ភ្នំពេញ៖ ដោយមានគោលដៅចង់អភិរក្សរក្សានូវស្នាដៃ និងបង្ហាញឲ្យប្រជាជនខ្មែរបានដឹង និងស្គាល់ពីតម្លៃ ឬសារសំខាន់នៃសំណង់ចាស់ៗ ដែលជាផ្នែករបស់ស្ថាបត្យកម្មខ្មែរ សម័យបុរាណមានអាយុកាលលើស ១៥០ ឆ្នាំឡើងនោះ ក៏មានការរៀបចំសិក្ខាសាលាអន្តរជាតិលើកទី ១ ស្តីអំពីការចងក្រងជាឯកសារស្ថាបត្យកម្ម ដែលមានការចូលរួមដោយស្ថាបត្យករជាតិ និងអន្តរជាតិ នឹងធ្វើឡើងនៅវត្តកំពង់ត្រឡាចលើ ខេត្តកំពង់ឆ្នាំង។
លោក ម៉ៅ វុត្ថា អ្នករៀបចំកម្មវិធីសិក្ខាសាលាអន្តរជាតិចងក្រងឯកសារស្ថាបត្យកម្មកម្ពុជា (Vernadoc Cambodia) បានប្រាប់ឲ្យដឹងថា៖ «សិក្ខាសាលាអន្តរជាតិលើកដំបូងបង្អស់នៅកម្ពុជានេះ ស្តីពីការចងក្រងឯកសារស្ថាបត្យកម្មខ្មែរ មានគោលបំណងចង់ថែរក្សា និងផ្តល់តម្លៃដល់អគារស្ថាបត្យកម្មបេតិកភណ្ឌនានាដែលមាននៅក្នុងស្រុកខ្មែរ។ សិក្ខាសាលានេះ នឹងធ្វើរយៈពេល ១៥ ថ្ងៃ គឺចាប់ពីថ្ងៃទី ៥ ដល់ថ្ងៃទី ១៩ ខែ វិច្ឆិកា ឆ្នាំ ២០១៩ ដោយយើងចែកចេញជា ២ ដំណាក់កាលគឺ ទី១ ចាប់ពីថ្ងៃទី ៥ ដល់ទី ១១ គឺការបោះជំរំដើម្បីសិក្សាវាស់វែងនៅមូលដ្ឋានវត្តពោធិរុក្ខារាម ហៅវត្តកំពង់ត្រឡាចលើ នៅឯស្រុកកំពង់ត្រឡាច ខេត្តកំពង់ឆ្នាំង ហើយដំណាក់កាលទី ២ ចាប់ពីថ្ងៃទី ១៣ ដល់ទី ១៨ គឺការគូររូប លាយពណ៌នៅឯទីតាំងសាកលវិទ្យាល័យភូមិន្ទវិចិត្រសិល្បៈ។ ការចូលរួម គឺយើងក្រុមស្ថាបត្យករជាតិ និងអន្តរជាតិជាង ២០ រូប នឹងជួបប្រជុំគ្នា ដើម្បីធ្វើការងារចងក្រងឯកសារនេះ។ ខណៈក្រុមស្ថាបត្យករខ្មែយើង មានចំនួន ១៥ រូប ដែលជានិស្សិតទើបបញ្ចប់ការសិក្សាផ្នែកស្ថាបត្យកម្ម និងក្រុមស្ថាបត្យករមកពីបរទេស មានបទពិសោធច្រើន មកពីប្រទេសហ្វាំងឡង់ ម៉ាឡេស៊ី ថៃ និងមកពីបង់ក្លាដែស»។
លោកបន្តថា៖ «លទ្ធផលទទួលបាននឹងធ្វើឲ្យសហគមន៍យល់កាន់តែច្បាស់អំពីគុណតម្លៃរបស់អគារ ហើយចូលរួមថែរក្សា អភិរក្ស បណ្តាអគារទាំងនោះ។ វត្តកំពង់ត្រឡាចលើ ត្រូវបានគេជ្រើសរើសជាជំរំមូលដ្ឋាន សម្រាប់សិក្ខាសាលារបស់យើងនៅកម្ពុជាព្រោះថាវត្តនេះ គឺជាវត្តដ៏ចំណាស់ជាងគេមួយនៅក្នុងចំណោមវត្តទាំងឡាយនៅក្នុងខេត្តកំពង់ឆ្នាំង។ ម៉្យាងវត្តនេះ ក៏ត្រូវបញ្ចូលជាសម្បត្តិបេតិកភណ្ឌវប្បធម៌របស់ជាតិ ដោយមានស្នាដៃគំនូរបុរាណក្នុងព្រះវិហារដូចជាមានអាយុកាលជិត ២០០ ឆ្នាំ និងមានប្រវត្តិទាក់ទងនឹងប្រវត្តិសាស្រ្តសម័យលង្វែក។
ក្រោយពីចប់គម្រោងដំបូងនេះ ក្រុមអ្នករៀបចំកម្មវិធីសិក្ខាសាលាអន្តរជាតិចងក្រងឯកសារស្ថាបត្យកម្មខ្មែរ ក៏មានគោលដៅបន្តធ្វើការងារនៅទីតាំងផ្សេងៗទៀតដែរ។
លោក ម៉ៅ វុត្ថា បង្ហើបថា៖ «ជាគោលដៅបន្ទាប់ ប្រសិនបើការងារដំបូងនេះ បានដំណើរការល្អនោះ យើងក៏គ្រោងធ្វើនៅតាមខេត្តចំនួន ៣ ទៀតដែរ គឺខេត្តបាត់ដំបង ក្រចេះ និងខេត្តកំពត ដោយសារតែខេត្តទាំងនេះ ហាក់សម្បូរទៅដោយសំណង់អគារ និងផ្ទះបុរាណ ដែលអាចមានអាយុកាលច្រើនគឺលើសពី ១៥០ ឆ្នាំ»៕