ក្រុងគូបាង ស៊ីម៉ាង៖ ធូបដើមធំៗរាប់ពាន់តម្រៀបគ្នា ខ្លះត្រូវបានរចនាដោយរូបនាគរាជ ដែលផ្ដេកទម្រេតលើជញ្ជាំងរោងសិប្បកម្មម៉ាឡេស៊ី ត្រៀមរដូវកាលបុណ្យចូលឆ្នាំប្រពៃណីចិនចុងសប្ដាហ៍នេះ។
ស្ថិតនៅក្រុងដាច់ស្រយាល គូបាង ស៊ីម៉ាង កម្មករបានចំណាយពេលរាប់ខែ ប្រើប្រាស់វិធីសាស្ត្រប្រពៃណីក្នុងការច្នៃផលិតធូបខ្នាតយក្ស ដោយខ្លះកម្ពស់ដល់ទៅ ២ ម៉ែត្រ មុននឹងបញ្ជូនទៅកាន់ហាងនានា។
មុនរដូវកាលចូលឆ្នាំចិន ជំនួញធ្វើធូបកាន់តែមមាញឹក នៅពេលដែលពលរដ្ឋសែស្រឡាយចិនទូទាំងប្រទេសនាំគ្នាទៅអុជធូបបួងសួងតាមអារាម និងពិធីប្រពៃណី។
ថ្វីដ្បិតតែម៉ាឡេស៊ី សម្បូរអ្នកកាន់សាសនាអ៊ីស្លាម ប៉ុន្តែប្រទេសនេះក៏មានពលរដ្ឋសែស្រឡាយចិនដ៏ច្រើន ជាមួយការប្រារព្ធបុណ្យចូលឆ្នាំចិនគ្រប់ច្រកល្ហក។
ម្ចាស់សិប្បកម្មធូប អ៊ុង ជិនចេ ដែលមមាញឹកចាត់ចែងការងារក្នុងរោងឈើប្រក់ដំបូលស័ង្កសីបាននិយាយថា ធូបធ្វើដោយដៃពណ៌ស្រស់ឆើតទាំងនេះ ល្អជាងធូបផលិតដោយម៉ាស៊ីនឆ្ងាយណាស់។
ចង្អុលទៅកាន់ក្បាច់រចនាលើធូបខ្នាតយក្ស អ្នកជំនួញវ័យ ៦០ ឆ្នាំរូបនេះបាននិយាយទៀតថា៖ «បើប្រើម៉ាស៊ីន ស្មានថាអ្នកអាចធ្វើក្បាលនាគបានល្អអ៊ីចឹងឬ?»។
ធូបរបស់លោកត្រូវបានផលិតជាចម្បងពីកម្ទេចឈើរណារ ហើយលាយជាមួយឈើកិន និងឈើខ្លឹមចន្ទន៍ក្រស្នា។ ល្បាយឈើត្រូវបានលាយជាមួយទឹក មុននឹងយកទៅចាក់ពុម្ពជាធូបធំៗ។
បើទោះជាឆ្នាំនេះ ជាឆ្នាំជូត ប៉ុន្តែលោក អ៊ុង និយាយថា គ្មានអ្នកណាចង់បានធូបរូបកណ្ដុរឡើយ។
លោកនិយាយបណ្ដើរសើចបណ្ដើរ ថា៖ «ឆ្នាំកណ្ដុរមែន តែសត្វហ្នឹងមិនសូវល្អ ព្រោះវាជាសត្វលួចរបស់គេស៊ី»។
ផ្ទុយទៅវិញ ការរចនារូបនាគលើធូប តែងតែពេញនិយមគ្រប់ឆ្នាំ គ្រប់រដូវកាល ដោយសារសត្វនេះជានិមិត្តរូបនៃអំណាច ថាមពល និងសំណាងល្អ ក្នុងជំនឿពលរដ្ឋអាស៊ី។
លោក អ៊ុង និយាយថា ធូបរបស់លោកត្រូវបានលក់ក្នុងតម្លៃពី ៨ ទៅ ៨០ រីងហ្គីត (២ ទៅ ២០ ដុល្លារ) ក្នុង ១ ដើម អាស្រ័យទៅលើគុណភាព និងទំហំរបស់វា។ ក្រៅពីចង្វាក់ផលិតកម្មដ៏មមាញឹកត្រៀមចូលឆ្នាំចិន សិប្បកម្មលោកតែងតែផ្គត់ផ្គង់តម្រូវការបុណ្យទានប្រពៃណីចិនជាហូរហែ។
លោកប៉ាន់ប្រមាណថា សព្វថ្ងៃនៅប្រទេស ម៉ាឡេស៊ី មានអ្នកធ្វើធូបដូចជារូបលោក ៣០ កន្លែងប៉ុណ្ណោះ ដោយចំនួនកាន់តែធ្លាក់ចុះនៅប៉ុន្មានឆ្នាំចុងក្រោយនេះ។
លោកត្អូញថា៖ «ក្មេងៗមិនចង់ធ្វើការងារនេះទេ វាពិបាក និងគ្មានម៉ាស៊ីនត្រជាក់»។
ធូបភាគច្រើនដែលដាក់លក់នៅទីផ្សារអាស៊ីអាគ្នេយ៍ មានប្រភពមកពីប្រទេស ចិន។
ជាង ៦០ ភាគរយ នៃប្រជាជនម៉ាឡេស៊ី ៣២ លាននាក់ ជាពលរដ្ឋកាន់សាសនាអ៊ិស្លាម ហើយប្រមាណ ១ ភាគ ៤ ជាប់សែស្រឡាយចិន។ ប្រទេសនេះក៏មានល្បាយពលរដ្ឋជនជាតិដើមឥណ្ឌាដ៏ច្រើនផងដែរ៕ AFP