ភ្នំពេញៈ តារាសម្តែងស្រីរាងខ្ពស់ស្រឡះកញ្ញា សាឡាត់ ស្រីឡាង ហាក់ស្ងាត់ទីផ្សារថតកុន ក្រោយពីផ្ទុះរឿងអាស្រូវស្នេហាល្បីមានទំនាក់ទំនងនឹងម្ចាស់ផលិតកម្ម LD Picture តែនាងបែរមកសកម្មការងារជួយសង្គមដូចជាការយកសម្ភារសិក្សាចែកដល់សិស្សក្រីក្រនៅតំបន់ដាច់ស្រយាលដែលជាកុមាររងគ្រោះ និងជនពិការ ខណៈថ្មីៗឃើញនាងប្រកាសលក់សៀវភៅយកថវិកាផ្គត់ផ្គង់ដាំកូនឈើទៀត។
តារាស្រីសម្បុរស្រអែមវ័យ ២៤ ឆ្នាំ កញ្ញា សាឡាត់ ស្រីឡាង ប្រាប់ភ្នំពេញប៉ុស្តិ៍ថា៖ «ការងារជួយសង្គមនេះ ខ្ញុំបានចាប់ផ្តើមធ្វើច្រើនឆ្នាំមកហើយ ដោយចូលរួមជាមួយបង តាន់ គឹមសួរ ដែលជាមេក្រុមមានឈ្មោះថា «អ្នកប្រយុទ្ធបៃតង» គឺយើងបានជួយស្ត្រី និងកុមាររងគ្រោះពីអំពីហិង្សានានា និងជនពិការមិនមានការងារធ្វើ»។
តារាសម្តែងស្រីដែលចាប់ផ្តើមមានការគាំទ្រតាំងពីសម្តែងកុនខ្នាតធំដំបូងរឿង «ខ្មោចអាសង្ហា» និងកុនភាគជាច្រើនដូចជារឿង «មន្តស្នេហ៍ក្រមុំបាយឆា» រឿង «ទីបញ្ចប់នៃស្នេហ៍» ជាដើមនោះហាក់ដូចជាស្ងប់ស្ងាត់ទីផ្សារថតកុនវិញ ខណៈមហាជនគិតថាប្រហែលមកពីមានរឿងអាស្រូវស្នេហាត្រីកោណ ជាមួយម្ចាស់ផលិតកម្ម LD Picture នោះហើយ។ ប៉ុន្តែតារាស្រីរូបនេះបានអះអាងថា៖ «ព្រោះជាប់រវល់ធ្វើកិច្ចការសង្គម ទើបមិនមានពេលវេលាសម្រាប់ការងារសិល្បៈ»។
តារាស្រីមានថ្ពាល់ខួច ញញឹមស្រស់ រាងខ្ពស់ កញ្ញា ស្រីឡាង បន្ថែមពីការដាំកូនឈើទៀតថា៖ «ក្រុមអ្នកប្រយុទ្ធបៃតងរបស់យើងកំពុងតែមានគម្រោងដាំកូនឈើចំនួន ១០ ម៉ឺនដើមនៅទីតាំងចំនួន ១០ ខេត្តដោយមួយខេត្តត្រូវដាំ ១ ម៉ឺនដើម។ ប៉ុន្តែគោលដៅដែលពួកខ្ញុំត្រូវដាំដំបូងគេនោះគឺនៅឯភ្នំឱរ៉ាល់នឹងដាំនៅថ្ងៃទី ៣ ខែ សីហា ឆ្នាំនេះ ហើយក៏មានក្រុមតារាសិល្បៈជាច្រើនរូបចូលរួមផងដែរ។ ចំណែកឯដីដាំគឺសុំបានការអនុញ្ញាតពីក្រសួងហើយ តែខ្ញុំក៏មិនច្បាស់ថាក្រសួងណាទេបង គឹមសួរ ទើបគាត់ដឹងច្បាស់»។
ចំពោះថវិកាចំណាយលើការដាំកូនឈើទាំងនេះ កញ្ញា សាឡាត់ ស្រីឡាង ក៏បានបញ្ជាក់ទៀតថា៖ «បានជំនួយពីសប្បុរសជនមួយចំនួន និងបានពីការលក់សៀវភៅដែលបានការឧបត្ថម្ភពីបងស្រី ម៉ីសន សុធារី និងបង ធីតា នៅខាងទូរទស្សន៍ភីអិនអិនចំនួន ២០០ ក្បាល ដែល ១ ក្បាល តម្លៃ ២ ៥០០៛ ដែលក្នុងនោះមានសៀវភៅចំណងជើងថា «ពេលវេលា» រឿង «ថ្ងៃមុនស្អប់ថ្ងៃនេះស្រឡាញ់» និងរឿង «អាគមបរព្រៃ » ប៉ុន្តែ ខាងយើងក៏នៅខ្វះថវិកាច្រើនណាស់សម្រាប់ការមើលថែរក្សាកូនឈើរហូតដល់ ៥ ឆ្នាំ។ អ៊ីចឹងហើយយើងព្យាយាមរកជំនួយបន្ថែម»។
តារាស្រីស្រាប់តែមានទំនោរងាកមកធ្វើការងារជួយសង្គមរូបនេះ ក៏បញ្ជាក់ពីការងារសិល្បៈដែរថា៖ «ការងារសិល្បៈគឺខ្ញុំជាប់រវល់ខ្លាំងថតស្ប៉តពាណិជ្ជកម្ម តែក៏ត្រូវមើលដែរថាព្រោះមិនចង់ឲ្យប៉ះពាល់ដល់ការងារជួយសង្គមទេ។ តាមពិតទៅការងារទាំង ២ នេះស្រឡាញ់ដូចគ្នា ប៉ុន្តែចង់ជួយប្រជាជនយើងច្រើនជាង។ ឯការថត MV វិញនៅទទួលធម្មតា ខណៈកុនថ្មីខ្ញុំក៏កំពុងតែចរចានឹងផលិតកម្ម មិនដឹងថាបានឬអត់ទេ»៕