The Phnom Penh Post Search

Search form




Logo of Phnom Penh Post newspaper Phnom Penh Post - សាលា​បឋម​ ​គោក​ត្រប់ ​ស្ទើរ​អស់​សិស្ស​ព្រោះ​តែ​គ្រាប់​ផ្ទុះ




សាលា​បឋម​ ​គោក​ត្រប់ ​ស្ទើរ​អស់​សិស្ស​ព្រោះ​តែ​គ្រាប់​ផ្ទុះ

Content image - Phnom Penh Post
ទិដ្ឋភាព​សិស្សា​នុសិ្ស និង​លោក​គ្រូ​អ្នក​គ្រូ​គោរព​ទង់ជាតិ នៅ​សាលា​បឋម​សិក្សា​គោក​ត្រប់។ រូប សហការី

សាលា​បឋម​ ​គោក​ត្រប់ ​ស្ទើរ​អស់​សិស្ស​ព្រោះ​តែ​គ្រាប់​ផ្ទុះ

សៀមរាបៈ សម្រាក!......ប្រុង.....!​តម្រង់​ជួរ! នេះ​ជា​រូបគោរព​ទង់ជាតិ​ ដែល​បក់​រវិចៗ ចង​ភ្ជាប់​ទៅ​នឹង​ចុង​បង្គោល​កូនឈើ​ងាប់កម្ពស់​ជិត ៣ ម៉ែត្រ បាន​ដោត​នៅ​ទីដី​វាល​មាន​ស្មៅ​ក្រៀម និងសំរាម​ស្លឹក​ឈើ​រាយ​ពាសដី​ ដោយ​គេ​ឃើញ​មាន​សិស្សានុ​សិស្សចម្រុះ​តូចធំ​ និង​លោក​គ្រូអ្នក​គ្រូ​រួមគ្នា​សរុប​ជាង ២០ នាក់ ពេលកំពុង​តែផ្ចង់​ស្មារតី​គោរព​ទង់ជាតិ។

បើតាម​រូបថត​មួយ​សន្លឹក​នេះ មើល​ទៅ​ពិត​ជា​គួរឲ្យ​អា​ណោច​អាធ័ម​ខ្លាំង​ណាស់។

ក្រោយពី​គោរព​ទង់ជាតិ​ចប់ ក៏​ស្រាប់តែ​មានឮ​សំឡេង​ដាស់តឿន​រំឭក​ក្តែងៗ​ពីសំណាក់​អ្នកគ្រូ​បង្រៀន​នៅ​ឯ​សាលា​បឋម​សិក្សា​គោក​ត្រប់ទៅ​សិស្សានុ​សិស្ស​របស់​ខ្លួនក្នុង​សម្តី​បែប​ទន់ភ្លន់ ដែល​ស័ក្តិសម​នាទីជា​អ្នក​អប់រំ​មួយរូប ហើយ​ក៏កាន់​តែសង្វេគ និង​បារម្ភ​ប្រហោង​ពោះ​ធ្លុង​តែម្តង​ហើយ​ពេល​អ្នកគ្រូ​ប្រាប់ថា៖ «កូនៗ... អ្នកគ្រូ​សុំ​តឿនណា! សូម​កូនៗ​កុំរត់​លេងក្រៅ​បរិវេណ​សាលា​រៀន ​ព្រោះថា​គ្រាប់មីន និង​គ្រឿងផ្ទុះ​នៅ​មិនទាន់​មាន​អ្នកណា​កាយ​យកទេ​មកទល់​ថ្ងែទី ២៥ មេសា​ឆ្នាំ ២០១៦ នេះ!»។

Content image - Phnom Penh Post
លោក មិត្ដ សុម៉ា បង្ហាញ​គ្រាប់​មិន​ទាន់​ផ្ទុះ​ដែល​រក​ឃើញ​នៅ​សាលា​ខាង​លើ។

បើតាម​សម្តីរបស់​លោក មិត្ត​ សុម៉ា ជាក្រុម​កងរាជ​អាវុធ​ហត្ថ ដែល​តែងតែ​ល្បាត​ក្បែរ​តំបន់​សាលានោះ​ បាន​ឲ្យដឹង​ថា៖ «បឋម​សិក្សាគោក​ត្រប់ មាន​ទីតាំង​ស្ថិតនៅ​ភូមិ​ឡាត ឃុំស្រែ​ខ្វាវ ស្រុក​អង្គរជុំ​ នៅក្នុង​ខេត្ត​សៀមរាប ចម្ងាយ​ប្រមាណ​ជិត ១៨ គីឡូម៉ែត្រ ពីទីប្រជុំ​ជននៃ​សាលា​ស្រុក។ សាលារៀន​នេះ​ កាលពី​ប៉ុន្មាន​ឆ្នាំមុន គឺមាន​សិស្ស​ជិត ២០០ នាក់ ហើយ​រៀននៅ​ថ្នាក់ទី ១ ដល់​ថ្នាក់ទី ៥ និង​មានគ្រូ​បង្រៀនតែ​ចំនួន ៣ រូប​ប៉ុណ្ណោះ (ស្រី ១ រូប​) ខណៈ​សាលា​មានតែ​មួយ​អគារ មាន​បួន​បន្ទប់។ តែសម្រាប់​ឆ្នាំនេះ​ សិស្ស​នៅ​សល់​តែ ១២០ នាក់​ប៉ុណ្ណោះ ក៏​ព្រោះតែ​សាលា​នៅឆ្ងាយ​ពីភូមិ​ឋាន​របស់​សិស្ស និង​បរិវេណ​សាលា​គឺជា​ទីគ្មាន​សុវត្ថិ​ភាព​សម្រាប់​ពួកគេ​រត់លេង​ឡើយ ដោយ​សារតែ​នៅមាន​សេសសល់​គ្រាប់​មិនទាន់​ផ្ទុះ​ ឬ​គ្រាប់មីន ​ដែលនៅ​ព្រៃ​ជុំវិញ​បរិវេណ​សាលា​នោះ​ ពុំទាន់​ត្រូវបាន​គេ​សម្អាត​ទៀត។ដូច្នេះ​ហើយ​បាន​ជា​ចំនួន​សិស្សា​នុសិស្ស​ទាំងនេះ ចេះតែ​ថយ​ចុះ​ទៅៗ»។

លោក​មានក្តី​រន្ធត់​ចិត្ត​ណាស់​ពេលឮ​អ្នកគ្រូ​សាលា​នោះ​បន្តថា៖ «កូនៗ​ត្រូវ​អត់ធ្មត់​ណា! ទោះបី​ជាសាលា​រៀន​យើងខ្សត់ លំបាក​លំបិន​មិនដូច​សាលា​ដទៃ​ក៏ដោយ ក៏យ៉ាង​ហោច​ណាស់​ កូនៗ នៅ​មានអ្នក​គ្រូ​ និងលោក​គ្រូ ២ នាក់ទៀត»។

យោង​តាម​ប្រភព​ដដែល​នេះបង្ហើប​ឲ្យដឹង​ពីភាព​ព្រងើយ​កន្តើយ​ និងខ្វះ​ការ​ទទួល​ខុសត្រូវ​ពីសំណាក់​អ្នក​ជំនាញ​ខាង​គ្រាប់​ផ្ទះ​ បើទោះ​បីជា​មាន​ការស្នើ​សុំពីអាជ្ញាធរ ឬ​សាលា​រៀនក្តី ក៏នៅ​តែ​បណ្តោយ​ឲ្យ​សាលា​បឋម​សិក្សាគោក​ត្រប់​ ឬប្អូនៗ​ជាសិស្ស​បន្តស្ថិត​នៅ​ក្នុងភាព​ប្រថុយ​ប្រថាន​ជាមួយ​នឹងគ្រាប់​មិនទាន់​ផ្ទះ ឬ​គ្រាប់​មីននេះ​គួរ​ឲ្យព្រួយ​បារម្ភ​មែន​ទែន។

លោក មិត្ត​ សុម៉ា បានបង្ហើប​បន្ថែម​ទៀត​ថា៖ «ខ្ញុំបាន​ឮ​ថា ខាង​នាយក​សាលាក៏​ធ្លាប់បាន​ស្នើទៅ​ដល់ខាង​ស៊ីម៉ាក់​ឲ្យមក​ដោះ​មីន និង​គ្រាប់​មិនទាន់​ផ្ទុះ​ទាំងអស់​នេះ​ដែរ តែគេ​នៅតែ​ប្រាប់ថា ចាំសិន!​ ហើយក៏​បន្ត​មកដល់​បច្ចុប្បន្ន​នេះ»៕​

អត្ថបទគួរចាប់អារម្មណ៍