារម្ភពីមានជាតិគីមី។
សហគមន៍ផលិតរបស់ប្រើប្រាស់ពីបំពង់ឫស្សីនោះស្ថិតនៅក្នុងភូមិ ឃុំ និងស្រុកបុរីអូរស្វាយ ខេត្តស្ទឹងត្រែង ដែលបានបង្កើតសិប្បកម្មច្នៃប្រឌិតរបស់ប្រើប្រាស់នានារួមមានកែវទឹក ពែងទឹក ប៉ាន់តែ និងប្រអប់ក្រដាសជូតមាត់ ជាដើមបំពង់ឫស្សីពីធម្មជាតិពិតៗ។
លោក សែម ផល្លី ជាប្រធានសហគមន៍បុរីអូរស្វាយ និងជាមន្ត្រីទេសចរណ៍នៅស្រុកថ្មីបង្ហើបពីការបង្កើតសហគមន៍កែច្នៃឫស្សីឲ្យទៅជារបស់ប្រើប្រាស់ទាំងនេះថា៖ «យើងទើបបង្កើតជាសហគមន៍ឡើងមិនដល់ ១ ឆ្នាំនោះទេ ដោយកាលដំបូងឡើយគឺមានចំនួន ១១ គ្រួសារ តែពេលបច្ចុប្បន្ននៅសល់តែ ២ គ្រួសារប៉ុណ្ណោះដែលកំពុងបន្តការងារកែច្នៃពីឫស្សីផលិតជារបស់ប្រើប្រាស់មានដូចជាកែវ ពែង ប៉ាន់តែ និងប្រអប់ក្រដាសជូតមាត់ ដើម្បីលក់ជូនអតិថិជន ខណៈគ្រួសារផ្សេងទៀតកំពុងរវល់ធ្វើកិច្ចការស្រែចម្ការ»។
ការច្នៃឫស្សីបង្កើតជាកែវទឹក ពែង ប៉ាន់តែ និងប្រអប់ក្រដាសជូតមាត់គឺមួយថ្ងៃសម្រាប់សហគមន៍ដែលមានចំនួន ២ គ្រួសារ (មនុស្ស ៤ នាក់) អាចផលិតបានចំនួនប្រមាណ ៥០ ទៅ ៦០ ពែង ឬកែវ ខណៈអតិថិជនកុម្ម៉ង់ទិញលើសពីចំនួន ៥០ ពែង ឬកែវឡើងទៅសហគមន៍នឹងជួយចេញថ្លៃសេវាកម្មដឹកជញ្ជូនឲ្យ។
លោក សែម ផល្លី បន្តឲ្យដឹងពីតម្លៃថា៖ «កែវបំពង់ឫស្សីមានដៃ ១ តម្លៃ ៤០០០ រៀលសម្រាប់តម្លៃលក់រាយ ខណៈតម្លៃលក់ដុំវិញ ១ មានតម្លៃ ៣៥០០ រៀល ប្រសិនកុម្ម៉ង់ទិញលើសចំនួន ៥០ ឡើង។ ចំណែកឯកែវបំពង់ឫស្សីអត់មានដៃវិញ ១ តម្លៃ ៣ ០០០ រៀល សម្រាប់តម្លៃលក់រាយ ខណៈតម្លៃលក់ដុំវិញ ១ មានតម្លៃ ២ ៥០០ រៀល។ ចំពោះការកុម្ម៉ង់ជាឈុតប៉ាន់តែ ១ និងពែងចំនួន ៦ នោះអាចមានតម្លៃចន្លោះពី ៤ ម៉ឺន រៀល ដល់ ៤៥ ០០០ រៀល។ រីឯប្រអប់ក្រដាសជូតមាត់វិញមានពីរជម្រើសគឺថាប្រអប់ក្រដាសដែលផលិតពីបំពង់ឫស្សី ១ តម្លៃ ១២ ០០០ រៀល ខណៈប្រអប់ក្រដាសផលិតពីការត្បាញសាច់ឫស្សីវិញនោះ ១ តម្លៃ ១ ម៉ឺន រៀល»។
យ៉ាងណាសម្រាប់ការផលិតជាកែវ ពែង ប៉ាន់តែ និងប្រអប់ក្រដាសពីបំពង់ឫស្សីនេះក៏មានបែបផែន និងចំណាយពេលយូរក្រែលដែរទើបអាចចេញជាផលិតផលសម្រេចយកមកប្រើបាន។
លោក សែម ផល្លី បង្ហើបប្រាប់ថា៖ «យើងត្រូវជ្រើសឫស្សីណាដែលត្រូវខ្នាត និងមានសាច់ចាស់ល្អមុននឹងយកមកកាត់ច្នៃតាមតម្រូវការ។ ចំពោះបំពង់ឫស្សីដែលកាត់ជារូបរាងផ្សេងៗមានកែវ ពែង ឬប្រអប់ក្រដាសនោះ ប្រើពេលហាលថ្ងៃចំនួន ៣ ទៅ ៤ ថ្ងៃទើបអាចកែច្នៃបាន បើមិនដូច្នេះទេនឹងខូចគុណភាព ហើយពេលយកទៅប្រើវិញក៏ឥតបារម្ភពីសារជាតិគីមី»៕