ក្រុងគួឡាឡាំពួ: សាកលវិទ្យាល័យម៉ាឡេស៊ីមួយកំពុងពិចារណាប្រើរ៉ូបូតគ្រងឈុតទទួលសញ្ញាបត្រចូលរួមក្នុងពិធីបញ្ចប់ការសិក្សាជំនួសមនុស្ស ដើម្បីទប់ស្កាត់ជំងឺឆ្លង តែក្រុមនិស្សិតមិនគាំទ្រគំនិតផ្ដួចផ្ដើមបែបនេះឡើយ។
វីដេអូឃ្លីបមួយស្ដីពីផែនការរៀបចំពិធីចែកសញ្ញាបត្ររបស់សាកលវិទ្យាល័យមួយ បានបង្ហាញរូបភាពរ៉ូបូត ២ គ្រឿង កម្ពស់ត្រឹមចង្កេះមនុស្សត្រូវបានប្រគល់សញ្ញាបត្រដោយមន្ដ្រីសាកលវិទ្យាល័យជាន់ខ្ពស់។
មុខនិស្សិតត្រូវបានបង្ហាញនៅលើអេក្រង់បំពាក់លើក្បាលរ៉ូបូត។
ជំនួយការសាស្ដ្រាចារ្យ អេងគូ ហ្វាដលី ហាសាន ស៊ីយេដ អាប់ឌុលឡា ជាអ្នកដឹកនាំក្រុមនៅសាកលវីទ្យាល័យ Sultan Zainal Abidin University ដែលផលិតរ៉ូបូតនេះ បាននិយាយកាលពីថ្ងៃអង្គារថា គំនិតនេះនឹងអនុញ្ញាតឲ្យនិស្សិតចូលរួមពីធីទទួលសញ្ញាបត្រពីចម្ងាយ។
សាស្ដ្រាចារ្យមកពីសាកលវិទ្យាល័យភាគឦសាន្ដរដ្ឋធេរ៉េងហ្គានូ បានប្រាប់ AFP ថា៖ «យើងនឹងបង្ហាញមុខនិស្សិតនៅលកើក្បាលរ៉ូបូតតាមរយៈវីដេអូខល»។
យ៉ាងណាមិញ និស្សិតមិនភ្ញាក់ផ្អើលចំពោះគំនិតនេះ និងបានស្នើសុំសាកលវិទ្យាល័យពន្យាពេលរៀបចំពិធី ដែលគ្រោងធ្វើឡើងនៅក្នុងខែតុលា និងវិច្ឆិកាខាងមុខ។
នើហាស្វានី សាអេដ បានសរសេរនៅលើទំព័រហ្វេសប៊ុកវិទ្យាស្ថាននេះថា៖ «ខ្ញុំមានបំណងរង់ចាំមួយ ពីរ បី ឬច្រើនឆ្នាំទៀត តែសុំកុំរៀបចំពិធីបែបនេះអី»។
យ៉ាងណាមិញ អេងគូ ហ្វាដលី បាននិយាយថា គំនិតប្រើរ៉ូបូតនេះគ្រាន់តែផែនការនាពេលបច្ចុប្បន្ននេះ ហើយសាកលវិទ្យាល័យនឹងបន្ដប្រឹងប្រែងរៀបចំព្រឹត្ដិការណ៍សំខាន់នេះឲ្យបានសមរម្យ។
ម៉ាឡេស៊ីបានខិតខំទប់ស្កាត់ការរីករាលដាលជំងឺឆ្លងផ្លូវដង្ហើមថ្មី ដោយមានចំនួនអ្នកឆ្លងជិត ៨០០០ នាក់ និងអ្នកស្លាប់ ១១៥ នាក់៕ AFP/HR