The Phnom Penh Post Search

Search form




Logo of Phnom Penh Post newspaper Phnom Penh Post - សិប្បករ​ខ្មែរ​ប្រែ​ក្លាយ​ចេកទុំ​សល់​ឲ្យ​ទៅ​ជា​ផលិត​ផល ​ស្ករ និង​ស្រា​ចេក​




សិប្បករ​ខ្មែរ​ប្រែ​ក្លាយ​ចេកទុំ​សល់​ឲ្យ​ទៅ​ជា​ផលិត​ផល ​ស្ករ និង​ស្រា​ចេក​

Content image - Phnom Penh Post
ភ្ញៀវជាតិ និង​អន្ដរជាតិ​ជាវ​ផលិត​ផល​ស្ករ និង​ស្រាចេក ក្នុង​ពេល​តាំង​ពិព័រណ៍​។ រូប សហការី

សិប្បករ​ខ្មែរ​ប្រែ​ក្លាយ​ចេកទុំ​សល់​ឲ្យ​ទៅ​ជា​ផលិត​ផល ​ស្ករ និង​ស្រា​ចេក​

កំពង់ចាមៈ ដោយសារ​តែ​ឪពុក​ម្តាយមាន​បទ​ពិសោធ​នៅ​ក្នុង​មុខរបរ​ឈ្មួញ​កណ្តាល​ដំណាំ​ចេក​ និង​ចំនួន​ចេក​ទុំ​ជោរ​តែង​នៅ​សល់លក់​មិន​អស់ជារឿយៗ​នោះ បាន​ជំរុញឲ្យ​សិប្បករ​វ័យ ៣៧ ឆ្នាំ​រំពៃ​នឹក​រកវិធី​​ច្នៃដោយ​ខ្លួនឯង​ជិត ២ ឆ្នាំ​ ទើប​រកឃើញ​វិធី​ច្នៃ​ចេកទុំ​ជា​ស្ករចេក និង​ស្រាចេក​បាននៃ​សិប្ប​កម្ម​គំនិត​ថ្មី។

សិប្ប​កម្មនេះ​ ស្ថិត​នៅ​ឯ​ភូមិ ​និង​ឃុំ​តាអុង ស្រុកចំការ​លើ​ ខេត្ត​កំពង់ចាម​ ខណៈនៅ​ឆ្នាំ ២០១៥​ ម្ចាស់​សិប្បកម្ម​ទទួលបាន​ពាន​រង្វាន់លេខ ១ ក្នុង​កម្មវិធី​កែច្នៃ​ផលិត​ផលកសិកម្ម​ទូទាំងប្រទេស​ទៀត​ផង។

លោក លឹម ផារ៉ា ម្ចាស់​សិប្បកម្ម​គំនិត​ថ្មី​បាន​បង្ហើប​ថា៖ «ដើម​ឡើយ ខ្ញុំគ្រាន់តែ​គិតថា ធ្វើ​យ៉ាង​ណា​កុំឲ្យ​សល់ចេក​ទុំជោរ​ចោល​ឥត​ប្រយោជន៍ ក៏គិតរក​វិធី​ច្នៃ​ពីចេក​នេះ។ ឆ្នាំ ២០១៣ ការ​ពិសោធ​ទទួល​បាន​ជោគ​ជ័យ​លើកា​រកែច្នៃ​ចេកទុំ​ធ្វើជាស្ករ​ចេក​ដោយប្រើ​ម៉ាស៊ីន​សម្ងួត​ទឹកចេក​ធ្វើស្ករ។ ប៉ុន្មានខែ​ក្រោយ​មកក៏​ច្នៃជា​ស្រាចេក​មួយ​ប្រភេទ​ទៀត​ ដែលប្រើ​រូបមន្តមាន​ត​ពី​ដូនតាជា​លំនាំនៃ​ការ​ផលិត​ស្រា​ថ្នាំ​បុរាណ​តែម្តង»។

ផលិតផល​កែច្នៃ​នេះនៅ​ពុំទាន់​មាន​អ្នក​ស្គាល់​ច្រើន​ទេ​ក្នុង​ប្រទេស​កម្ពុជា​ ខណៈ​លោកប្រាប់​​ពី​តម្លៃ​លក់​រាយ​នៅ​ទី​ផ្សារ​ក្នុង​តំបន់​ផ្ទាល់​ថា៖ «សម្រាប់​ស្ករ​ចេកយើង​លក់​តម្លៃ ២ ម៉ឺន​រៀលក្នុង ១ គីឡូ​ក្រាម ខណៈ​ស្រា​ចេកវិញ ១ ដបតម្លៃ ២៤០០០ រៀល​។ ជា​មធ្យម​យើង​ផលិត​ស្ករ​ចេក​បាន​ចំនួន​ពី ២០០ ទៅ ៣០០ គីឡូក្រាម​​ក្នុង​មួយ​ខែ ខណៈ​ស្រាចេក​វិញ​បាន​ចំនួនពី​ ៦០០ ទៅ ៧០០ ដប​ប៉ុណ្ណោះ»៕​

អត្ថបទគួរចាប់អារម្មណ៍