ភ្នំពេញ៖ ក្នុងបំណងរឹតចំណងទាក់ទងវប្បធម៌ ប្រវត្តិសាស្ត្ររវាងកម្ពុជា និងបារាំងសិល្បករកម្ពុជា ៣ រូប ពីផលិតកម្ម KlapYaHandz វុទ្ធា AGO និង ស្រីលក្ខណ៍ ដែលម្នាក់ៗមានអ្នកទស្សនាវីដេអូរាប់លានដងនោះ ត្រូវបានអញ្ជើញទៅសម្ដែងជាលើកដំបូង ឯទីក្រុងប៉ារីសនៅថ្ងៃទី ២៨ ខែកុម្ភៈ នេះ។
ស្ថាបនិក Sabay Events លោក Dara Thong និងអ្នកនាង Helene Malterre ជាកូនខ្មែរបារាំង និងជាអ្នកសហការរៀបចំកម្មវិធីនេះ ជាមួយសមាគម Samaki Kohn Khmer។
អ្នកនាង Helene បានប្រាប់ ភ្នំពេញ ប៉ុស្ដិ៍ ឲ្យដឹងថា៖ «យើងពិតជាចង់ឲ្យខ្មែរ និងអ្នកនៅបារាំង ដែលស្រឡាញ់ខ្មែរអាចស្វែងយល់ពីអ្នកមានទេពកោសល្យរបស់ KlapYaHandz ជាពិសេសគឺសិល្បករដ៏លេចធ្លោទាំងបី វុទ្ធា AGO និងស្រីលក្ខណ៍ ដែលនេះជាលើកដំបូងរបស់ពួកគេសម្រាប់ការសម្ដែងក្រៅទ្វីបអាស៊ី»។
វុទ្ធា អាចនិពន្ធចម្រៀង និងមានសំឡេងបែបផ្អែម ដោយស្ទីលចម្រៀងរបស់គាត់ភាគច្រើនទទួលឥទ្ធិពលពីអធិរាជសំឡេងមាស ស៊ីន ស៊ីសាមុត និងស្ដេចចម្រៀងប៉ុប ម៉ៃឃើល ជេកសុន។
បទចម្រៀងដ៏ពេញនិយមបំផុតរបស់តារាវ័យ ២៥ ឆ្នាំរូបនេះ គឺ «អូនសាសន៍អី» និងបទ «ក្រមុំ ៣ ស្ទីល» ដែលមានចំនួនទស្សនាសរុបជាង ៣០ លានឯណោះ។
រីឯ AGO ជាតារាចម្រៀងវ័យ ២៨ ឆ្នាំ ដែលនិយមច្រៀងបទពីដើម ហើយក្នុងនោះវីដេអូបទ «ស្ដាយស្នេហ៍អភ័ព្វ» មានចំនួនទស្សនាលើយូធូបដល់ទៅជាង ២០ លានដង។
ស្រីលក្ខណ៍ ជាតារាចម្រៀងមកពីខេត្តបាត់ដំបង ក៏ល្បីដោយសារការលើកយកបទចម្រៀងមរតកដើមមកបកស្រាយផងដែរ។
ពួកគេទាំង ៣ គឺជាតារាលេចធ្លោនៅ KlapYaHandz ដែលបង្កើតឡើងដោយលោក សុខ វិសាល នៅឆ្នាំ ២០០៥ ដោយមានចំនួន subscribers តាមយូធូបដល់ទៅជាង ៣៩ ម៉ឺននាក់ និងចំនួនទស្សនាសរុប ៩០ លានជុំវិញពិភពលោក។
ការប្រគំតន្ត្រីរបស់ពួកគេនឹងធ្វើនៅតំបន់សម្បូរខ្មែរ និងជនជាតិអាស៊ីរស់នៅ Paris 13 ដោយអ្នករៀបចំកម្មវិធីបានលើកហេតុផលថា៖ «យើងក៏ចង់បង្ហាញពិភពលោកពីការរស់រានរីកចម្រើនឡើងវិញនៃវិស័យសិល្បៈកម្ពុជានៅលើឆាកអន្តរជាតិផងដែរ»៕