ភ្នំពេញ៖ នៅខែមេសា ឆ្នាំ ២០២០ ខាងមុខនេះ ក្រុមសិល្បករ ដែលមានសាស្រ្តាចារ្យខ្មែរវិចិត្រករបរទេស និងនិស្សិតខ្មែរកំពុងសិក្សានៅសាកលវិទ្យាល័យភូមិន្ទវិចិត្រសិល្បៈ នឹងមានការរៀបចំការពិព័រណ៍ស្នាដៃរួមគ្នាមួយក្រោមចំណងជើងថា «ការចងចាំ» ដោយធ្វើនៅសារមន្ទីរទួលស្លែង នៅក្នុងខែមេសា ឆ្នាំ ២០២០ ខាងមុខនេះ ដោយមានស្នាដៃសរុបប្រមាណចំនួន ២៤-២៥ ផ្ទាំង ដាក់តាំងក្នុងរយៈពេលប្រហែល ១-២ ខែ។
លោកសាស្រ្តាចារ្យ ច័ន្ទ វិត្ថារិន្ទ ជាស្ថាបនិករោងជាងចារ និងសាស្ត្រាចារ្យផ្នែកមុខជំនាញ «ផ្តិតរូបពីពុម្ព» ហើយក៏ជាសាស្ត្រាចារ្យខ្មែរដំបូង បានទៅបង្រៀនអំពីក្បាច់ខ្មែរ និងបេតិកភណ្ឌសិល្បៈកម្ពុជា នៅឯប្រទេស ម៉ិកស៊ិក នោះបង្ហើបឲ្យដឹងថា៖ «គម្រោងនេះ ខ្ញុំបានសន្សំគិតទុកប្រមាណ ២ ឆ្នាំមកហើយ។ ដូច្នេះនៅក្នុងខែមេសា ឆ្នាំ ២០២០ ខាងមុខនេះ នឹងរៀបចំឲ្យមានការតាំងពិព័រណ៍ស្នាដៃរួមគ្នាមួយ ដែលជាការសហការគ្នារវាង ខ្ញុំបាទ ជាមួយនឹងវិចិត្រករម៉ិកស៊ិក អូស្ត្រាលី និស្សិតខ្មែរ ដែលកំពុងតែសិក្សានៅសាកលវិទ្យាល័យភូមិន្ទវិចិត្រសិល្បៈផ្នែក «ផ្តិតរូបពីពុម្ព» និងមានការចូលពីលោក ប៊ូ ម៉េ ដែលអតីតជាអ្នកទោសនៅសារមន្ទីរទួលស្លែង ដោយលោកមានទេពកោសល្យខាងសិល្បៈគំនូរដែរ។ យើងគ្រោង នឹងយកស្នាដៃចំនួន ២៤-២៥ ផ្ទាំង សម្រាប់ដាក់តាំងបង្ហាញមានរយៈពេលប្រហែល ១ ខែ ឬ ២ ខែ តាមភាពជាក់ស្តែង។
លោកសាស្រ្តាចារ្យ ច័ន្ទ វិត្ថារិន្ទ បានបន្តថា៖ «ក្រៅពីនេះ ខ្ញុំក៏មានគម្រោងធ្វើសៀវភៅ លើមុខជំនាញនេះ គឺជាការប្រមូលផ្តុំស្នាដៃរបស់និស្សិតគ្រប់ជំនាន់ ដើម្បីចងក្រងទុកជាឯកសារសម្រាប់អ្នកជំនាន់ក្រោយ ដែលនេះក៏ជាសមិទ្ធផលមួយរបស់និស្សិតបានបញ្ចប់ការសិក្សាវគ្គ «ផ្តិតរូបពីពុម្ព» ផងដែរ។
ដោយសារតែមើលឃើញការវិវឌ្ឍនៃមុខជំនាញសិល្បៈផ្នែក «ផ្តិតរូបពីពុម្ព» តាំងពីឆ្នាំ ២០១១ មកនោះ ក្រុមសាស្រ្តាចារ្យ និងគណៈគ្រប់គ្រងនៃសាកលវិទ្យាល័យភូមិន្ទវិចិត្រសិល្បៈ ក៏មានគម្រោងបង្កើតមុខវិជ្ជាថ្មីមួយនេះ សម្រាប់ការសិក្សាថ្នាក់ជំនាញដូចជាមុខជំនាញនៃមហាវិទ្យាល័យនានា នៅឯសាកលវិទ្យាល័យភូមិន្ទវិចិត្រសិល្បៈផងដែរ នាពេលអនាគតឆាប់នេះ។
សាស្រ្តាចារ្យមុខជំនាញ «ផ្តិតរូបពីពុម្ព» និងជាស្ថាបនិករោងជាងចារ រូបនេះ ក៏ឲ្យដឹងពីការបញ្ជ្រាបនូវមុខជំនាញថ្មីនេះ នៅរោងជាងចារ តាំងពីឆ្នាំ ២០១១ មកនោះដែរថា៖ «កាលពីដំបូងយើងបាន បញ្ចូលឲ្យនិស្សិតមករៀនជាបណ្តើរៗរហូតមក។តែនារយៈពេលប៉ុន្មាន ៣-៤ ឆ្នាំ ចុងក្រោយនេះ យើងបានតម្រូវឲ្យតែនិស្សិតឆ្នាំទី២ ផ្នែកឌីហ្សាញ និងនិស្សិតឆ្នាំទី ៤ ផ្នែកវិចិត្រកម្ម និងផ្នែកចម្លាក់ ក៏ត្រូវបានសាកលវិទ្យាល័យភូមិន្ទវិចិត្រសិល្បៈតម្រូវឲ្យរៀនជំនាញ «ផ្តិតរូបពីពុម្ព» នេះ រយៈពេល ១ ឆ្នាំ។
ខណៈមុខវិជ្ជានេះ ទើបតែមាននៅត្រឹមឆ្នាំ ២០១១ ដោយរោងជាងចារ គឺជាផ្នែកមួយនៃទីកន្លែង សម្រាប់និស្សិតចូលមកសិក្សាស្វែងពីជំនាញថ្មីនេះ ទៅតាមឆ្នាំនីមួយៗរហូតមក។ ចំពោះម៉ោងសិក្សាវិញគឺមានត្រឹមតែ ២ ម៉ោងប៉ុណ្ណោះ ក្នុងមួយសប្តាហ៍ ហើយទៅថ្ងៃអនាគត និស្សិតដែលចង់រៀនជំនាញនេះនឹងមានម៉ោងសិក្សាច្រើនដូចជំនាញឯកទេសដទៃទៀតជាមិនខានឡើយ»៕