សៀមរាប: ពិព័រណ៍ឆ្លុះបញ្ចាំងពីអតីតកាល និងសម្លឹងទៅអនាគត Face Forward ដែលជាបណ្ដុំស្នាដៃសិល្បៈសហសម័យពីសិល្បករខ្មែរ ៤ រូបរួមទាំងស្ទូឌីយោស្ថាបត្យកម្មមួយបានរៀបចំឡើងនៅ Treeline Urban Resort ក្នុងទឹកដីសម្បូរប្រាង្គប្រាសាទបុរាណសៀមរាបអង្គរចាប់តាំងពីថ្ងៃទី ២៦ ខែមករា និងបន្តរហូតដល់ថ្ងៃទី ៣១ ខែមីនា។
សិល្បករពីសាកលវិទ្យាល័យរដ្ឋម៉ាសាឈូសេត និងទទួលសញ្ញាបត្រអនុបណ្ឌិតផ្នែកវិចិត្រសិល្បៈពីវិទ្យាស្ថានសិល្បៈនៅក្រុងឈីកាហ្គោ ពេជ្រ សុភាព បានរំលេចចម្លាក់ពីឈើ ឫស្សី លួស និងលោហៈឈ្មោះថា Ordette និងចម្លាក់ផ្ការាំងភ្នំច្នៃពីផ្ដៅបង្កប់អត្ថន័យជុំវិញធម្មជាតិ និងវប្បធម៌។
ដោយសារស្នាដៃរបស់លោកធ្លាប់ត្រូវបានតាំងបង្ហាញនៅវិចិត្រសាល និងសារមន្ទីរល្បីៗតាំងពីអាស៊ី អឺរ៉ុប អូស្ត្រាលី និងអាមេរិកនោះសិល្បករវ័យ ៤៨ ឆ្នាំរូបនេះត្រូវបានចាត់ទុកថាជាសិល្បករសហសម័យដ៏លេចធ្លោ ១ រូបលំដាប់អន្តរជាតិ។
ឱកាសតាំងបង្ហាញស្នាដៃសិល្បៈនៅសណ្ឋាគារប្រណីត ឯទឹកដីខេត្តសៀមរាបត្រូវបានលោក ពេជ្រ សុភាព បានចាប់អារម្មណ៍ឃើញថា៖ «Treeline គឺជារីហ្សតលេចធ្លោខុសពីគេដោយទីនេះបានច្របាច់បញ្ចូលគ្នានូវសោភណភាពនៃពិភពនាអតីតកាលនៅកម្ពុជាជាមួយសិល្បៈសហសម័យដែលកំពុងតែផុសឡើង»។
សិល្បករខ្មែរមានឈ្មោះបោះសំឡេងលើឆាកអន្តរជាតិរូបនេះបានបន្តទៀតថា៖ «ខ្ញុំសង្ឃឹមថានឹងមានការបន្តសហការគ្នា ចែករំលែកស្នាដៃសិល្បៈរបស់យើងជាមួយទេសចរយើងក៏ដូចជាភ្ញៀវបរទេសផងដែរ»។
ពិព័រណ៍ Face Forward គឺជាស្នាដៃលក្ខណៈក្រុមដំបូងបង្អស់ដែលត្រូវបានដាក់តាំងនៅវិចិត្រសាលនៃសណ្ឋាគារ Treeline ក្នុងឆ្នាំ ២០១៩ នេះដោយផ្ដោតការចាប់អារម្មណ៍លើអតីតកាល និងសម្លឹងទៅអនាគត។
ទីតាំងវិចិត្រសាលស្ថិតនៅតាមដងស្ទឹងសៀមរាបអាចផ្ដល់នូវបទពិសោធស្នាក់នៅក្នុងបរិយាកាសពោរពេញដោយការច្នៃប្រឌិតបែបសិល្បៈ ភាពប្រណីត និងការគិតគូរដល់បរិស្ថាន។ Treeline ដែលស្ថិតនៅទឹកដីប្រវត្តិសាស្ត្រសៀមរាបក៏ព្យាយាមធ្វើការជាមួយសហគមន៍ដូចជាការដាំដើមឈើនៅតាមមាត់ស្ទឹង ការប្រើប្រាស់ប្លាស្ទិកឲ្យអស់លទ្ធភាព និងជ្រើសរើសសម្ភារផ្គត់ផ្គង់ក្រោមគោលការណ៍បៃតង។
ស្ថាបនិក Treeline លោក ហុក កាង បានឲ្យដឹងថាការរចនារីសតនេះគឺផ្ដោតទៅលើស្ដង់ដា បរិស្ថាន និងសោភណភាពស្អាតបែបសាមញ្ញដោយប្រើប្រាស់នូវឈើ និងថ្មមានប្រភពត្រឹមត្រូវ ហើយសង្ហារិមបែបស្រទន់ក៏តម្រូវឲ្យស័ក្ដិសមនឹងបរិយាកាសដ៏ស្ងប់ស្ងាត់នៃធម្មជាតិ។
លោកបានឲ្យដឹងថា៖ «ខ្ញុំចង់បង្កើតនូវកន្លែងដ៏កក់ក្ដៅមួយដែលផ្សារភ្ជាប់ទំនាក់ទំនងរវាងការគោរពធម្មជាតិ និងទស្សនវិស័យនៃកម្ពុជានាសហសម័យ ដោយឆ្លុះបញ្ចាំងការរចនានៃ Treeline និងស្នាដៃសិល្បៈរបស់សិល្បករយើង»។
ក្រៅពីលោក ពេជ្រ សុភាព សិល្បករល្បីៗផ្សេងទៀតដែលបានចូលរួមបង្ហាញស្នាដៃនៅ Treeline រួមមានលោក ថាង សុធា ជាវិស្វករប្រែក្លាយខ្លួនជាអ្នកសិល្បៈ លោក នូវ ជានិច្ច អតីតសិស្សសាលាហ្វារពន្លឺសិល្បៈនៅខេត្តបាត់ដំបង សិល្បករជំនាញច្នៃអលង្ការវិវឌ្ឍខ្លួនជាវិចិត្រករគំនូរលោក ASASAX និងស្ទូឌីយោ HKA & Partners ដោយធ្លាប់ធ្វើការលើគម្រោងរចនាទីតាំងប្រោនកាហ្វេ និង Treeline ផ្ទាល់តែម្ដង៕