.jpg)
ចង្កឹះទ្រាំងដែលផលិតរួច និងចងជាបាច់ៗ។ រូបថត Vanna Adventure Travel
ខេត្តព្រះវិហារៈ សហគមន៍សិប្បកម្មផលិតផលពីធាងទ្រាំងចំនួន ២៨ គ្រួសារនៅក្នុងភូមិចំនួន ៥ នៅក្នុងស្រុកឆែប ខេត្តព្រះវិហារកំពុងតែមានសេចក្តីសោមន្សរីករាយនឹងរបរបន្ថែមផលិតចង្កឹះពីធាងទ្រាំង ក្រោយពីមានគម្រោងជួយជ្រោមជ្រែងពីអង្គការអនុផលព្រៃឈើ (NTFP) មកនោះ។
លោក ជា ថុង ស្ថាបនិកភ្នាក់ងារទេសចរណ៍ Vanna Adventure Travel ដែលតែងជួយនាំយកផលិតចង្កឹះទ្រាំងពីសហគមន៍នេះមកលក់បន្តដោយសារមានការសហការពីអង្គការ NTFP នោះឲ្យដឹងថា៖ «ការផលិតចង្កឹះពីធាងទ្រាំងចាស់ៗដែលងាប់ ពលរដ្ឋសហគមន៍អាចរកប្រាក់ចំណូលបន្ថែមបាន ដោយសារពីមុនមិនដែលទាញប្រយោជន៍ពីរុក្ខជាតិនេះឡើយ ក្រៅពីយកទៅដុតនោះ។ ពួកគាត់សប្បាយចិត្តខ្លាំង ព្រោះថាជាមុខរបរបន្ថែមអាចរកប្រាក់បានគឺក្នុង ១ ថ្ងៃពួកគាត់រកបានចន្លោះពី ៥ ម៉ឺនរៀលទៅ ៧ ម៉ឺនរៀលឯណោះ សម្រាប់ ១ គ្រួសារ ហើយពួកគាត់ក៏អត់ចេញទៅធ្វើការក្រៅផ្ទះឡើយ»។
ដើមទ្រាំងដែលពលរដ្ឋយកធាងចាស់ងាប់ទៅច្រៀកធ្វើជាចង្កឹះនៅស្រុកឆែប ខេត្តព្រះវិហារ។ រូបថត Vanna Adventure Travel
លោក ជា ថុង បន្តថា៖ «ប្រសិនបើរដូវប្រាំងសម្បូរធាងទ្រាំងងាប់ បងប្អូនសហគមន៍អាចមានលទ្ធភាពយកធាងទ្រាំងទាំងនោះមកផលិតជាចង្កឹះបានជាង ២០០០ បាច់ (១ បាច់មាន ១០ គូ) ក្នុង ១ ខែ ខណៈរដូវវស្សាវិញរាងខ្សត់ធាងទ្រាំងងាប់នោះ ទើបអាចផលិតបានតែត្រឹម ១០០០ បាច់ប៉ុណ្ណោះក្នុង ១ ខែ។ ចំពោះចង្កឹះ ១ បាច់តម្លៃ ១ ម៉ឺនរៀល»។
ដោយសារតែទ្រាំង ជារុក្ខជាតិមានលក្ខណៈស្រដៀងគ្នានឹងត្នោតដែលមានអាយុវែងទើបអាចផ្តល់ផលឲ្យនោះ ទើបចង្វាក់សិប្បកម្មផលិតចង្កឹះទ្រាំងរបស់សហគមន៍នៅស្រុកឆែប ប្រែប្រួលតាមរដូវកាលផងដែរ។
លោក ជា ថុង បង្ហើបឲ្យដឹងពីអាយុកាលនៃរុក្ខជាតិទ្រាំងដែរថា៖ «បើតាមការដឹងបន្តពីការអានសៀវភៅស្រាវជ្រាវដើមទ្រាំងនេះគឺវាជារុក្ខជាតិដែលស្រដៀងគ្នានឹងដើមត្នោតដែរ។ វាមានអាយុកាលប្រមាណពី ២០-២៥ ឆ្នាំទើបអាចទាញប្រយោជន៍ពីវាបាន ខណៈពេលមានអាយុប្រមាណ ៧០-៨០ ឆ្នាំ វានឹងងាប់ហើយ។ ម្យ៉ាងវិញទៀតរុក្ខជាតិទ្រាំងនេះគឺអាចផ្តល់នូវផ្លែផ្កាបានតែម្តងគត់សម្រាប់ ១ ជីវិតរបស់វា»។
ពលរដ្ឋកំពុងតែច្រៀកធ្វើចង្កឹះពីធាងទ្រាំងក្រៀម។ រូបថត Vanna Adventure Travel
ការចូលរួមគាំទ្រផលិតផលចង្កឹះទ្រាំងរបស់សហគមន៍ខ្មែរយើងគឺរួមចំណែកលើកកម្ពស់ជីវភាពរបស់ពួកគាត់ ការកាត់បន្ថយការងារចំណាកស្រុក ផ្តល់ឱកាសដល់កូនចៅពួកគាត់បានរៀនសូត្រ ការអភិវឌ្ឍប្រកបដោយចីរភាព និងកាត់បន្ថយប្រើប្រាស់ជ័រប្លាស្ទិកផងដែរ។ ប្រសិនបើចង់បានចង្កឹះទ្រាំងដ៏ល្អនេះអាចទាក់ទងទូរស័ព្ទលេខ 012 977 372 , 087 883 898 និងមានសេវាដឹកជូនតាមខេត្តនានាទៀតផងដែរ៕
