The Phnom Penh Post Search

Search form




Logo of Phnom Penh Post newspaper Phnom Penh Post - សារ៉ាយ សក្ខណា គ្រោង​មក ​ស្រុកខ្មែរ​បើក​ជំនួញ​ថែម​ទៀត




សារ៉ាយ សក្ខណា គ្រោង​មក ​ស្រុកខ្មែរ​បើក​ជំនួញ​ថែម​ទៀត

Content image - Phnom Penh Post
សារ៉ាយ សក្ខណា

សារ៉ាយ សក្ខណា គ្រោង​មក ​ស្រុកខ្មែរ​បើក​ជំនួញ​ថែម​ទៀត

ភ្នំពេញៈ តារា​សម្ដែង​ស្រីសម្បុរ​ស្រអែម​ញញឹម​ស្រស់​អ្នកនាង សារ៉ាយ សក្ខណា នឹងស្វាមី ព្រមទាំង​កូន​ស្រី​វ័យ​ជិត​មួយ​ខួបបានដាក់​គម្រោង​មកលេង​ប្រទេស​កំណើត​​ និង​ឆ្លៀត​ពេលសិក្សា​ឱកាស​បោះទុន​ជំនួញ​ថ្មី​មួយ​ទៀត។ នេះ​បើ​យោងតាមការ​បង្ហើប​ពី​ម្ដាយ​របស់​នាង។

ខណៈ​គេ​បានឃើញ​វត្តមាន​លោក កែវ មេត្រី ​​ជាមេធាវីអាណិកជន​មកពី​សហរដ្ឋ​អាមេរិក ត្រូវជាស្វាមីរបស់​តារា​សម្តែង​ស្រី​ស្រអែម​ស្រស់​ អ្នកនាង សារ៉ាយ សក្ខណា​ ​នាដើម​ខែ​វិច្ឆិកា ឆ្នាំ ២០១៥ កន្លង​មក​នេះ មានដំណឹង​ល្ហិចល្ហៀង​ថា តារាសម្ដែង​ស្រី​រូបនេះ​ទំនងជា​ស្ងាត់​នាំ​កូនស្រី​មក​លេងប្រទេស​កំណើត​ដែរ​ហើយ​មើល​ទៅ ព្រោះនាងបាន​បាត់​មុខ​ពី​សង្គម​សិល្បៈ​សម្តែងរៀងយូរក្រែលណាស់​ដែរហើយ​បន្ទាប់​ពី​ចូលរោងការ​នៅចុងឆ្នាំ ២០១៣ និង​បាន ចេញ​ទៅរស់នៅទឹកដី​ដុំ​ដុល្លារ​សហរដ្ឋអាមេរិក​កាល​ពី​ខែមករា ឆ្នាំ ២០១៤ មកនោះ។

តែដំណឹង​ខាង​លើ​ត្រូវ​បាន អ្នកស្រី សាត់ សម្ផស្ស ដែល​ជា​ម្ដាយ​បង្កើត​របស់អ្នកនាង សារ៉ាយ សក្ខណា នោះ​ ​បដិសេធ​ថា កូនស្រី​គាត់​មិន​បាន​មក​ជាមួយ​ស្វាមី​ទេ។

អ្នកស្រី​បានថ្លែង​ប្រាប់​ភ្នំពេញ ​ប៉ុស្តិ៍​ ថា៖ «គាត់ [កូន​ប្រសា] មក​ស្រុក​ខ្មែរ​មួយ​អាទិត្យ​ជា​មួយ​មិត្ត​ភក្តិ​ក្នុង​បំណងបំពេញ​ការងារ​របស់​ពួក​គាត់​ប៉ុណ្ណោះ​ ហើយគាត់បាន​ចេញ​ទៅ​អាមេរិក​វិញ​កាល​ពី​សប្តាហ៍មុននេះ​ឯង»​។

ស្រប​នឹង​ការ​ទន្ទឹង​ចាំ​ពីសំណាក់​ប្រិយមិត្ត​គាំទ្រ​តារាសម្ដែង​សម្បុរ​ស្រអែម​ញញឹម​ស្រស់​អ្នកនាង ​សារ៉ាយ សក្ខណា ទាំង​ដិតដាម​នូវ​ឈុតឆាកសម្ដែង​ពូកែ​បង្ហូរ​ទឹកភ្នែក និង​ចេះ​លេងកាយវិការ​ក្រមិចក្រមើម​របស់​​អ្នកនាង​ផង អ្នកស្រី សាត់ សម្ផស្ស បង្ហើប​ប្រាប់​ដោយ​ក្តី​រំពឹងច្បាស់​ក្នុងចិត្ត​ថា​៖ «ខ្ញុំ​បាន​ដំណឹង​ថា​ពួកគេ នឹង​មក​ស្រុក​ខ្មែរនៅ​ក្នុងខែ​កុម្ភៈឆ្នាំ ២០១៦ ​ខាងមុខ​នេះ​ គឺ​មក​ទាំង​កូនស្រី [សក្ខណា] កូន​ប្រសា និង​ចៅ​ស្រី​តែ​ម្ដង។ ប្រហែលពួកគេ​មក​លេង​រយៈពេល​មួយខែ​ ទើប​ត្រឡប់ទៅ​វិញ។ ​ម្យ៉ាង​ទៀត​តាំង​ពី​រៀប​ការមក​នោះ ពួកគេ​ក៏​ធ្លាប់​បាន​មក​លេង​ម្ដង​រួច​ហើយដែរ​»។ ​​

បើ​តាម​ការ​អះអាង​របស់​អ្នកស្រី សម្ផស្ស ជាម្តាយអ្នកនាង​ សារ៉ាយ សក្ខិណា ដែលបាន​​លើកឡើង​ថានឹង​មកលេង​​រយៈ​ពេល​មួយ​ខែឯណោះហើយ​ក្នុង​នាម​ជា​សិល្បការិនី​ល្បី​ឈ្មោះ​មួយរូបនោះទំន​ង​នេះ​អាច​ជា​ដំណឹង​ល្អ​មួយ​សម្រាប់​បណ្តា​ក្រុម​ហ៊ុន​ផលិត​ភាព​យន្ដ​ក្នុង​ស្រុកខ្មែរ​ដើម្បី​កក់តារាស្រី​រូប​នេះ​ផង​ដែរ។

អ្នកស្រី សាត់​ សម្ផស្ស ក៏បាន​ព្រលយ​ពាក្យ​ដែរ​ថា៖ «​កន្លង​មក​នេះ​ មានបណ្តាក្រុម​ហ៊ុន​ផលិតនានា​ បាន​មក​សាក​សួររកកូនស្រី​ខ្ញុំ​ដើម្បី​ទៅ​ថតកុន​ដែរ​ហ្នឹង ឲ្យ​តែ​ឮដំណឹងថា​នាង​មក​ស្រុក​ខ្មែរ​វិញ»។​

បើ​ទោះ​បីជា​មានឱកាស​បាន​ទៅ​រួម​រស់​ជា​មួយ​នឹង​ស្វាមី​នៅលើទឹកដី​ដ៏​ស្តុក​ស្ដម្ភ​ និង​សោយ​សុខជា​មួយ​នឹងគំនរ​ដុល្លារ​ទៅហើយ​ក្តី​​ ក៏​តារា​សម្តែង​ស្រីសម្បុរខ្មៅ​ស្រអែម​ស្រស់ អ្នក​នាង​ សារ៉ាយ សក្ខណា នៅ​តែ​មាន​មហិច្ឆតា​ ចង់បើក​របរ​អាជីវកម្ម​​រកស៊ី​នៅ​ស្រុកខ្មែរ​ដូចជា​បណ្តាតារា​ប្រុស​ស្រី​ដទៃ​ផង​ដែរ។

អ្នកស្រី សាត់​ សម្ផស្ស បាន​បង្ហើប​ឲ្យ​ដឹង​ថា៖ «មើលទៅការ​មកស្រុក​ខ្មែរនៅ​ខែកុម្ភៈ​ឆ្នាំ ២០១៦ ខាង​មុខនោះ កូនស្រីខ្ញុំ​ដូច​ជា​មានគម្រោង​ការ​ចង់បើក​របរ​រកស៊ី​មួយ​ផង​ដែរ​ តែនាង​ខ្ញុំមិន​បាន​ដឹង​ច្បាស់ឡើយ​ថា​ គេ​នឹងបើក​អាជីវ​កម្ម​អ្វីឲ្យ​ច្បាស់​នោះ​នៅ​ឡើយ​ទេ​។ គ្រាន់​តែ​ឮល្ហៀងៗ​ថា នាងមាន​បំណង​ចង់​បើក​ហាង​រក្សា​សម្ផសស្ស​!»។

គួរ​បញ្ជាក់​ថា កាល​ពី​ថ្ងៃទីឍ ១០ ​ខែ​មីនា ​ឆ្នាំ ២០១៤​ អ្នកនាង សារ៉ាយ សក្ខណា បាន​បោះ​ទុន​រំលងទ្វីបដោយ​បាន​បើកសម្ពោធ​ហាង​លក់​ស៊ុប​មួយជូនអ្នក​ម្តាយ​មើល​ការ​ខុស​ត្រូវ​ ដោយ​មាន​យីហោឈ្មោះ​ថា «Sakana Family Soup» ស្ថិត​នៅក្បែរ​ភោជនីយដ្ឋាន ​ហេងហេង នៅ​ម្ដុំ​ទួលគោកមួយកន្លែង​រួច​មក​ហើយ​ដែរ៕

អត្ថបទគួរចាប់អារម្មណ៍