.jpg)
សាឡាត់ ស្រីឡាង កាន់តែស្និទ្ធស្នាលនឹងបុរសល្បីថាជាក្រុមយុវជនសំរាម។ រូបថត អីុនស្តាក្រាម, តារាសម្តែងស្រីរាងខ្ពស់ស្រឡះ កញ្ញា សាឡាត់ ស្រីឡាង។ រូបថត ហុង មិនា
ភ្នំពេញ៖ ថ្មីៗនេះ មហាជនងាកមកតាមដាន និងភ្ញាក់ផ្អើលនឹងបណ្តុំរូបថតដ៏ផ្អែមល្ហែមបែបជាគូស្នេហ៍យល់ចិត្តយល់ថ្លើមគ្នា រវាងតារាសម្តែងស្រីរាងខ្ពស់កញ្ញា សាឡាត់ ស្រីឡាង និងបុរសម្នាក់ធ្លាប់ល្បីឈ្មោះរឿងធ្វើសកម្មភាពជួយសង្គម សាន ដារ៉ាវីត ដោយមជ្ឈដ្ឋានក្រៅហៅរហស្សនាមថា «ក្រុមយុវជនសំរាម» នោះ ហាក់បានរំសាយចំណាប់អារម្មណ៍រឿងចចាមអារ៉ាមបង្កាត់ភ្លើងស្នេហ៍នឹងចាងហ្វាងផលិតកម្ម LD បាត់ទៅហើយដែរ។
តាមបណ្តុំរូបភាពដើរលេងតែ ២ នាក់ ប្រកបដោយសេចក្តីសុខខ្លាំង ដែលភាគច្រើនបានទៅលម្ហែកាយនៅតំបន់សមុទ្រនោះ តារាស្រីវ័យ ២៥ ឆ្នាំ សាឡាត់ ស្រីឡាងក៏បង្ហោះសារជាហូរហែ និងវែងអន្លាយថា៖ «ចេះប្រើពេល ទើបជីវិតមានន័យ។ អង្គុយមើលសមុទ្រ ជិះទូក ស្ទូចត្រី ស្តាប់សំឡេងទឹកភ្លៀង វាជាក្តីសុខ ដែលមនុស្ស ២ នាក់ ចេះចែករំលែកឲ្យគ្នា។ មិនត្រូវការពេលវេលាពេញម៉ោងរបស់នរណាម្នាក់មកក្បែរខ្លួនទេ គេមានពេលរវល់របស់គេ ខ្ញុំក៏ត្រូវការពេលវេលារបស់ខ្ញុំ តែអ្វីដែលសំខាន់យើងបានចែកពេលខ្លះឲ្យគ្នា ដើម្បីចាក់បំពេញស្នាមញញឹម និងផ្តល់ភាពកក់ក្តៅឲ្យគ្នា»។
តារាសម្តែងស្រីស្រស់ កញ្ញា សាឡាត់ ស្រីឡាង ក៏បញ្ជាក់ពីជម្រើសរបស់ខ្លួនសម្រាប់ក្តីស្នេហ៍នឹងបុរសវ័យក្មេងលោក សាន ដារ៉ាវីត ដែលជាស្ថាបនិកក្រុមយុវជនសំរាមផងដែរថា៖ «ការជ្រើសរើស គឺសំខាន់ពីមុន ខ្ញុំបានជ្រើសរើសប្រគល់ស្ទើរគ្រប់យ៉ាងដែលជាក្ដីសុខរបស់ខ្ញុំឲ្យទៅមនុស្សផ្សេងក្រៅពីខ្លួនឯង។ តែអ្វីដែលត្រឡប់មកវិញគឺរបួសដែលឈឺ ទឹកភ្នែកដែលស្រក់ តែសម្រាប់ពេលនេះអ្វីដែលខ្ញុំរើសយកគឺក្ដីសុខរបស់ខ្លួនឯងស្រឡាញ់ខ្លួនឯងជាងអ្នកដទៃ។ បើសូម្បីតែខ្លួនយើង យើងមិនស្រឡាញ់ផង តើឲ្យអ្នកណាមកស្រឡាញ់យើង តែពេលនេះ ជីវិតពិតជាមានន័យ ទោះធ្វើការច្រើន តែក៏មានក្ដីសុខ ព្រោះបានឃើញស្នាមញញឹមពីមនុស្ស ដែលស្រឡាញ់ខ្ញុំ។
ក្រោយពីមានទំនាក់ទំនងស្នេហ៍នឹងបុរសក្មេងល្បីឈ្មោះរឿងចូលរួមធ្វើសកម្មភាពជួយសង្គមសាន ដារ៉ាវីត ដែលមជ្ឈដ្ឋានខាងក្រៅហៅរហស្សនាមថា «ក្រុមយុវជនសំរាម» មកនោះ កញ្ញា សាឡាត់ ស្រីឡាង ហាក់ស្ងាត់ទីផ្សារថតកុន តែមកសកម្មនឹងការងារជួយសង្គម ដូចជាការយកសម្ភារសិក្សាចែកដល់សិស្សក្រីក្រនៅឯតំបន់ដាច់ស្រយាលដែលជាកុមាររងគ្រោះ និងជនពិការ ក្រោយមកក៏ឃើញនាងប្រកាសលក់សៀវភៅយកថវិកាផ្គត់ផ្គង់ដាំកូនឈើ។
តារាសម្តែងស្រីរាងស្រលូនខ្ពស់ កញ្ញា សាឡាត់ ស្រីឡាង ធ្លាប់ល្បីរឿងបែកធ្លាយថា មានទំនាក់ទំនងស្នេហានឹងលោក លៀក លីដា គឺជាម្ចាស់ផលិតកម្ម LD ហើយត្រូវបានភរិយា លោកមានគណនីហ្វេសប៊ុកឈ្មោះ «Panhchaka June» បង្ហោះសាររៀបរាប់ពីការផិតក្បត់របស់ស្វាមីខ្លួនជាមួយនឹងតារាសម្តែងស្រីរូបនេះ ដោយបានទម្លាយថា មានទាំងការទិញរថយន្ត និងផ្ទះឲ្យនាងទៀតផង៕
