សិង្ហបុរី៖ នៅកន្លែងបិតស្រាមួយក្នុងប្រទេស សិង្ហបុរី ក្លិនស្រល់ដ៏ឈ្ងុយឈ្ងប់ រុក្ខជាតិ និងផ្កាជះក្លិនពិដោរ នៅពេលដែលក្រុមនិស្សិតកិនគ្រាប់ប៊ឺរី រួចក្រឡុកវាជាមួយគ្រឿងផ្សំផ្សេងៗតាមតម្រូវការដើម្បីផលិតជាស្រាជីនតាមបែបផែនរសជាតិអាស៊ី។
ឪទិនចំហុយស្ពាន់ដ៏ភ្លឺរលោង បន្ដដោយបំពង់ខ្សៀសម្រាប់បង្ហូរស្រា និងក្រឡកែវដាក់តម្រៀបគ្នាលើតុ ខណៈដែលទូមួយផ្អែកនៅជញ្ជាំងសម្រាប់ដាក់ក្រឡស្រាជីន រួមទាំងថតតុជាច្រើនសម្រាប់ដាក់គ្រឿងផ្សំរសជាតិរុក្ខជាតិ។
ក្រុមនិស្សិតត្រូវបានលើកទឹកចិត្ដឲ្យចេះបង្កើតភាពច្នៃប្រឌិត និងចេះបិតស្រាទៅតាមរសជាតិផ្ទាល់ខ្លួន ដោយការលាយក្រូច ផ្កា រុក្ខជាតិបន្ថែមក្លិន ឬក៏គ្រឿងទេស ក្រឡុកបញ្ចូលគ្នាជាមួយផ្លែប៊ឺរីខ្មៅ និងគ្រាប់ជីវាន់ស៊ុយ ដែលរួមទាំងស្លឹករបស់វាទទួលបានការពេញនិយមសម្រាប់ការបន្ថែមក្លិនលើម្ហូបអាហារ។
ពួកគេត្រូវបានផ្ដល់ឲ្យនូវរុក្ខជាតិ និងផ្លែឈើមួយថាស រួមមាន អំពិល ស្លឹកតើយ និងផ្កាខ្ញីសម្រាប់បង្កើនក្លិនឈ្ងុយដែលរមែងត្រូវបានប្រើប្រាស់នៅក្នុងម្ហូបអាហារទូទាំងតំបន់អាស៊ីអាគ្នេយ៍។
អ្នកស្រី ចាមី កោះ ស្ថាបនិក Brass Lion Distillery ដែលបង្កើតបង្រៀនបិតស្រាជីនចុងសប្ដាហ៍ បាននិយាយថា៖ «ការបិតស្រាជីនអនុញ្ញាតឲ្យលោកអ្នកមានគំនិតច្នៃប្រឌិតខ្ពស់។ លោកអ្នកអាចប្រើរុក្ខជាតិតិចតួច ឬអាចលាយមួយទំហឹងដៃទៅតាមចិត្ដចង់ និងបន្ថែមរុក្ខជាតិរាប់លានប្រភេទក៏បាន»។
ស្រាជីន ជាទូទៅមានរសជាតិចម្បងផ្ដោតលើផ្លែប៊ឺរីខ្មៅ តែគ្រឿងផ្សំរុក្ខជាតិផ្សេងៗត្រូវបានប្រើប្រាស់សម្រាប់ផ្គាប់ចិត្ដបុគ្គលនីមួយៗយ៉ាងពិសេសទៅតាមចំណូលចិត្ដរបស់ពួកគេរៀងៗខ្លួន។
អ្នកស្រី ថូនយ៉ា សារ អាយុ ៤៥ ឆ្នាំ លើកដើមខ្ជាយ ជាប្រភេទរុក្ខជាតិមើមស្រដៀងខ្ញី ហិត រួចកាត់វាជាដុំៗ។ អ្នកស្រីបានបន្ថែមគ្រឿងផ្សំ ១ ថាសទៀតដល់ក្រុមនិស្សិត ដែលរួមមានទាំងផ្កាឡាវេនឌ័រ និងកុលាបក្រពុំ។
អ្នកស្រីនិយាយថា៖ «ខ្ញុំតែងតែមិនសូវចូលចិត្ដជាតិជូរ និងក្លិនផ្កាច្រើនទេ។ ដូច្នេះ តាមចំណូលចិត្ដខ្ញុំ រសជាតិសម្រាប់ខ្ញុំគឺ Earl Grey»។
មិនខុសពីកន្លែងផ្សេងទូទាំងពិភពលោក ចំណាប់អារម្មណ៍ចំពោះការបិតស្រាជីនកាន់តែពេញនិយមនៅក្នុងប្រទេស សិង្ហបុរី ដែលអម្បូរទៅដោយបារ៍ដ៏ច្រើនសន្ធឹក។
ក្រោយពីក្រុមនិស្សិតបិតស្រាខ្លួនឯងរួច វាជាវេលាត្រូវច្រកដប និងបញ្ជូនទៅកាន់បារ៍នានា រួចផ្សំជាស្រាក្រឡុក ជីន និងតូនិកជាដើម។ វគ្គសិក្សានេះមានតម្លៃ ១៤៥ ដុល្លារ ហើយនិស្សិតអាចយកមកវិញនូវស្រាបិតខ្លួនឯងចំណុះកន្លះលីត្រ។
លោក ដានីញ៉ែល លីម បានលាយស្រាជីនជាមួយស្លឹកគ្រៃ ក្រូចសើច និងម្ទេស ៣ ចំណិតតូចៗ។
បុរសអាយុ ៣០ ឆ្នាំរូបនេះ ដានីញ៉ែល លីម បានប្រាប់ AFP ថា៖ «ខ្ញុំចង់ភ្លក្សរសជាតិស្រាសិង្ហបុរីម្ដងមើលថា តើវាយ៉ាងម៉េច? វារាងហឹរៗ និងឆួលច្រមុះ»៕ AFP/HR