.jpg)
ក្រុងកាប៊ុល: ព័ទ្ធជុំវិញដោយក្រដាសគ្រប់ពណ៌ និងចម្រៀកឫស្ស៊ីតូចៗ លោក ហាលីម មូហាម៉ាឌី (Halim Muhammadi) ដែលជាអ្នកផលិតខ្លែងជនជាតិអាហ្វហ្គានីស្ថាន រួមទាំងកូនចៅរបស់គាត់កំពុងអង្គុយនៅបន្ទប់តូចមួយ ដោយម្នាក់ៗរវល់នឹងការធ្វើឧបករណ៍បង្ហោះលេង ត្រៀមសម្រាប់រដូវខ្លែង ឯទីក្រុងកាប៊ុល។
សិប្បករជាច្រើននាក់ បានចំណាយពេលស្ទើរពេញមួយឆ្នាំ ដើម្បីផលិតខ្លែងបន្ថែមត្រៀមទុកក្នុងស្តុករបស់ខ្លួនដើម្បីលក់។
បន្ទាប់ពីការលក់អស់រាប់ម៉ឺនខ្លែង ក្នុងអំឡុងរដូវក្ដៅ វត្តមានខ្លែងចម្រុះពណ៌ បានបណ្ដែតខ្លួនលើវេហាខ្លែងមួយត្រូវចំណាយពេលធ្វើតែប៉ុន្មាននាទីប៉ុណ្ណោះ។
ស្ថិតក្នុងវ័យ ៥០ ឆ្នាំ លោក មូហាម៉ាឌី ដែលមានជំនាញធ្វើខ្លែងតាំងពីកុមារ បានបង្ហាញស្នាដៃសិប្បកម្ម ផ្ដើមពីការកាត់ក្រដាសទន់ៗជាច្រើនពណ៌។
លោកបានយកជ័រកាវទៅបិទជាប់នឹងឈើឫស្សីស្តើងៗ ដែលត្រូវបានតម្រៀបរួចជាស្រេចភ្ជាប់នឹងក្រដាស់គ្រប់ពណ៌ ដើម្បីរំលេចចេញរូបរាងជាខ្លែង។
បន្ទាប់មកសិប្បករខ្លែងវ័យជ្រេរូបនេះ ក៏បានហុចបន្តទៅកូនៗរបស់លោក កូនស្រី ម៉ាឌីណា (Madina) អាយុ១៨ឆ្នាំ កូនស្រី នីជីណា (Nigina) អាយុ១៥ឆ្នាំ និង កូនប្រុស ស៊ូហាអ៊ីប (Shohaib) អាយុ១៤ ឆ្នាំដើម្បីឲ្យពួកគេតុបតែងបន្ថែមឲ្យខ្លែងមើលទៅស្អាត ឆើតឆាយ គួរឲ្យទាក់ទាញ មុននឹងយកវត្ថុបង្ហោះលេងនេះទៅហាលថ្ងៃឲ្យស្ងួតកាវជាប់ល្អ។
ខ្លែងមួយមានតម្លៃតែប៉ុន្មានសេនប៉ុណ្ណោះ ខណៈនៅប្រទេសក្រីក្របែបនេះ សិប្បករពុំអាចលក់បានថ្លៃនោះទេ។
វេលារដូវបង្ហោះខ្លែងចូលមកដល់ពេញលេញ គឺអំឡុងពេលដើមរដូវរងារ និងចុងរដូវក្ដៅ ជាពេលដែលពោរពេញដោយខ្យល់បក់រវិចៗ សក្ដិសមបំផុតសម្រាប់មនុស្សគ្រប់វ័យ ទៅកាន់ទីទួលខ្ពស់ ដើម្បីលេងខ្លែង តាមប្រពៃណីកម្សាន្តដ៏ពេញនិយមរបស់ប្រទេសអាហ្វហ្គានីស្ថាន។
ការបង្ហោះខ្លែងត្រូវបានហាមឃាត់នៅក្នុងរបបគ្រប់គ្រងរបស់ពួកតាលីបង់ដ៏ឃោរឃៅចន្លោះឆ្នាំ ១៩៩៦-២០០១ ហើយការបង្ហោះខ្លែង បានចាប់ផ្ដើមពេញនិយមឡើងវិញបន្ទាប់ពីនោះ។
វប្បធម៌បង្ហោះខ្លែងរបស់អាហ្វហ្គានីស្ថានចាប់ផ្តើមល្បីល្បាញជាថ្មី បន្ទាប់ពីសៀវភៅប្រលោមលោកឈ្មោះ The Kite Runner កាលពីឆ្នាំ២០០៣ របស់អ្នកនិពន្ធអាហ្វានីស្ថាន Khaled Hosseini ដែលក្លាយជាសៀវភៅលក់ដាច់បំផុតនៅទូទាំងពិភពលោក។ ក្រោយមកសាច់រឿងនៃសៀវភៅនេះ ក៏ត្រូវបានគេយកទៅផលិតជាខ្សែភាពយន្ត។
លោក Masood អាយុ ៤០ ឆ្នាំដែលជាអ្នកលក់ខ្លែងជំនាន់ទី២ បានប្រាប់ទីភ្នាក់ងារព័ត៌មាន AFP នៅឯហាងលក់ខ្លែងរបស់លោកក្នុងទីក្រុងអ៊ួអរ Shor Bazaar ដ៏កៀកបង្កើយនឹងទីក្រុងកាប៊ុលថា៖« គ្រួសារខ្ញុំទាំងមូលទាំងកូនប្រុស និងកូនស្រីរបស់ខ្ញុំ គឺជាអ្នកផលិតខ្លែងទាំងអស់គ្នា (នៅឯផ្ទះ)»។
លោកបានបន្ថែមថា៖ «នៅក្នុងរដូវរងាយើងលក់ខ្លែងបានពីចន្លោះពី ១០ ម៉ឺនទៅ ៣០ ម៉ឺនខ្លែងឯណោះ។ ខ្ញុំអាចរកចំណូលបានប្រហែល ៣០ ម៉ឺន លុយអាហ្វានីស្ថាន (ប្រហែល ៤២០០ ដុល្លារ) ក្នុងរយៈពេល ៣ ខែ»។
នៅខាងក្នុងហាងស្តុកខ្លែងនានាក្នុងទីក្រុង Shor Bazaar គំនរខ្លែងដ៏ធំសម្បើម ហាក់សរបញ្ជាក់អំពីការស្រឡាញ់សកម្មភាពកម្សាន្តលើវេលា របស់ជនជាតិអាហ្វហ្គានីស្ថានចំពោះកីឡាមួយនេះ។
លោក Pahlwan Karim អាយុ ៦៥ ឆ្នាំដែលគ្រួសាររបស់គាត់បានផលិតខ្លែងអស់រយៈពេលជិតមួយសតវត្សរ៍មកហើយនោះបានឲ្យដឹងថា៖ «ប្រជាពលរដ្ឋនៅទីនេះពិតជាចូលចិត្តការបង្ហោះខ្លែងខ្លាំងណាស់»។
ខ្លែងរបស់លោកក៏មានម៉ាកសំគាល់គឺរូបសត្វ ខ្យាដំរី ដោយដាក់ឈ្មោះទៅតាមរហស្សនាមរបស់ប្អូនប្រុសលោក។
លោកបានបន្ថែមថា៖« នៅក្នុងរដូវរងា នៅផ្សារនេះ គេលក់ខ្លែងអស់រាប់ម៉ឺនខ្លែងឯណោះជារៀងរាល់ថ្ងៃ»៕ AFP/NS
