The Phnom Penh Post Search

Search form

សាសា ស្តារប្រជាប្រិយភាព បន្ទាប់​ពីជួប​រឿងស៊យ​ផ្ទួនៗ

កញ្ញា សាសា អតីតពិធីការិនី​ទូរទស្សន៍ស៊ីធីអិន។
កញ្ញា សាសា អតីតពិធីការិនី​ទូរទស្សន៍ស៊ីធីអិន។ វុទ្ធី

សាសា ស្តារប្រជាប្រិយភាព បន្ទាប់​ពីជួប​រឿងស៊យ​ផ្ទួនៗ

ភ្នំពេញ: មួយរយៈ​ពេលចុងក្រោយ​បន្ទាប់​ពី​កើតមាន​រឿង​ស៊យ​ផ្ទួនៗគ្នាបន្ដ​បន្ទាប់​មក គេ​ស្រាប់​តែ​ឃើញ​អតីត​ពិធីការិនី ទូរទស្សន៍​ស៊ីធីអិន​ កញ្ញា សាសា បាន​បើក​យុទ្ធ​នាការ​ធ្វើ​អំពើមនុស្ស​ធម៌​មួយ ​ដោយ​បាននាំ​យក​នូវគ្រឿងបរិភោគនានា​ ទៅ​ចែកដល់​ប្រជាជន​ខ្មែរ​ក្រីក្រ​ ដែល​កំពុង​តែ​ស្នាក់​នៅ​ឯ​មន្ទីរ​ពេទ្យគន្ធបុប្ផា​ ស្ថិត​នៅ​ក្នុង​រាជ​ធានី​ភ្នំពេញ​កាល​ពី​ថ្ងៃទី ២២​ ខែ​តុលា ឆ្នាំ ២០១៥ កន្លង​មក​នេះ។

បើ​តាម​រូប​ថត​ប៉ុន្មាន​សន្លឹក​ដែល​បង្ហោះ​ក្នុងគេហទំព័រហ្វេសប៊ុក​របស់​កញ្ញា ឯក សុជាតា ហៅសាសា មុខ​ម្ហូប​ទាំង​នោះ​រួម​មាន​ដូច​ជា ​ត្រីងៀត ពងទាប្រៃ ឆាត្រកួន​កាពិ សម្លូម្ជូរ​ត្រកួន​ឆ្អឹងជំនីរជ្រូក ដោយ​ឃើញ​សកម្ម​ភាព​របស់​នាង និង​ក្រុម​មិត្ត​ភក្តិកំពុងតែ​ដុត​ដៃ​ដុត​ជើង​យ៉ាង​សកម្ម និង​មើល​ទៅទំនង​ឈ្ងុយ​ឆ្ងាញ់​ណាស់​ព្រោះ​នៅ​ស្រស់ៗ និងចម្អិនភ្លាមៗ ​ហើយ​ក្រៅពី​នេះមាន​ភេសជ្ជៈ និងទឹកសុទ្ធ​។​

បើ​តាម​សារ​សម្តី​ក្នុង​ទំព័រ​ហ្វេសប៊ុក​របស់​នាង​ឈ្មោះ Ek Socheata ឲ្យ​ដឹង​ថា៖ «បង​អើយ ខ្ញុំ​បានតែភ្លក្ស​ទេ អត់បាន​ញ៉ាំដែរ ព្រោះ​អស់​គ្មាន​សល់ទេ សូម្បីតែ​លោកគ្រូ​ពេទ្យ​ក៏​គាត់​ជួយ​ញ៉ាំ​ដែរ​ព្រោះ​ឈ្ងុយ​ពេក​ ចុងក្រោយ​គឺ​ពួក​ខ្ញុំញ៉ាំ​បាយ​ក្តាំង​ជា​មួយ​នឹង​អំបិល​ម្ទេស»។

កាលពី​ដើម​ខែ​តុលា​នេះ​នៅក្នុង​គណនី​នៃ​ហ្វេសប៊ុកកញ្ញា សាសា ​មាន​បង្ហោះ​បង្ហាញ​ពី​ឯកសាររត់​ការ​ចេញ​ទៅក្រៅ​ប្រទេស ខណៈ​មក​ដល់ពេល​នេះ ​[ចុង​ខែ​តុលា​] គេ​ឃើញ​តម្រុយ​ថាប្រទេស​បារាំងគឺ​ជា​គោល​ដៅ​នៃ​ការ​ហោះហើរចេញទៅ​ក្រៅ​ប្រទេស​របស់​នាង។

ភ្ជាប់នឹង​រូប​ថត​​នោះនាង​​បាន​សរសេរ​ថា៖ «ខ្ញុំត្រៀម​ទទួល​ទិដ្ឋាការ​ទៅ​ក្រៅ​ប្រទេស ចុះ​មិត្តភក្ដិ​ឯង​វិញ?»​។

កាលពី​យប់​ថ្ងៃ​ទី ២ ខែ​កក្កដា ឆ្នាំ ២០១៥ វេលាម៉ោងជាង ១ រំលង​អ្រធាត្រ ​កញ្ញា សាសា ត្រូវបាន​រង​គ្រោះ​ដោយ​វាយ​តប់​យ៉ាង​ដំណំ​ពី​សំណាក់ឧកញ៉ា សុខ ប៊ុន។

នា​ថ្ងៃ​ទី ៣ ខែ​សីហា ភ្នំពេញប៉ុស្តិ៍ បាន​ធ្វើការ ទាក់ទង​ជាមួយ​មន្ត្រី​ប៉ូលិស​ចរាចរណ៍​ពី​ដំណើរ​រឿង​នៃគ្រោះថ្នាក់ដែលបាន​កើត​នៅ​ត្រង់​ចំណុច​ក្បែរមន្ទីរពេទ្យ​វិសាល​សុខស្ថិតនៅ​ក្នុង​ភូមិ​ ព្រែក​មហាទេព សង្កាត់​ស្វាយប៉ោ នៅ​ក្រុង​បាត់ដំបង រវាង​រថយន្ដ​ដ៏​ទំនើប​មួយ​គ្រឿងម៉ាក Porsche ដែល​មាន​គេអះអាង​ថា​ គឺ​ជា​រថ​យន្ដ​របស់​កញ្ញា​សាសា​ អតីត​ពិធីការិនី​ទូរទស្សន៍​ស៊ីធីអិន​ ប៉ះជា​មួយ​នឹង​ម៉ូតូ​សណ្ដោង​រ៉ឺម៉ក​ដឹក​ទឹក​កក ​កាល​ពី​វេលា​ម៉ោង ១១ និង ៥០ នាទី​យប់នា​ថ្ងៃ​ទី ២ ខែ​សីហា​​ ឆ្នាំ ២០១៥។

គួរ​រំឭក​ផង​ដែរ​ថា​ កាលពី​ខែ​ឧសភាកន្លង​មក​ កញ្ញា សាសា ​ក៏​ធ្លាប់​ត្រូវ​បាន​ព័ត៌មាន​ចុះ​ផ្សាយ​ថា​ នាងបានបើក​រថយន្ដ​ Porsche ពណ៌ស​ទៅបុកជនបរទេស​បាក់​ដៃនា​រាត្រី​ថ្ងៃ​ទី១៥ ខែ​ឧសភា ​ឆ្នាំ ២០១៥ នៅ​ម្ដុំ​បឹង​ត្របែក​។ ​

កាល​នោះ​នាង​បាន​បង្ហោះ​វីដេអូ​មួយ​ដែល​មានការបកស្រាយ​ថា ​រូប​នាង​បាន​ញ៉ាំ​គ្រឿងស្រវឹង​តិចតួច​មែន ក៏​ប៉ុន្តែតាម​​ការពិត​គឺរូបនាង​ទេ​ ដែល​ជាជនរង​គ្រោះ ដោយ​សារ​​រថ យន្តនាងត្រូវ​ម៉ូតូ​របស់បុរសជា​​ជនបរទេស ស្រវឹង​នោះ​​មកបុកប៉ះ​ចំ​ពីចំហៀង៕

អត្ថបទគួរចាប់អារម្មណ៍

  • គម្រោង​ធំៗ​ជាច្រើន​អាច​នឹង​លេច​ឡើង​នៅ​តាម​មាត់ទន្លេ

    ក្រុមហ៊ុន​អភិវឌ្ឍន៍​ដ៏ធំ​មួយ​របស់​ចិន​មាន​ប្លង់​រចនា​ក្នុង​ការ​អភិវឌ្ឍ​នៅ​តាម​បណ្តោយ​ឆ្នេរ​ទន្លេ​ដែល​គម្រោង​នោះ​រួម​មាន​ខុនដូ​ប្រណីត អគារ​ការិយាល័យ ខណៈ​បច្ចុប្បន្ន​ទីតាំង​នោះ​ត្រូវ​បាន​គ្រប់គ្រង​ដោយ​កំពង់ផែ​ស្វយ័ត​រាជធានី​ភ្នំពេញ​។

  • ស្ថាបត្យកម្ម និង​វិចិត្រសិល្បៈ គឺ​មិន​អាច​ញែក​ដាច់​ពី​គ្នា​បាន​ឡើយ

    នៅក្នុង​បន្ទប់​សិក្សា​ក្នុង​ផ្ទះ​ធំ​មួយ​នៅ​តាម​មាត់ទន្លេ​ក្នុង​រាជធានី​ភ្នំពេញ លោក ថាង សុធា វ័យ​ ៣៥ ​ឆ្នាំ​កំពុង​ពិនិត្យ​មើល​ប្លង់​រចនា 3D របស់​បន្ទប់​គេង​នៃ​អាផាតមិន​មួយ​ដែល​ជា​ផ្នែក​នៃ​គម្រោង​កែលម្អ​ចុងក្រោយ​បំផុត​ដែល​លោក​បាន​ចូលរួម​ធ្វើ​កាលពី​ប៉ុន្មាន​ឆ្នាំ​មុន នៅ​លើ MacBook ដើម្បី​បំផុស​គំនិត​សម្រាប់​ការងារ​នាពេល​អនាគត​។

  • ត្រី​ចិញ្ចឹម​ប្រមាណ​ ១២ ​តោន​ងាប់​ដោយ​កម្ដៅ​ពេល​ទឹក​ស្រក

    កំពង់ឆ្នាំងៈ យ៉ាង​ហោចណាស់​ត្រី​ចិញ្ចឹម​តាម​ដង​ទន្លេ​ស្ថិត​ក្នុង​សង្កាត់​ខ្សាម និង​ផ្សារឆ្នាំង ខេត្ត​កំពង់ឆ្នាំង​ប្រមាណ​ជា​ ១២ ​ពាន់​គីឡួ​បាន​ងាប់​ក្នុង​រយៈពេល​ ៣ ​ថ្ងៃ ព្រោះ​តែ​ទឹក​បាន​ស្រក​ចុះ​ជា​គំហុក និង​ក្ដៅ​ខ្លាំង​។ នេះ​បើ​យោង​តាម​ការរៀបរាប់​របស់​ប្រជានេសាទ​ក្នុង​តំបន់​នោះ​ដែល​មាន​ប្រមាណ​ជា​ ៧០ ​គ្រួសារ​។

  • ព្រះរាជអាជ្ញា​ភ្ជាប់​រឿង​ហិង្សា​នៅ​ស្ពាន​នាគ​ជា​ចលនា​បដិវត្តន៍​ពណ៌

    ភ្នំពេញៈ សាលាឧទ្ធរណ៍​នៅ​ព្រឹក​ថ្ងៃ​ពុធ​ម្សិលមិញ​បាន​បញ្ចប់​សវនការ​ជំនុំជម្រះ​សំណុំ​រឿង​ហិង្សា​នៅ​ស្ពាន​នាគ​កាលពី​ខែ​កក្កដា ឆ្នាំ ២០១៤ ដោយ​ព្រះរាជអាជ្ញា និង​មេធាវី​ការពារ​ដើមបណ្ដឹង​សម្រេច​ភា្ជប់​ករណី​ហិង្សា​នោះ​ទៅ​នឹង​បដិវត្តន៍​ពណ៌ បន្ទាប់ពី​សវនការ​រយៈពេល​ ៣ ​ថ្ងៃ​ជាប់ៗ​គ្នា​។ ទោះ​ជា​យ៉ាងណា​ក៏ដោយ​ភាគី​ជនរងគ្រោះ​ថា​គ្មាន​អំពើ​កុបកម្ម​កើតឡើង​ទេ​ និង​ស្នើ​ដល់​តុលាការ​ឲ្យ​ដោះលែង​ពួកគេ​។