.jpg)
អ្នកលក់ប្រចៀវអះអាងថា ការផ្ទុះ វីរ៉ុស កូវីដ មិនរំខានដល់ការលក់ទេ។ រូបថត AFP
ក្រុងហ្សាការតា៖ ប្រចៀវ កណ្ដុរ និងពស់ នៅតែបន្ដលក់នៅទីផ្សារឥណ្ឌូនេស៊ីមួយដែលល្បីខាងលក់សត្វព្រៃ ទោះបីជារដ្ឋាភិបាលស្នើឲ្យភោជនីយដ្ឋានដកចេញពីតារាងមុខម្ហូបដោយបារម្ភពីទំនាក់ទំនងសាច់សត្វ ព្រៃជាមួយវីរុសកូរ៉ូណា ឬកូវីដ ១៩។
តូបលក់សាច់សត្វដ៏កខ្វក់បានដាក់លក់សត្វចម្រុះ រួមទាំងពស់ កណ្ដុរដោតចង្កាក់ និងសាច់ឆ្កែអាំង ដែលត្រូវបានរោលឆ្អើររោម ជាទិដ្ឋភាពដែលត្រូវបានក្រុមអ្នករិះគន់ចាត់ទុកជា «ដំណើរឆ្ពោះទៅកាន់នរក»។
អ្នកលក់ប្រចៀវឈ្មោះ ស្ដេនលី ធីមប៊ូឡេង បាននិយាយថា លោកនៅតែបន្ដអាជីពជាអ្នកលក់សាច់សត្វដែលមានតម្លៃ ៦ ម៉ឺនរូព្យា (១៥ ០០០ រៀល) ក្នុង ១ គីឡូក្រាម ដល់អតិថិជនក្នុងតំបន់ ដែលសាច់ប្រចៀវ គឺជាអាហារដ៏ពិសេសសម្រាប់ពួកគេ។
បុរសវ័យ ៤៥ ឆ្នាំរូបនេះ បានប្រាប់ ថា៖ «ខ្ញុំលក់សាច់សត្វទាំងនេះចន្លោះ ៤០ ទៅ ៦០ គីឡូក្រាមក្នុង ១ ថ្ងៃ»។
សត្វពស់ និងសាច់សត្វព្រៃ នៅក្នុងផ្សារមួយនៃប្រទេសឥណ្ឌូនេស៊ី។ រូបថត AFP
ម្ចាស់ភោជនីយដ្ឋាន Lince Reng-kuan ដែលលក់សាច់ប្រចៀវ រួមទាំង ក្បាល និងស្លាបស្ងោរស៊ុបជាមួយខ្ទិះដូង និងគ្រឿងហឹរ បាននិយាយថា រូបមន្ដអាថ៌កំបាំងគឺត្រូវចេះរៀបចំ។
អ្នកស្រីនិយាយថា៖ «បើយើងមិនចម្អិនប្រចៀវឲ្យបានឆ្អិនល្អទេ ច្បាស់ណាស់វាប៉ះពាល់ដល់សុខភាព។ យើងចម្អិនវាឲ្យឆ្អិនសព្វ អ៊ីចឹងអតិថិជននឹងមិនថមថយឡើយ»។
ទោះបីមានការអំពាវនាវពីអាជ្ញាធរមូលដ្ឋាន និងទីភ្នាក់ងារសុខភាពឲ្យដកសាច់ប្រចៀវ និងសត្វព្រៃដទៃទៀតចេញពីតារាងមុខម្ហូបយ៉ាងណាក៏ដោយ ក៏រូដឌី ឡេងគុង ប្រធានពាណិជ្ជកម្ម និងភ្នាក់ងារឧស្សាហកម្មក្នុងតំបន់បានឲ្យដឹងថា៖ «យើងក៏ជំរុញប្រជាពលរដ្ឋបញ្ឈប់ការទទួលទានសាច់សត្វដែលអាចសង្ស័យផ្ទុកនូវវីរុសគ្រោះថ្នាក់ផងដែរ»។
ក្នុងទីក្រុងហ្សាការតា អាជីវករលក់ពស់ពន្លាត់ស្បែក និងឈាមពស់វែក ហាក់មិនពិបាកស្វែងរកអតិថិជនឡើយ។ អាជីវករម្នាក់បាននិយាយថា៖ «វាជួយសុខភាពអស់លោកណាស់។ វាអាចព្យាបាល និងទប់ទល់នឹងជំងឺគ្រប់ប្រភេទ»៕ AFP/HR
