The Phnom Penh Post Search

Search form




Logo of Phnom Penh Post newspaper Phnom Penh Post - សិលា​ស្ដម្ភ​ដ៏​ធំ​ដុះ​ច្រូង​ច្រាង​ក្រោម​វាល​ខ្សាច់​ម៉ិកស៊ិក

សិលា​ស្ដម្ភ​ដ៏​ធំ​ដុះ​ច្រូង​ច្រាង​ក្រោម​វាល​ខ្សាច់​ម៉ិកស៊ិក

Content image - Phnom Penh Post

សិលា​ស្ដម្ភ​ដ៏​ធំ​ដុះ​ច្រូង​ច្រាង​ក្រោម​វាល​ខ្សាច់​ម៉ិកស៊ិក

ក្រុងម៉ិកស៊ីកូ: ​ស្ថិត​នៅ​ជម្រៅ​ចុះ​ទៅ​ក្រោម​ដី​ប្រមាណ​៣០៤​ម៉ែត្រ​នៃ​តំបន់​វាល​ខ្សាច់​ឈីហួន​ហួ ក្នុង​ប្រទេស​ម៉ិកស៊ិក​ឯ​ណោះ គេបាន​ឃើញ​រូង​ក្រហូង​ដី​ដ៏​ធំ​សម្បើម​មួយ ​​ដោយ​បង​ប្អូន​ប្រុស​ពីរ​នាក់​នៅ​ក្នុង​​តំបន់​រ៉ែ​ ណៃកា ដែល​ជា​អណ្តូង​ជីក​រក​រ៉ែសំណ និង​ប្រាក់​នៅ​ចន្លោះ​ឆ្នាំ ២០០៧ និង​ឆ្នាំ​ ២០០៨។ ​

ល្អាង​មាន​លក្ខណៈ​ចម្លែក និង​មើល​ទៅ​គួរ​ឲ្យ​ព្រឺ​ព្រួច​ដោយ​​គេ​ឃើញ​មាន​សិលាស្ដម្ភ (ថ្ម​រាង​ ៤​ជ្រុង​ទ្រវែង) ​គ្រី​ស្តាល់​ដ៏​ធំ​ដែល​មានប្រវែង​រហូត​ដល់​ ១១ ម៉ែត្រ ​ស្មើ​នឹង​កម្ពស់​មនុស្ស​ ៦ នាក់​។

អ្វី​ដែល​កាន់​តែ​គួរ​ឲ្យ​ព្រឺ​ព្រួច​ទៅ​ទៀត​នោះ គឺនៅ​តាម​មាត់​រូង​នោះ​មាន​ចម្រូង​​ចម្រឹង​ថ្ម​គ្រីស្តាល់​ដ៏​ស្រួច​ស្ញាញ​ដែល​ដុះ​ច្រូង​ច្រាង​ចាប់​តាំង​ពី​លើ​រហូត​ដល់​ក្រោម​តែ​ម្តង។​

រណ្តៅ​សិលា​ស្ដម្ភ​គ្រីស្តាល់​ត្រូវ​បាន​កកើត​ឡើង​មាន​លាយ​​ជា​មួយ​​សារ​ធាតុ​គីមី​នានា​ផង​ដែរ​​ដូច​ជា​ អំបិល​កាបូណាត​ស៊ុល​ផាត ដែល​ហូរ​ច្រោះ​ចូល​ទៅ​ក្នុង​រណ្តៅ​នេះ​រយៈ​ពេល​រាប់​លាន​ឆ្នាំ​មក​ហើយ។

សិលា​ស្ដម្ភ​គ្រីស្ដាល់​ក្នុង​ល្អាង​ក្រោម​វាល​ខ្សាច់​នៅ​ម៉ិកស៊ិក។
សិលា​ស្ដម្ភ​គ្រីស្ដាល់​ក្នុង​ល្អាង​ក្រោម​វាល​ខ្សាច់​នៅ​ម៉ិកស៊ិក។ រូបថត AFP

ចំណែក​ទឹក​អំបិល​កាបូណាត​ស៊ុល​ផាត នោះ​មាន​សីតុណ្ហ​ភាព​ក្តៅ​ល្មម ដោយ​សារ​តែ​វា​មាន​សារ​ធាតុ​​ល្បាយ​នៃ​ម៉ាក់ម៉ា​ស្ថិត​នៅ​ពី​ក្រោម​ល្អាង​ជិត​២​គីឡូម៉ែត្រ។

គួរ​បញ្ជាក់​ថា ​រយៈ​ពេល​៦០​ម៉ឺន​ឆ្នាំ​មុន សារ​ធាតុ​​ល្បាយ​ម៉ាក់ម៉ា​​បាន​ចាប់​ផ្តើម​ត្រជាក់​កក​បន្តិច​ម្តងៗ​​លុះ​ដល់​រាប់​សត​វត្សរ៍​ទៅ​វា​នឹង​ក្លាយ​ទៅ​ជា​​សិលា​ស្ដម្ភ​គ្រី​ស្តាល់​ពណ៌​ស​ដូច​​សាជូរ​ផុស​ចេញ​ពី​ផ្ទៃ​ទឹក​​ ដូច​ករណី​​សិលា​​គ្រីស្តាល់​ដែល​គេ​បាន​រក​ឃើញ​កាល​ពី​ឆ្នាំ​១៩៨៥​ នោះ​អ៊ីចឹង​ដែរ​។

ដោយ​សារ​តែ​សិលា​ស្ដម្ភ​គ្រី​ស្តាល់​ទាំង​នេះ​មាន​រាង​ដូច​ជា​ទឹក​កក​ រូប​ភាព​នេះ​បង្ហាញ​ថា​ វា​ច្បាស់​ជា​ចុះ​ត្រជាក់​ណាស់​ហើយ​នៅ​ខាង​ក្នុង​ល្អាង​នោះ​។​ប៉ុន្ដែ​គ្រាន់តែ​មើល​នឹង​ភ្នែក​ វា​មិន​មែន​ជា​ការពិត​ឡើយ។

ជាក់​ស្ដែង​ វា​មាន​សីតុណ្ហ​ភាព​ដល់​ទៅ​ ៤៤​អង្សាសេ​ឯ​ណោះ​ ជាមួយ​នឹង​សំណើម​​ពី​​ ៩០ ​​ទៅ ​១០០ ​ភាគ​រយ​តែ​ម្តង​។ ដូច្នេះ​ពេល​ចូល​ទៅ​ក្នុង​​ល្អាង​សិលា​ស្ដម្ភ​​នោះ​អ្នក​ត្រូវ​ពាក់​អាវ​សុវត្ថិភាព​ការ​ពារ​​ និង​ស្ពាយ​បំពង់​ខ្យល់​ត្រជាក់​ជាប់​ជានិច្ច​។

បច្ចុប្បន្ននេះ ចំពោះ​មាត់​ច្រក​ចូល​ល្អាង​សិលា​ស្ដម្ភ​គ្រី​ស្តាល់​នេះ​ត្រូវ​បាន​គេ​ជួស​ជុល​ដោយ​ ប្រើ​ចម្រឹង​ដែក​ថែប​អប​ដើម្បី​ការ​ពារ​កុំ​ឲ្យ​មាន​ការ​បែក​ធ្លាក់​នូវ​ដុំ​សិលា​តូចៗ​ដ៏​ស្រួច​ស្ញាញ​ច្រូង​ច្រាង​ផង​ដែរ៕ PR

អត្ថបទគួរចាប់អារម្មណ៍